Ala-ka-Marako Cidenyabaara Kalanso Dalafɔ-Seginnkanni

Ɲininkali ninnu jaabi bɛna kɛ dalafɔ ye Ala-ka-Marako Cidenyabaara kalanso ka lajɛ la, o min bɛna kɛ Utikalo tile 28 dɔgɔkun kɔnɔna na, san 2006. Kalan lakɔlɔsibaga bɛna seginnkanni ɲɛminɛ sanga 30 kɔnɔ. O seginnkanni bɛna sinsin kalanw kan minnu kɛra k’a ta Zuluyekalo tile 3 ka na a bila Utikalo tile 28nan na, san 2006. [Kɔlɔsili: Ni ɲininkali dɔ kɔ fɛ, sinsin yɔrɔ ma fɔ, i ajibiyalen bɛ ka i yɛrɛ ka ɲininiw kɛ walisa ka jaabiw sɔrɔ.—École du ministère mafilɛ ɲ. 36-7.]

JƐMU KƐCOGO ƝUMANW

1. Ka mɔgɔw ɲɛda lajɛ n’an bɛ kuma ni u ye, o b’an dɛmɛ cogo jumɛn na ka kɛ karamɔgɔ ɲumanw ye? (Mat. 19:25, 26; Kɛw. 14:9, 10) [be ɲ. 124 d. 3–ɲ. 125 d. 2] Ni an bɛ mɔgɔw ɲɛda lajɛ lajɛcogo bɛnnen na, o b’a jira ko an bɛ an mago kɛrɛnkɛrɛnnen don u la, ani ko fɛn nafama b’an fɛ k’a fɔ u ye. An bɛ yɛlɛmisɛnnin min kɛ k’u kunbɛn, o bɛ se ka an lamɛnbagaw hakili latigɛ an ko la, ka u lafiya. An bɛ kuma mɔgɔ minnu fɛ, ka olu ɲɛ lajɛ, o bɛ se k’a jira an na baro ka kan ka taa ɲɛ cogo min na.

2. Mun na ni an bɛ kuma lafiya la k’a sɔrɔ an degunen tɛ o nafa ka bon? Mun bɛ se k’an dɛmɛ k’a kɛ o cogo la ni an bɛ ka foro cidenyabaara kɛ? [be ɲ. 128 d. 1-5, sɛbɛnni minnu bɛ yɔrɔ bulama na i numankuru fɛ] O bɛ mɔgɔw bila u ka da an na. Ni an degunen bɛ kuma walima ni an yɛrɛ lafiyalen tɛ kuma na, o bɛ mɔgɔw hakili ta ka bɔ an ka kuma kan. Fɛn damadɔ minnu b’an dɛmɛ walisa an kana jɔrɔ ani an bɛ kuma ni lafiya ye ka taa a fɛ k’a sɔrɔ an ma degun, olu filɛ:(1) An k’an labɛn koɲuman, (2) an ka delili kɛ ni an dusukun bɛɛ ye, (3) an ka miiri ko Jehowa makarila ka ɲɛnamaya banbali jigiya di bɛɛ ma, (4) an ka an hakili to a la ko mɔgɔw hɔrɔnyalen don k’a latigɛ min ka di u ye, ko u bɛ se ka sɔn walima ka ban cikan ma, (5) an ka an hakili to a la ko an ka baara ye dɔrɔn ka waajuli de kɛ.

3. Mun na an ka kan k’an janto an ka saniya la? [be ɲ. 131 d. 1-3] Ka kɛ mɔgɔw ye minnu saniyalen bɛ, ani mɔgɔw ye minnu labɛncogo bɛnnen bɛ, o bɛ nɔɔrɔ da Ala kan, ka mɔgɔw bila u ka miiri ɲuman ta ka ɲɛsin a ka jamakulu ma. (1 Kɔr. 10:31) Ni an fari saniyalen bɛ ani ni an ka fini jɛlenw don, a ka c’a la mɔgɔw b’a dɔn ko an bɛ bonya da an yɛrɛ kan, wa o b’a to fana u ka teliya ka an lamɛn.

4. Ni an bɛ ko kɛ ni hakili ye, ani an ka kow bɛrɛ bɛnnen don, o bɛ nɔ bila cogo jumɛn na an ka finidoncogo ni an kun dilancogo la? (1 Tim. 2:9) [be ɲ. 131 d. 4–ɲ. 132 d. 1] Mɔgɔ min ka ko bɛrɛ bɛnnen bɛ, o tigi bɛ hami walisa a kana don mɔgɔ wɛrɛw gasi la fu. Ni an bɛ ko kɛ ni hakili ye, o bɛna an dɛmɛ an ka an jan to an yecogo la ani ka an yɛrɛ tanga finidoncogo ni kundilancogo ma minnu dama tɛmɛnen don. A kɛra ko an bɛ lakoliso de la, walima ko an bɛ an ka baarakɛyɔrɔ de la, walima ko an bɛ waajuli de la, an labɛncogo ɲuman ka kan k’a jira tuma bɛɛ ko Ala bɛ min fɔ o ko la, an tugulen bɛ o kɔ.

5. An ka kan ka tugu Bibulu sariyakolo jumɛnw kɔ walisa an yecogo kana a jira ko an bɛ diɲɛ kanu? [be ɲ. 133 d. 1-2] Yuhana ka kitabu fɔlɔ 2:​15-​17 b’a fɔ an ye ko an kana diɲɛ kanu, an kana diɲɛ kɔnɔfɛnw kanu. An ye Jehowa ka baarakɛlaw ye minkɛ, an bɛ an ban Sitanɛ ka diɲɛ finidoncogo la o min tɛ kretiɛnya sira yɛ. Efesekaw 2:2 b’a jira an na ko kanbilali miiriya bɛ nin diɲɛjugu kɔnɔ. Kuntigiya sɔsɔli bɛ ye tuma caman na bi mɔgɔw yecogo fɛ, u ka finidoncogo labilalen na min bɛ u farikolo cogoyaw da kɛnɛ kan, u t’u kun labɛn ka ɲɛ, ani u ka fini dontaw bɛrɛkɛɲɛnen tɛ. Sanni an ka tugu diɲɛ kɔ, an bɛ Kretiɛn mɔlenw ka misali to u ka nɔ bila an ka finidoncogo ni an kundilancogo la. (1 Tim. 4:​12; 1 Pet. 5:​2, 3)

KALANSEN FƆLƆ

6. Nafa bɛɛ la belebele jumɛn bɛ sɔrɔ kalanjɛ la? [be ɲ. 21 d. 3] Kalanjɛ b’a to an bɛ “Ala dɔnniya sɔrɔ.” (Nt. 2:5) An bɛ baara kɛ Ala ye sira minnu fɛ, olu caman tɛ se ka kɛ ni an tɛ se kalanjɛ la. An bɛ kalanjɛ kɛ cogo min na, o bɛ nɔ bila an ka foro cidenyabaara kɛcogo ɲuman na kosɛbɛ. Kalanjɛ sen bɛ baaraw labɛnni na fana alako ta fan fɛ.

7. Mun b’a jira ko mɔgɔ dɔ ye hakilima ye walima ko mɔgɔ dɔ ye hakilintan ye? (Nt. 14:2) [w04 15/11 ɲ. 26 d. 5] Mɔgɔ tilennen bɛ siran Ala lakika ɲɛ, wa, “Matigi [Jehowa] ɲɛsiran ye hakilitigiya daminɛ ye.” (Zab. 111:10) Mɔgɔ min ye hakilitigi ye tiɲɛ na, o tigi b’a dɔn ko min wajibiyalen bɛ ale kan, o ye “ka siran Ala ɲɛ ka a ka ci fɔlenw mara.” (Waaj. 12:15) Hakilintan tɛ tugu tilennenya kɔ iko Ala bɛ a fɛ cogo min na. A ka sira dulenw bɛ.

8. Mun na “dɔnniya sɔrɔ man gɛlɛn faamulitigi fɛ”, walima hakilidumantigi ma ? (Nt. 14:6) [w04 15/11 ɲ. 28 d. 4-5] Hakilidiya ye ka se ka barokun dɔ yɔrɔw tugu ɲɔgɔn na walisa i ka se k’a ye a barokun mumɛ bɛ cogo min na, i tɛ dan a fan dɔw yeli ma. Ka kalan kɛ ani ka i hakili to detayi kuraw la, o ka nɔgɔn hakilidumantigi bolo bawo a b’a ye o detayi kuraw ni Ala kuntilenna sirilen bɛ ɲɔgɔn na cogo min na, o min ɲɛsinnen bɛ hadamadenw ni dugukolo ma.

9. Mun ye kalan ye? [be ɲ. 27 d. 3] Kalan tɛ dan kalanjɛ gansan dɔrɔn ma. Ka baara kɛ ni i hakili ye koɲuman walima ka barokun dɔ sɛbɛkɔrɔ sɛgɛsɛgɛ, o sen bɛ kalan na. I bɛ ka min kalan, ani i bɛ min dɔn kaban, k’olu sanga ɲɔgɔn ma, k’u sɛgɛsɛgɛ kosɛbɛ, ani ka jateminɛ kɛ kunw kan minnu dira walisa k’o kumaw kɔkɔrɔdon.

10. Jehowa ye fɛn minnu da, ni an bɛ an hakili jakabɔ olu kan, o bɛ nɔ bila an na cogo di? [w04 15/11 ɲ. 8 d. 4] Hakilijakabɔ bɛ nɔ bila an na sira saba fɛ, a dɔgɔyalenba: A bɛ se ka (1) an hakili jigin ko an ka kan ka ɲɛnamaya kanu, (2) k’an bila ka mɔgɔ wɛrɛw dɛmɛ u ka dɔnniya sɔrɔ fɛn dalenw sababu fɛ, ani (3) ka an bila an ka a ɲini ka an Dabaga dɔn, ka a ka ko bonya an bolo kosɛbɛ tuguni.

DƆGƆKUN KƆNƆ BIBULUKALAN

11. Fɔlɔfɔlɔ la, Jehowa ‘ye ci di’ cogo jumɛn na, ni o kɛra sababu ye “muso minnu bɛ . . . kibaru [duman] welewele da” olu ka kɛ jamaba ye? O bɛ ka waleya cogo di bi? (Zab. 68:12) Jehowa y’a fɔ walima a ye ci di Israɛl denwcɛw ma u ka u juguw kɛlɛ, ka se sɔrɔ u kan. O jugu ninnu tun ye siyaw ye minnu bɛ dugukolo kofɔlen kan. Israɛl denw selen u juguw la, Israɛl musow tun bɛ o sesɔrɔlikow kibaru duman weleweleda sesɔrɔ ɲɛnajɛw waati. Sesɔrɔli minnu kɛra bato hukumu kɔnɔ i n’a fɔ Sitanɛ kɛrunna dugukolo kan, ka Jehowa ka kuma tiimɛ o cogo la, bi fana, musow bɛ o fɛnw bɛɛ lajɛlen kibaru duman fɔ. Ka kɛnyɛ ni Ala ka Kuma ye, Kretiɛnmusow bɛ weleweledali kɛ jamanaw kɔnɔ fana ko, yan ni dɔɔnin cɛ, Masiya ani Masaya kuntigi, n’o ye Yesu Krista ye, o bɛna se sɔrɔ jamanaw kan. [Zul. 3, w86 15/10 ɲ. 30]

12. Mun y’a to dɔɔnin Asaf tun bɛ tilennenya sira bila? A hakili nana tilen cogo di? (Zab. 73:2, 3, 17) Hali ni Asaf tun bɛ Jehowa ka ɲumanya dɔn, a ɲɛbɔra mɔgɔ tilenbali yɛrɛjiranci ka nafolow nɔfɛ. O de y’a to a sigara ni nafa b’a la tiɲɛ na mɔgɔ ka tugu tilennenya kɔ a ka ɲɛnamaya kɔnɔ. (Zab. 73:​1, 13) Nka, a donnen Ala ka yɔrɔ senuma kɔnɔ tuma min na, ani a kɛlen ka taasi a batokɛɲɔgɔnw cɛma, a hakili tilenna. Bi fana, ni an fana kɔnɔnafilila ka mɔgɔjugu yiriwalen ye, an bɛ se k’a ɲini ka an ka ɲininkaliw jaabiw sɔrɔ ni an bɛ an fara Ala ka mɔgɔw kan bato la. [Zul 10, w93 15/7 ɲ. 28 d. 3, 5; ɲ. 30 d. 1]

13. Mun na “manɛ” min dira Israɛl denw ma, o welela ko “sankolola ɲɔ” ani “setigiw ka nbuuru”? (Zab. 78:24, 25, NW) Manɛ bɔyɔrɔ tun ye sankolo ye, k’a da kan Jehowa yɛrɛ de ka ko latigɛlen don. (Zab. 105:40) “Setigiw” bɛ se ka kɛ mɛlɛkɛw ye Jehowa ye minnu bila ka manɛ kabakoya di. (Zab. 103:20) [Zul. 17, w06 15/7 “la Parole de Jéhovah est vivante : Points marquants des Psaumes — livre troisième et quatrième”]

14. “Kɔrɔtalenba ka dogo yɔrɔ,” ye mun ye? An bɛ se ka “lafiya” o yɔrɔ la cogo di? (Zab. 91:1, 2) “Dogo yɔrɔ” tɛ dogo yɔrɔ ye a kɔrɔjɛ la. A bɛ lakana de jira, an bɛ min kɔnɔ, n’o b’a to kojugu t’an sɔrɔ min bɛ se ka an ni Jehowa cɛ tiɲɛ. O ye alako ta fan fɛ alijinɛ de ye. O yɔrɔ dogolen don bawo a dɔnnen tɛ mɔgɔw fɛ minnu dalen tɛ Ala la. An bɛ Kɔrɔtalenba kɛ an ‘lafiyayɔrɔ ye,’ an kɛtɔ ka an jigi da ale kan iko an “jigi dayɔrɔ” ani an “kɛlɛ kunbɛn so,” ka a tanu iko dunuya bɛɛ Kuntigi ni a Masaba, ka a ka Masaya kibaru duman waajuli kɛ. [Zul. 31, w06 15/7 “la Parole de Jéhovah est vivante : Points marquants des Psaumes — livre troisième et quatrième”]

15. Sira jumɛn fɛ Jehowa ka kantigiw ka saya ye fɛnba ye a ɲɛ kɔrɔ? (Zab. 116:15) Jehowa batobaga kantigiw kuuru bɛɛ ka saya ye fɛn sɔngɔn gɛlɛn a bolo kosɛbɛ, fo a hakɛ tɛ se k’a fɔ, o sɔngɔ ka gɛlɛn fo Jehowa tɛna a to o ka kɛ. (Zab. 116:8) Ni a ka kan k’a to o ka kɛ, o sɔngɔ bɛna gɛlɛya ale yɛrɛ ma, n’o ye k’a bɔnɛ a tɔgɔ la, ko a ye sebagayabɛɛtigi ye ani ko a bɛ se ka a ka kantigiw kisi. Ka fara o kan mɔgɔ si tɛna to dugukolo kan walisa ka diɲɛ kura jujɔ. [Uti. 28, w06 1/9 “la Parole de Jéhovah est vivante : Points marquants des Psaumes — livre cinqième”]