Kuntilenna minnu b’i la alako ta fan fɛ, i bɛ se k’olu sɔrɔ cogo min na
1 I ye denmisɛn ye, wa siga t’a la k’i b’a fɛ ka fɛn dɔw kɛ i ka ɲɛnamaya kɔnɔ. Nka, ikomi i bɛ Jehowa kanu ani Yesu y’a fɔ Kerecɛnw bɛɛ ye, k’u ka “masaya . . . ɲini fɔlɔ,” i bɛna olu jateminɛ i kuntilennaw la. (Mat. 6:33) A bɛ se ka kɛ ko i kuntilenna ye ka dɔ fara i ka cidenyabaara kan. O la sa, i bɛ kɛ tutigɛbaga ye, walima i bɛ taa yɔrɔ la min mago bɛ masaya weleweledalaw la. A bɛ se ka kɛ fana ko dɔw b’a fɛ ka baara kɛ Tɔn bolofara la, walima ka kɛ tutigɛbaga kɛrɛnkɛrɛnnen ye walima a bɛ se ka kɛ yɔrɔ min na, ka Masaya ka sojɔbaaraw kɛ jamanaw ni ɲɔgɔn cɛ, walima ka lajɛkɛyɔrɔw jɔlibaara kɛ. Nin kuntilennaw bɛɛ ye fɛnw ye minnu bɛ mɔgɔ wasa. U bɛɛ ka kan ni tanuli ye.
2 Fɛn min bɛna i dɛmɛ ka i kuntilennaw sɔrɔ alako ta fan fɛ, o ye ka o kuntilennaw sɛbɛn. San 2004 Zuluyekalo tile 15 La Tour de Garde ka fɔ la, ko min jɛlen tɛ hakili la, o bɛ kɛ ko jɛlen ni ko kɛta ye, ni i ye daɲɛw sɔrɔ ka o ɲɛfɔ. O la sa, i b’a fɛ ka kuntilenna minnu sɔrɔ, ani i bɛ se ka fɛɛrɛ minnu tigɛ walisa ka o kuntilennaw sɔrɔ, i ka olu bɛɛ sɛbɛn papiye kan. Ka fara o kan, sanni i ka se ka o kuntilenna kuntaala janw sɔrɔ, i bɛ se ka kuntilenna wɛrɛw sigi o kuntilennaw kɔnɔ minnu bɛna i dɛmɛ k’a dɔn ni i bɛ ka ɲɛtaa sɔrɔ. O bɛna i dɛmɛ i ka to kuntilenna kuntaala jan kɔnɔ.
3 Kuntilenna kuntaala surunw: Ni i ma batise fɔlɔ, a lajɛ i bɛ se ka min kɛ walisa ka o kuntilenna sɔrɔ. A bɛ se ka kɛ k’i mago b’a la ka Bibulu kalansira kolomaw faamuya koɲuman. O la sa, a kɛ i kuntilenna ye ka Qu’enseigne réellement la Bible ? gafe kalan k’o ban pewu. Bibulu tɛmɛsira kofɔlen minnu b’a kɔnɔ, i ka olu bɛɛ lajɛ. (1 Tim. 4:15) A kɛ i kuntilenna ye fana ka Bibulu kuuru bɛɛ kalan, k’a ta Jenɛse kitabu la ka na bila Jirali kitabu la, iko o wajibiyalen bɛ cogo min na Bɛtɛl kɔnɔmɔgɔw ni Gilead kalandenw ma. O kɔfɛ, i k’a boloda ka Bibulu kalan don o don, wa i kana o dabila. (Zab. 1:2, 3) O kɛli bɛna i dɛmɛ cogo min na i ka ɲɛtaa sɔrɔ alako ta fan fɛ, e ka miiri o la. N’i bɛna Bibulu kalan tuma o tuma, walima n’i bɛna fɛn o fɛn kalan min sinsinnen bɛ Bibulu kan, o daminɛ ani o laban ni delili ye min bɛ bɔ i dusukun na. I bɛ min kalan, i k’a ɲini tuma bɛɛ ka o sirataama fana i ka ɲɛnamaya kɔnɔ.—Yak. 1:25.
4 N’i batiselen don kaban, i bɛ se ka tugu kuntilenna jumɛn wɛrɛw kɔ? Yala i ka kan ka dɔ fara i seko kan waajuli la wa? Misali la, ka baara kɛ ka ɲɛ ni Ala ka kuma ye foro cidenyabaara la, yala i bɛ se k’o kɛ i kuntilenna ye wa? (2 Tim. 2:15) I bɛ se ka dɔ fara i ka cidenyabaara kan cogo jumɛn na? I ka kuntilenna kuntaala surun kɛrɛnkɛrɛnnenw sigi, minnu bɛ bɛn i si hakɛ ni i ka kow ma, ani minnu bɛna i dɛmɛ k’i ka kuntilenna kuntaala jan sɔrɔ.
5 Mɔgɔ min ye a ka kuntilenna sɔrɔ: Toni tun si ye san 19 ye tuma min na, a taara Jehowa Seerew ka Tɔn bolofara dɔ lajɛ. Bɛtɛl baara nege donna a la. Nka a ka ɲɛnamaya kɛcogo tun bɛnnen tɛ. A tun ma a yɛrɛbakun di Ala ma fɔlɔ. Toni y’a latigɛ ka a ka ɲɛnamaya kɛ ka bɛn Jehowa ka siraw ma, ka batiseli kɛ a kuntilenna ye. A batisera tuma min na, a ye tutigɛbaga farankanya kɛ a kuntilenna ye, ani o kɔfɛ tutigɛbaga basigilenya. A tun b’a fɛ ka tutigɛbagaya daminɛ tuma min na, a ye o sɛbɛn a ka kalandiriye kan. A ye tutigɛbagaya daminɛ ka waati kɛ o la tuma min na, o kɔfɛ u y’a wele a ka taa baara kɛ Bɛtɛl la. E k’a miiri a ye nisɔndiya min sɔrɔ o la.
6 E fana bɛ se k’i kuntilenna sɔrɔ, n’i bɛ Masaya nafaw ɲini fɔlɔ. I ka Jehowa deli k’i ka “koɲɛw” kalifa a la, ani i sɛbɛkɔrɔ-jija ka olu ɲɛnabɔ.—Nt. 16:3; 21:5.
[Study Questions]
1. Kerecɛn denmisɛn caman kuntilenna ye mun ye?
2. Mun bɛ se k’i dɛmɛ ka i kuntilennaw sɔrɔ?
3. I bɛ se ka kuntilenna kuntaala surun minnu sɔrɔ, ni olu bɛ i dɛmɛ ka batise, olu dɔw fɔ.
4. Kretiɛn min b’a fɛ ka kɛ Bɛtɛl baarakɛla walima ka kɛ tutigɛbaga kɛrɛnkɛrɛnnen ye, o kretiɛn bɛ se ka kuntilenna kuntaala surun jumɛnw sigi a yɛrɛ ye walisa ka o kuntilenna sɔrɔ?
5. An balimakɛ dɔ kɛlen ka kuntilenna kuntaala surunw sigi, o y’a dɛmɛ cogo di ka taa baara kɛ Bɛtɛl la?
6. Mun bɛ se k’i dɛmɛ k’i kuntilennaw sɔrɔ alako ta fan fɛ?