12 Kuntilennaw

O KƆRƆ YE MUN YE?

Na fɔra ko kuntilenna, o tɛ fɛnw dɔrɔn ye i b’a fɛ minnu ka kɛ. Nka o kɔrɔ ye ka kow sigi sen kan walasa ka i ka laɲinitaw dafa, ka sɔn a ma ka ko dɔw yɛlɛma ani ka baaraba kɛ o min ye a ko jubaju yɛrɛ ye.

Kuntilenna surunw bɛ yen (olu bɛ se ka timɛ tile damadɔ walima dɔgɔkun damadɔ kɔnɔ), kuntilenna minnu man jan kosɛbɛ (olu bɛ se ka timɛ kalo damadɔ kɔnɔ) ani kuntilenna janw (olu bɛ se ka timɛ san kelen walima san caman kɔnɔ). I bɛ se ka kuntilenna fitiniw sigi walasa kuntilenna janw timɛli ka nɔgɔya.

MUN NA O NAFA KA BON?

Ka kuntilennaw dafa, o b’a to i bɛ da i yɛrɛ la, ka i ka teriyaw sinsin ani ka dɔ fara i ka nisɔndiya kan.

Ka da i yɛrɛ la: Ni i ye kuntilenna fitiniw sigi ani ka u dafa, o b’a to i ka da i yɛrɛ la walasa ka kow sigi sen kan ka kuntilennabaw dafa. I bɛna da i yɛrɛ la fana walasa ka se ka don o don gɛlɛyaw ɲɛnabɔ—misali la, ni mɔgɔw ye i su ka ko dɔ kɛ, i bɛna ban o ma.

I ka teriyaw: A ka di mɔgɔw ye ka teriw sɔrɔ minnu b’u sinsin u ka kuntilennaw kan cogo bɛrɛbɛnnen na—mɔgɔ minnu bɛ u ka laɲinitaw dɔn ani ka baaraba kɛ walasa ka u dafa. O la, walasa mɔgɔ fila ka teriya ka sinsin, o cogo bɛɛ la ɲuman dɔ la kelen ye u fila bɛɛ ka tugu kuntilenna kelen dɔ kɔ.

Nisɔndiya: N’i ye kuntilenna sigi ani ka a dafa, i bɛ nisɔndiyaba sɔrɔ.

“Ka kuntilennaw sigi, o ka di ne ye kosɛbɛ. O b’a to baara dɔ ka kɛ ne bolokɔrɔ tuma bɛɛ ani ka kuntilenna dɔ sɔrɔ n’ka kan ka min dafa. Wa ni i ye kuntilenna dɔ dafa, ka a dɔn ka fɔ ko i sera ka o kɛ, o bɛ nisɔndiyaba lase i ma.”—Christopher.

BIBULU SARIYAKOLO: “Mɔgɔ min bɛ fiɲɛ kɔlɔsi, o tɛna danni kɛ. Mɔgɔ min bɛ sankaba filɛ, o tɛna suman tigɛ.”—Waajulikɛla 11:4

I BƐ SE KA MIN KƐ

Nin ko nata ninnu kɛ walasa ka kuntilennaw sigi ani ka u dafa.

A ɲini ka i ka kuntilennaw dɔn. I bɛna se ka kuntilenna minnu dafa, olu bɛɛ sɛbɛn. A ka di i ye ka minnu dafa fɔlɔ, olu sɛbɛn daminɛ na.

Kow sigi sen kan. Kuntilenna bɛɛ kelen kelen na:

• Waati bɛrɛbɛnnen sigi i b’a fɛ ka a dafa ka bɛn waati min ma.

• I b’a fɛ ka a dafa cogo min na, o jateminɛ.

• Kɔn ka miiri a dafali gɛlɛyaw la ani k’a dɔn i bɛna o gɛlɛyaw ɲɛnabɔ cogo min na.

Baara kɛ. I kana i jɔ kow bɛɛ ka dafa walasa ka baara daminɛ ka ɲɛsin i ka kuntilenna ma. ‘I yɛrɛ ɲininka: Ne ka kan ka fɛn fɔlɔ jumɛn de kɛ walasa ka n’ka kuntilenna dafa?’ Baara kɛ o kan. I mana ɲɛta minnu kɛ, olu jateminɛ.

BIBULU SARIYAKOLO: “Min timinan ka di baara la, o ka ko latigɛlenw bɛ a kɛ fɛntigi ye.”—Ntalenw 21:5.