Tɔn bolofara ka lɛtɛrɛ

Masaya weleweledala kanulenw:

Aw ye baara ɲuman min kɛ Ala-ka-Marako san tɛmɛnen na, an b’a fɛ k’aw fo o la. Nisɔndiyako don k’a ye ko mɔgɔ caman dusukun y’u bila ka dɔ fara u ka waajuli baara kan Hakilijigin waati la! Marisikalo la Gine Bisawo jamana na, lɛrɛ hakɛ min kɛra weleweledali la, n’i ye o tila weleweledalaw cɛ, i b’a sɔrɔ weleweledala kelen-kelen bɛɛ ye lɛrɛ 19,4 sɔrɔ. Senegali weleweledalaw kelen-kelen ye lɛrɛ 13,6 sɔrɔ. Awirilikalo la, Ganbi jamana na, hakɛ 4 sɔrɔla minnu ɲɔgɔn tun ma deli ka sɔrɔ ban: dɔ farala weleweledalaw hakɛ kan, u ka lɛrɛ kɛlenw kan, u ka segin-ka-bɔnyew hakɛ kan ani u ka Bibulu-kalanw hakɛ kan. Weleweledalaw hakɛ kɛra 184 ye. U ye lɛrɛ 6 083 kɛ, ka segin-ka-bɔnyew 2 477 kɛ, ani ka Bibulu-kalanw 409 ɲɛminɛ.

Siga t’a la ko waati min kɛra seereya baara la, o de y’a to mɔgɔ caman nana Hakilijigin na. Mɔgɔ minnu nana lajɛw la jamana bɛɛ la minnu bɛ Senegali tɔn bolofara ka bolo kan, olu bɛɛ hakɛ ye mɔgɔ 4 884 ye. O b’a jira ko an bɛ Bibulu kalan kɛ mɔgɔ minnu kun, olu caman nana Yesu Krisita an Matigi ka saya hakilijigin kɛ ni an ye. O bɛɛ n’a ta, u caman mago bɛ dɛmɛ na hali sa walisa k’a faamu ka ɲɛ, a kɔrɔ ye min ye ka kɛ Krisita ka kalanden ye. Yala an bɛna se ka waati boloda o kama sanni nin “kow sigicogo” ka ban wa?

An bɛ Jehowa waleɲumandɔn, ale min b’an labɛn “kɛwale ɲumanw” bɛɛ kama. (2 Tim. 3:​17) Salon, Ala-ka-marako san kɔnɔna na, tutigɛbaga caman ye Tutigɛbagaya Baara Lakɔli kɛ walisa u ‘taama cogow walima u ka ko kɛcogo Krisita la,’ olu ka kuraya. (1 Kɔr. 4:​17). Maakɔrɔw ni cidenyabaara magannaw 300 ni kɔ fana ye nafa sɔrɔ ka bɔ Masaya Cidenyabaara lakɔli la. Siga t’a la ko o fɛɛrɛ tigɛlenw ka kan ka dɔ fara baara barika kan Ala-ka-marako san kura kɔnɔna na!

An bɛ dusu don aw kɔnɔ aw ka to Jehowa ka baara la ani aw ka o baara to jɔyɔrɔ fɔlɔ la aw ka ɲɛnamaya kɔnɔ. Bonya don an bolo, anw ni aw ka jɛ ka nin baara kɛ ɲɔgɔn fɛ, baara min bɛ ɲɛnamaya di.

Aw balimakɛw

Senegali Tɔn Bolofara