Kafo ka jamalajɛ kalan bolodalen kura

Diɲɛ b’a fɛ an ka da a la ko nin diɲɛ kow sigicogoya bɛna to kudayi. Nka, Ala ka kuma bɛ min fɔ an ye o ni o tɛ kelen ye. (1 Yuh. 2:15-17) A b’an dɛmɛ k’a faamu ko ka “nafolo lajɛ k’a mara an yɛrɛw ye nin diɲɛ la yan,” o ye ka boli fɛn fu nɔfɛ. Walisa ka barika don Ala ka jamakulu la, kafo ka jamalajɛ kalan min bɛna kɛ san 2007 Ala-ka-marako kɔnɔna na, o jamalajɛ tɔgɔ ye nin ye: “A’ ye nafolo lajɛ aw yɛrɛw ye sankolo la.”—Mat. 6:19, 20.

Efesekaw 2:2 bɛ kuma fɛn min kan iko “fiɲɛ fanga kuntigi cogo . . . ni min bɛ baara kɛ kan bilali denw kɔnɔ sisan,” o fɛn dɔ ye nafolomafɛnɲini miiriya ye. Min bɛ wele ko diɲɛ hakili, o donnen bɛ nin diɲɛ kow sigicogo bɛɛ la iko fiɲɛ sɛbɛ-sɛbɛ bɛ yɔrɔ bɛɛ la cogo min na, ni a labilalen bɛ mɔgɔ bɛɛ k’a sama. (1 Kɔr. 2:12) Ikomi se min b’a ye, o ka bon kosɛbɛ, a bɛ fɔ a ma ko “kuntigi.” Kafo ka jamalajɛ kalan bolodalen kura bɛna an dɛmɛ ka an yɛrɛ tanga diɲɛ ka nafolomafɛnɲini miiriya ma. A bɛna an dɛmɛ walisa fɛn minnu nafa ka bon kosɛbɛ ni a tɔw bɛɛ ye, olu ka to an hakili la cogo jɛlen na. (Mat. 6:33) Ka fara o kan, kalan bolodalen bɛna an dɛmɛ ka an jigi da Jehowa kan ni an bɛ ka an ka cidenyabaara kɛ hali ni an bɛ degunw ni kɔrɔbɔliw la.

An k’a latigɛ ka ye jamalajɛ kɛnɛ kan tile fila bɛɛ la, k’an “janto . . . kosɛbɛ” fana. (Heb. 2:1) An b’a fɛ ka yɔrɔ minnu waleya an ka diɲɛnatigɛ kɔnɔ ani an ka cidenyabaara la, an ka olu sɛbɛn. Ni an yera jamalajɛ kɛnɛ kan k’a ta kalan bolodalen nafama in daminɛ yɛrɛ-yɛrɛ la fo ka na se a laban na, k’a sɔrɔ an ma a yɔrɔ si jɛ, an bɛna dusu ni fanga sɔrɔ ka nafolo lajɛ an yɛrɛw ye sankolo la ka taa a fɛ.