Baara kɛrɛnkɛrɛnnen
min bɛna kɛ Ɔkutɔburukalo 16–Nowanburukalo 12 la!
1 Sɛbɛndennin min bɛ wele ko Nouvelles du Royaume No. 37, n’o bɛna jɛnsɛn diɲɛ yɔrɔ bɛɛ la kalo kura daminɛ na, o tɔgɔ ye ko “La fin de la fausse religion est proche !” (O kɔrɔ ye ko diinɛ nkalonma laban sera!) K’a ta Ɔkutɔburukalo tile fɔlɔ fo ka na se a tile 15 la, an bɛna La Tour de Garde ni Réveillez-vous ! jira o waati kɔnɔna na. K’a daminɛ Ntɛnɛndon, Ɔkutɔburukalo tile 16 la fo ka na se Karidon, Nowanburukalo tile 12 ma, an bɛna an sen don Nouvelles du Royaume No. 37 jɛnsɛnniba la. O baara kɛrɛnkɛrɛnnen kɔnɔna na, an bɛna sɛbɛndennin ni sɔn-ni-sɔn gafenin kuraw jira ɲɔgɔn fɛ, Sibiridonw ni karidonw na.
2 Mɔgɔ minnu bɛ se k’u sen don o baara la: A jɛlen don ko mɔgɔ minnu bɛ kibaru duman weleweleda, olu bɛɛ bɛna u sen don kosɛbɛ o baara kɛrɛnkɛrɛnnen na. Dɔw bɛ se ka kɛ tutigɛbaga farankanw ye. Yala denw walima Bibulu-kalandenw b’aw bolo minnu bɛ ka taa ɲɛ alako ta fan fɛ wa? Olu dɛmɛ u ka kuma maakɔrɔw fɛ walisa k’a lajɛ ni u bɛ se ka kɛ weleweledalaw ye minnu ma batise fɔlɔ. Weleweledala minnu ye waajulibaara jɔ, maakɔrɔw ka kan k’a bɔ u yɛrɛ la ka kuma olu fɛ, ka dusu don u kɔnɔ walisa u ka se k’u sen don baara la, laala u bɛ se ka bɔ ka o baara kɛ ni weleweledalaw ye minnu bɛ se kosɛbɛ waajuli la.
3 Nouvelles du Royaume No. 37 sɛbɛndenninw hakɛ dɔ bɛna ci jɛkulu bɛɛ ma, walisa weleweledalaw ni tutigɛbagaw kelen-kelen bɛɛ ka se ka a den 50 ɲɔgɔn sɔrɔ, o y’a dɔgɔyalenba ye. Kibaru duman ka di mɔgɔ minnu ye, ni u tɛ weleweledalaw ye fɔlɔ, olu bɛna den duuru sɔrɔ walisa u ka o tila u ka sokɔnɔmɔgɔ ni u teriw cɛ. An kelen-kelen bɛɛ ye Nouvelles du Royaume No. 37 hakɛ min di mɔgɔw ma, an ka kan ka o hakɛ jɔnjɔn sɛbɛn an ka waajuli baara dantigɛli sɛbɛnw kɔkanna na, Ɔkutɔburukalo ni Nowanburukalo la. Jɛkulu kɔnɔmɔgɔw ye Nouvelles du Royaume No. 37 hakɛ min di mɔgɔw ma, jɛkulu sɛbɛnnikɛla ka kan ka o hakɛ bɛɛ fara ɲɔgɔn kan ka o ci Tɔn bolofara ma ni kalo kelen-kelen bɛɛ sara. Nouvelles du Royaume No. 37 tɔ minnu bɛna to baara kɛrɛnkɛrɛnnen banni kɔfɛ, baara bɛ se ka kɛ ni olu ye cidenyabaara kɔnɔko dɔ la.
4 An bɛ se ka min fɔ: I ka sɛbɛn jiracogo surunya. O bɛna a to cikan ka jɛnsɛn kosɛbɛ. I bɛ se k’a fɔ ko: “Ne fana bɛ ka cikan nafama dɔ de jɛnsɛn, min bɛ bɛɛ nafa, n’o bɛ ka kɛ diɲɛ yɔrɔ bɛɛ la. Nin ye e yɛrɛ ta ye. Waribɔ t’a la. An b’a ɲini i fɛ i k’a kalan.” N’i bɛ taa bɔ mɔgɔw ye, ni i ma waajuli bɔrɛ ta i yɛrɛ bolo o bɛ se ka fisaya. Mɔgɔ minnu y’a jira ko kibaru duman ka di u ye, i jija ka olu tɔgɔw ni u ka ladɛrɛsi sɛbɛn.
5 Aw ka waajulikɛyɔrɔ bɛɛ bɛ se ka baara ka ban cogo min na: Sanni i ka Nouvelles du Royaume No. 37 tila-tila nbɛdaw la, i ka baara ɲɛsin a tilatilali ma du-ni-du ani jagokɛyɔrɔw la. I ma mɔgɔ minnu sɔrɔ u ka so, i jija ka segin ka taa bɔ o mɔgɔw ye waati wɛrɛ la, walima don wɛrɛ la, o dɔgɔkun kɔnɔna na. K’a daminɛ Ntɛnɛndon, Nowanburukalo tile 6, an ma mɔgɔ minnu sɔrɔ u ka so, Nouvelles du Royaume No. 37 den kelen bɛ se ka bila olu ka sow kɔnɔ. O bɛɛ n’a ta, ni jɛkulu ka waajulikɛyɔrɔ ka bon fo a yɔrɔ bɛɛ tɛ se ka kɛ waati latigɛlen kɔnɔ, maakɔrɔw bɛ se k’a latigɛ Nouvelles du Royaume No. 37 ka bila mɔgɔw ka sow, an ma mɔgɔ minnu sɔrɔ u ka so, baara kɛrɛnkɛrɛnnen kɔnɔna na.
6 “Babilonɛba” halakituma bɛ ka surunya teliya la. Mɔgɔw ka kan ka bɔ a kɔnɔ sanni a ka halaki bɔgɔbɔgɔ. (Jir. 14:8; 18:8) I ka fɛɛrɛw tigɛ kabini sisan walisa ka se ka i sen don yɛrɛ de nin baara kɛrɛnkɛrɛnnen na min bɛna kɛ diɲɛ yɔrɔ bɛɛ la, walisa mɔgɔ bɛɛ k’a dɔn ko diinɛ nkalonma laban sera.