Masaya weleweledala kanulenw:

Dawuda y’a fɔ ko: “Ne na barika da Matigi ye ni ne dusukun bɛɛ ye.” (Zab. 9:2) O de ye an fana ŋaniya ye tigitigi. An b’a dɔn ko o de ye aw bɛɛ ŋaniya ye, aw minnu ye Masaya weleweledalaw ye, bawo aw ye o de jira aw ka baara kɛlen fɛ k’a ta Sɛtanburukalo san 2007 ka n’a bila Utikalo san 2008 la. Aw ye baara minnu kɛ, nisɔndiyako don an bolo ka kuma olu kan sisan. An ye min ye, o y’an kabakoya kosɛbɛ. Aw caman na, a kɛra weleweledalaw ye walima tutigɛbagaw ye. Aw ye waati caman de kɛ kibaru duman waajuli la.

Hakilijigin kɛra kalo min na, Senegali ye lɛrɛ 32.064 kɛ, ani Ganbi ye lɛrɛ 5.937 kɛ. O b’a jira ko lɛrɛ hakɛ min kɛra salon, dɔ farala o hakɛ kan ni 5 ye kɛmɛsarada la Senegali, ani ni 7 ye kɛmɛsarada la Ganbi. Siga t’a la ko o de y’a to mɔgɔ minnu nana Hakilijigin na, olu cayara ka se hakɛ ma min ɲɔgɔn tun ma sɔrɔ fɔlɔ, bawo Senegali, u kɛra mɔgɔ 2.815 ye ani Ganbi, u kɛra mɔgɔ 571 ye. Hakilijigin kalo la, tutigɛbaga basigilenw ni tutigɛbaga farankanw sera hakɛ la min ɲɔgɔn tun ma sɔrɔ fɔlɔ. Gine Bisawo y’a jira k’u kɛra mɔgɔ 37 ye ani Mali y’a jira k’u kɛra mɔgɔ 54 ye.

Mɔgɔ caman sɔnna aw ka dɛmɛ na, k’a da aw ka cɛsiri kɛlen kan. Mɛkalo la, Bibulukalan sera hakɛ la min ɲɔgɔn tun ma sɔrɔ fɔlɔ. U kɛra mɔgɔ 2.105 ye Senegali ani ni mɔgɔ 433 ye Ganbi. K’a ye ko mɔgɔ minnu ye u yɛrɛbakun di Jehowa ma, ka batise, olu bɛ ka caya ka taa a fɛ, o ye nisɔndiyako ye. K’a ta Sɛtanburukalo san 2007 ka n’a bila Utikalo san 2008 la, o waati kɔnɔna na, mɔgɔ 15 batisera Gine Bisawo. O b’a jira ko mɔgɔ hakɛ minnu batisera salon, dɔ farala o hakɛ kan ni 50 ye kɛmɛsarada la. An balimakɛw ni an balimamuso minnu fana batisera Mali la, olu hakɛ kɛra mɔgɔ 20 ye. O b’a jira ko dɔ farala o hakɛ kan ni 43 ye kɛmɛsarada la. Aw ye o baara bɛɛ lajɛlen minnu kɛ nin ye, o y’a ka kanuya jira ka jɛya, kanuya min bɛ aw la ka ɲɛsin Jehowa ma, ka aw ŋaniya fana jira, ŋaniya min bɛ aw la tiɲɛ na ka mɔgɔ wɛrɛw dɛmɛ u ka fara an kan ka Jehowa tɔgɔ tanu.

An b’a dɔn ko aw bɛɛ bolo degunnen don kosɛbɛ. Ikomi aw bolo degunnen don kosɛbɛ an Fa ɲuman ka baara la, o ka kɛ sababu ye ka nisɔndiyaba lase aw ma tuma bɛɛ.

An b’an ka kanuya lase aw bɛɛ lajɛlen ma.

Aw balimakɛw,

Senegali Tɔn bolofara baarakɛda