Ala-ka-Marako Kalanso Dafalfɔ-Seginnkanni
Ɲininkali ninnu jaabi bɛna kɛ dalafɔ ye Ala-ka-Marako Cidenyabaara kalanso ka lajɛ la, o min bɛna kɛ Zuwɛnkalo tile 26 dɔgɔkun kɔnɔna na, san 2006. Kalan lakɔlɔsibaga bɛna seginnkanni ɲɛminɛ sanga 30 kɔnɔ. O seginnkanni bɛna sinsin kalanw kan minnu kɛra k’a ta Mɛkalo tile 1 ka na bila Zuwɛnkalo tile 26, san 2006. [Kɔlɔsili: Ni ɲininkali dɔ kɔfɛ, sinsin yɔrɔ ma fɔ, i wajibiyalen bɛ ka i yɛrɛ ka ɲininiw kɛ walisa ka jaabiw sɔrɔ.—École du ministère mafilɛ ɲ. 36-7.]
JƐMU KƐCOGO ƝUMANW
1. Tubabukan b’a fɔ min ma ko modulation o ye mun ye ani mun na o nafa ka bon? [be ɲ. 111, sɛbɛnni minnu bɛ yɔrɔ bulalamaw kɔnɔ] N’a fɔra Modulation tubabukan na, o ye ka i kanbɔcogo yɛlɛma; k’i ka kuma teliya walima k’a sumaya ani ka baara kɛ n’i kan kɔrɔtacogo ye. A jɔyɔrɔ ka bon kosɛbɛ kuma na, bawo i ka kuma bɛ don i lamɛnbagaw la, k’u bila ka wale kɛ. Ni i bɛ se “modulation” kɛcogo ɲuman na, o bɛna i lamɛnbagaw dɛmɛ u ka sɔn hakilila la min bɛ barokun kɔnɔ.
2. Ni i bɛ ka jɛmukan dɔ fɔ, i bɛ se cogo di k’i ka kuma fɔcogo teliya walima k’o sumaya? [be ɲ. 112 d. 3-ɲ. 113 d. 1, sɛbɛnni minnu bɛ yɔrɔ bulama kɔnɔ] An ka kumafɔcogo teliya ni a sumaya bɛ bɔ an ka kuma fɔta de la. O la sa, kuma teliya ni a sumaya ko ɲuman tɛ sɔrɔ furancɛ dɔrɔn donni na kan teliyaw walima kan sumayaw ni ɲɔgɔn cɛ. Misali la, tuma caman na, a ka fisa an ka kuma teliya ni an bɛ ka kuma yɔrɔ dɔw kan, minnu nafa man bon kosɛbɛ, walima ni an b’a fɛ ka mɔgɔw nisɔndiya. Nka, tuma dɔw la, an ka kan ka an ka kuma sumaya ni an bɛ ka kuma dalilu girimanw kan ani barokun yɔrɔ kolomaw ani jɛmukan yɔrɔ belebelebaw kan.
3. An bɛ ka min fɔ an ka jɛmukan kɔnɔ, an bɛ se k’a kɛ mɔgɔw ka nisɔndiya o kɔrɔ cogo di ani mun na o nafa ka bon? [be ɲ. 115 d. 1-ɲ. 116 d. 2, sɛbɛnni minnu bɛ yɔrɔ bulamanw kɔnɔ] Walisa mɔgɔw ka nisɔndiya an ka jɛmukan kɔrɔ, an man kan ka jɛmukan kunnafoniw dɔrɔn labɛn, nka an ka kan k’an dusukun fana labɛn. O kɔrɔ ye ko jɛmu ka kan ka min kɛ mɔgɔw dusukun na, o ka ye an yɛrɛ dusukun na. (Esd. 7:10) An bɛna kuma yɔrɔ min kan, ni an dalen b’a la k’o nafa ka bon kosɛbɛ, ani ko an lamɛnbagaw bɛna nafa sɔrɔ o la fana, an ka fɔta bɛ an nisɔndiya. O ye ko ye min nafa ka bon kosɛbɛ, bawo an ka nisɔndiya bɛna a kɛ an lamɛnbagaw bɛ u mago don an ka kuma na, a bɛ se fana ka u bila walekɛ la.
4. Ni an bɛ mɔgɔw kalan, mun na dusumandiya nafa ka bon, ani mun bɛ se k’an dɛmɛ k’an dusumandiya? [be ɲ. 118 d. 2-ɲ. 119 d. 5] Dusumandiya bɛ dɔ fara an ka kuma barika kan, a bɛ dɔ fara an ka kuma diya kan. Dusumandiya jɔyɔrɔ ka bon kosɛbɛ ni an b’a fɛ an ka kumaw ka don an lamɛnbagaw la, ka nɔ bila u ka ɲɛnamaya la. Mɔgɔw hinɛ tun bɛ Yesu la, ani a tun b’a fɛ ka u dɛmɛ. Ni mɔgɔw hinɛ bɛ an fana na, o bɛna an dɛmɛ ka an ka dusumandiya jira. (Mar. 1:40, 41; Luk. 8:48)
5. Ni an bɛ ka kuma mɔgɔw fɛ, n’an b’an bolow kɛ k’an yɛrɛ dɛmɛ, ani an ɲɛda kɛcogo, nafa min b’o la, o ɲɛfɔ. (Mat. 12:48, 49) [be ɲ. 121, sɛbɛnni minnu bɛ yɔrɔ bulalamaw kɔnɔ] An k’a dɔn ko hakililaw ni dusukunnataw ni miiricogo tɛ lase mɔgɔw ma kumakan dɔrɔn fɛ; o nafa ka bon. U bɛ lase bolow ani ɲɛda kɛcogo fana fɛ. Tuma caman na, an bɛ an ɲɛw, an da ani an kunkolo kɛcogow kɛ k’an sinsin kuma fɔlen kan, ani k’a jira fana an bɛ min miiri. Ni jɛmukɛbaga bɛ ka kuma, ni a tɛ baara kɛ ka ɲɛ ni a bolow ani a ɲɛda kɛcogo ye, o bɛ se ka a lamɛnbagaw bila k’a miiri ko jɛmukɛbaga ka sira tɛ a ka fɔta la.
KALANSEN FƆLƆ
6. Job ka kitabu bɛ nɔɔrɔ da Jehowa kan cogo di? Sariya tilennen minnu sigira ɲɛnamaya kama a bɛ olu sankɔrɔta cogo jumɛn na fana? [si ɲ. 100 d. 39, 41] Job ka kitabu bɛ kuma Jehowa kan iko Sebaayabɛɛtigi siɲɛ 31. Sɛbɛnniw tɔ bɛɛ lajɛlen t’a fɔ ka caya ka o bɔ. A bɛ Jehowa tanu siɲɛ caman na, a jɔyɔrɔ kɔrɔtalenba ko la, a ka hakilitigiya, a ka setigiya, a ka tilennenya, a ka dusukun ɲumanya ni a ka makari fana ko la. (Job 10:12; 36:26; 37:23) Job ka kitabu b’a jira ko Jehowa tɛ se ka jalaki; a b’a jira k’o nafa ka bon ka tɛmɛ hadamaden kisili kan. (Job 33:12) Job ka kitabu bɛ diɲɛ nafolomafɛnw negetɔya kɔn. A bɛ bolibato, jɛnɛya, yɛrɛjiranciya, tilenbaliya, nanbara ni nkalontigɛ kɔn. O fɛnw bɛɛ bɛ an mangoya Ala ye. (Job 31:5, 9, 13, 17, 24-28)
7. Mun b’a sɛmɛntiya ko Zaburu minnu b’an bolo, olu ye Zaburu yɛrɛwolow ye? [si ɲ. 103 d. 10-11] Yesu lakununnen kɔfɛ, a y’a fɔ a ka kalandenw ye ko fɛn minnu bɛɛ sɛbɛnna Zaburuw kɔnɔ ale ko la, k’o fɛnw bɛɛ ka kan ka tiimɛ. (Luk. 24:44) A y’a jira o cogo la ko Zaburuw tun ye kirayakumaw de ye. Ka fara o kan, Zaburuw ni Sɛbɛnni tɔw bɛ taa ni ɲɔgɔn ye, u tɛ ɲɔgɔn sɔsɔ. Minnu ye Gɛrɛkikan Kretiɛn Sɛbɛnniw sɛbɛn, olu ye Zaburuw kɔnɔkumaw don Kretiɛn Sɛbɛnniw kɔnɔ siɲɛ caman. (Kɛw. 13:33; Rom. 3:13)
8. Ntalenw 13:16 bɛ kuma mɔgɔ kegun min ko la, yala o ye mɔgɔ nanbaratɔ de ye wa? A ɲɛfɔ. [w04 15/7 ɲ. 28 d. 3-4] Nin tɛmɛsira kɔnɔ yan, “mɔgɔ kegun” daɲɛ kɔrɔ tɛ “nanbaratɔ.” Kegunya min ko don yan, o ye ka dɔnniya sɔrɔ, dɔnniya min bɛ sɔrɔ Sɛbɛnniw sɛgɛsɛgɛli fɛ ani min bɛ sɔrɔ ni i bɛ kow dɔn ka ɲɛ. Mɔgɔ kegun t’a ɲini k’a fɛn fɔ a kun fɛ k’a sɔrɔ o dɔnniya tɛ a la, walima a tɛ tugu mɔgɔw hakilila kɔ ten dɔrɔn. Nka hakilintan tɛ ten. Hakilintan bɛ a nɛnkun de kɛ ka hakilintanya jɛnsɛn. Nka mɔgɔ kegun bɛ kuma, a bɛ walekɛ ni hakilitigiya ye. O la sa, mɔgɔ kegun bɛ se a nɛn kɔrɔ. O b’a tanga gɛlɛyaw ma minnu bɛ sɔrɔ kuma juguw ni hakilintanya kumaw fɛ.
9. Hakili senu bɛ mɔgɔ dɛmɛ cogo jumɛn na? Ni an bɛ o kala ma, o bɛ dusu don an kɔnɔ ka mun kɛ? (Yuh. 14:25, 26,) [be ɲ. 19 d. 2-3] Hakili senu bɛ se k’an dɛmɛ an hakili ka jigin fɛn nafamaw na an ye minnu kalan ka tɛmɛ. A tɛ an hakili jigin fɛnw na an ma deli ka minnu kalan. Yesu ye kuma min fɔ ani a ye kow minnu kɛ tuma min na ale ni a ka kalandenw tun bɛ ɲɔgɔn fɛ, tuma dɔw la san tan caman o kɔfɛ, hakili senu ye kibaru duman sɛbɛnbagaw hakili jigin olu detayi caman na. O ka kan ka dusu don an kɔnɔ walisa an ka an seko bɛɛ kɛ, ka dɔnniya camanba sɔrɔ Jehowa ko la ani a sagonata ko la, ani ka mɔgɔ wɛrɛw dɛmɛ olu fana ka o ɲɔgɔn kɛ.
10. Tuma caman na ni a fɔra ko Yesu bɛ na, o kɔrɔ ye mun ye, ani Yesu tun bɛ ka kuma nali jumɛn ko la iko a fɔlen bɛ cogo min na Matiyu 16:28 la? [w04 1/3 ɲ. 16 tiiri kɛlen bɛ ka sɛbɛnni minnu lamini] Ni a fɔra ko Yesu bɛ na, kɔrɔ min bɛ o la, o ye ko a bɛ a janto hadamadenw la walima a ka kalandenw la, tuma caman na kiritigɛ kama. (Mat. 24:46, 50; 25:19, 31) Matiyu 16:28 la, Yesu tun bɛ ka kuma a ka bɛ-yan waati daminɛ de kan, a kɛra Masaya Masakɛ ye san 1914.
DƆGƆKUN KƆNƆ BIBULUKALAN
11. Job ye jaabi min di Jehowa ma Job 42:1-6 la, o bɛ se k’an kalan mun na? Job kɛlen ka Jehowa ka kuma mɛn, ani Jehowa kɛlen ka Job hakili jigin fɛnw na minnu b’ale ka setigiya jira, o ye Job dɛmɛ ka “Ala ye” walima ka tiɲɛ dɔn Ala ko la. (Job 19:26) O ye Job miiricogo latilen. Ni u ye Bibulu ta ka an ka fili jira an na, an ka kan ka teliya ka jɔ an ka fili kɔrɔ, ka an ka kow yɛlɛma. [Mɛkalo tile 1, w06 15/3 “ La Parole de Jéhovah est vivante : Points marquants du livre de Job ”]
12. Siyaw bɛ ka miiri “hakilintanya kow” jumɛn na? (Zab. 2:1, 2) O “hakilintanya kow” ye hadamaden gofɛrɛnɛmanw haminanko ye tuma bɛɛ u ka kuntigiya ka to sen na, o kana ban. O ye hakilintanyako de ye bawo siga si t’a la k’u bɛ k’o kɛ kun min na, o bɛ tiɲɛ. Yala siyaw bɛ se k’u jigi da tiɲɛ na ko u bɛ se ka ɲɛtaa sɔrɔ Jehowa ni a ka masakɛ ɲɛnatɔmɔlen kɛlɛli la wa? [Mɛkalo tile 8, w06 15/5 “ La Parole de Jéhovah est vivante : Points marquants des Psaumes — livre premier ”]
13. Jusigilan jumɛnw binna? (Zab. 11:3) O jusigilanw ye fɛnw ye hadamadenya sigilen bɛ min kan: sariyaw, ko sigicogo ani tilennenya. Ni ɲagami donna o fɛnw na, ɲagami bɛ don hadamadenya sigicogo kɔnɔ, wa, tilennenya tɛ kɛ tun. O waatiw la, “mɔgɔ tilennen” ka kan k’a ka dannaya bɛɛ da Ala de kan. (Zab. 11:4-7) [Mɛkalo tile 15, w06 15/5 “ La Parole de Jéhovah est vivante : Points marquants des Psaumes— livre premier ”]
14. Cogo jumɛn na mɔgɔ kuncɛba sara bɛ bonya? (Zab. 31:24) Sara min kofɔlen bɛ Zaburuw kɔnɔ yan, o ye ɲangili de ye. Ni mɔgɔ tilennen ye filimakow kɛ k’a sɔrɔ a ma tugu ka olu kɛ, a sara bɛ kɛ kololi ye Jehowa fɛ. Nka, mɔgɔ kuncɛba tɛ sɔn k’a kɔdon a ka sira jugu la, ka ɲuman kɛ. O kosɔn a sara bɛ bonya ni ɲangili jugumanba ye. (Nt. 11:31; 1 Pi. 4:18) [Mɛkalo tile 29, w 06 15/5 “ La Parole de Jéhovah est vivante : Points marquants des Psaumes — livre premier ”]
15. An bɛ se ka dususaalo jumɛn sɔrɔ ka bɔ Zaburuw 40 la, n’o bɛ se k’an dɛmɛ k’an ka dafabaliya ni diɲɛ ka tɔɔrɔ caman kɛlɛ? (Zab. 40:1, 2, 5, 12) Ni an b’an jigi da Jehowa kan, o bɛ se k’an dɛmɛ ka jigitiɲɛ kɛlɛ, ani ka an “bɔ halakili dingɛba” kɔnɔ ani “bɔrɔgɔ la” fana. A kɛra kojugu b’an kan wo walima an bɛ jɔrɔ an ka filiw ko la wo, o kow si tɛna se sɔrɔ an kan ni an ma ɲinɛ ko an ye dugawu minnu sɔrɔ, olu ‘ka ca kosɛbɛ fo an tɛ se k’olu jate.’ [Zuwɛnkalo tile 12, w06 15/5 “ La Parole de Jéhovah est vivante : Points marquants des Psaumes — livre premier ”]