I kana i ka kanuya fɔlɔ bila
1 Yesu seginnen kɔfɛ sankolo la, a ye Efesekaw ka jɛkulu laadi san kɛmɛ fɔlɔ la ko: “Ne bɛ i jalaki, katuguni i ye i ka kanuya fɔlɔ bila.” (Jir. 2:4) A jɛlen don ko Jehowa kanuya fɔlɔ min tun bɛ mɔgɔ caman na, u ye o bila. An ye tiɲɛ kalan tuma min na, an ka Ala kanuya ni an mɔgɔɲɔgɔn kanuya bonyana, wa, o y’an bila ka an ka jigiya kura fɔ ni timinandiya ye. Mun bɛ se k’an dɛmɛ walisa an kana an ka kanuya fɔlɔ bila, ani an kana dɔ bɔ an ka timinandiya la cidenyabaara la?
2 An ka yɛrɛkalan ni lajɛw matarafali: An ye tiɲɛ dɔn tuma min na, mun de y’a to an ka Ala kanuya ni an mɔgɔɲɔgɔn kanuya bonyana? An ye fɛn minnu kalan Sɛbɛnniw kɔnɔ Jehowa ko la, yala olu bɛɛ lajɛlen de sababu tɛ wa? (1 Yuh. 4:16, 19) O de kosɔn, walisa an ka kanuya ka ‘bonya ka taa a fɛ,’ fo an ka dɔnniya jɔnjɔn sɔrɔ ka taa a fɛ, ka ɲinini kɛ “Ala ka ko dunbaw” kɔnɔ walisa ka faamuyali sɔrɔ.—Fil. 1:9-11; 1 Kɔr. 2:10.
3 Ka yɛrɛ-kalan kɛ delinako ye, o bɛ se ka kɛ ko gɛlɛnba ye nin laban donw na minnu falen bɛ jɔrɔnankow ni ɲɛnajɛko caman na. (2 Tim. 3:1) An ka kan ka waati boloda walisa ka an yɛrɛ balo alako ta fan fɛ. Ka taa jɛkulu ka lajɛw la tuma bɛɛ, o fana ye fɛnba ye kɛrɛnkɛrɛnnenya la, ikomi an ɲɛ ‘b’a la ko . . . don surunyara.’—Heb. 10:24, 25.
4 An ka cidenyabaara: Ni an b’an timinandiya cidenyabaara la, o b’an dɛmɛ an ka Ala kanuya fɔlɔ ka to an na. Ni an bɛ kibaru duman waajuli kɛ, an bɛna miiri Jehowa ka layiduw la minnu bɛ a ka kanuya jira. O bɛ kɛ sababu ye jigiyaba bɛ to an na, wa an ka kanuya bɛ kɛ kanuya ɲɛnama ye. Walisa ka mɔgɔw kalan Bibulu ka tiɲɛw la, wajibi don an yɛrɛ ka ɲininiw kɛ ka o tiɲɛw faamu ka jɛya. O kɛli bɛ an yɛrɛ ka dannaya bonya fana.—1 Tim. 4:15, 16.
5 Jehowa ni fɛn ɲuman suguw bɛɛ ka kan. An ka kanuya sen bɛ o fɛnw na. (Jir. 4:11) Aw kana a to dɔ ka bɔ aw ka kanuya fanga la. Kanuya fɔlɔ min tun bɛ aw la a daminɛ na, aw ka o kanuya to aw la ka taa a fɛ aw ka Bibulu kalan fɛ, aw ka lajɛw matarafali fɛ, ani fɛn min bɛ aw niw kan ka tɛmɛ fɛn tɔw bɛɛ kan, o fana fɔli fɛ ni timinandiya ye mɔgɔ tɔw ye.—Rom. 10:10.