An k’a jira mɔgɔw la ko an bɛ u fɛ​—An ka an labɛn

¹ Ni an bɛ an labɛn koɲuman cidenyabaara kama, o b’an dɛmɛ k’a jira mɔgɔw la ko an bɛ u fɛ. Cogo di? Ni an labɛnnen don ka ɲɛ, an bɛna min fɔ mɔgɔw ye, an tɛ hami tun o la kosɛbɛ. O la sa, an bɛ se ka an mago don kosɛbɛ an barokɛɲɔgɔn na. Ka fara o kan, o b’an dɛmɛ k’an basigi, an bɛ se ka kuma ni kɔnɔnajɛya ye fana. Nka cogo jumɛn na an bɛ se ka sɛbɛn jiracogo dɔ labɛn min bɛ nɔ bɔ?

² Baara kɛ ni sɛbɛn jiracogo ye min bɛnnen don: Hakilila minnu dilen bɛ sɛbɛn jiracogo kan san 2006 An ka Masaya Cidenyabaara kɔnɔ, olu dɔ la kelen sugandi min bɛnnen don i ka sigida mɔgɔw ma, ani i k’a lajɛ i bɛ se k’o fɔ i yɛrɛ ka fɔcogo la cogo min na. I k’i ka sɛbɛn jiracogo labɛn ka o kɛnyɛ ni i ka waajulikɛyɔrɔ ye. Misali la, i ka waajulikɛyɔrɔ la, ni tuma caman i bɛ to ka bɛn ni diinɛ dɔ mɔgɔw ye, walima ni siya dɔ mɔgɔw ye, i miiri i bɛna se k’i ka sɛbɛn jiracogo labɛn cogo min na walisa a ka diya o mɔgɔw ye. Ni i bɛ sɛbɛn jiracogo sugandi ka kɛnyɛ ni i barokɛɲɔgɔnw magow ye, o b’a jira k’i bɛ u fɛ tiɲɛ na.​—1 Kɔr. 9:​22.

³ Ni i ye baara daminɛ ni sɛbɛn jiracogo dɔ ye, i ka to ka o jiracogo ɲɛ ka t’a fɛ. I bɛ kuma fɔlɔ minnu fɔ, olu nafa ka bon kɛrɛnkɛrɛnnenya la. O kosɔn, a jateminɛ i ka kuma fɔlɔw bɛ min kɛ mɔgɔw la. Ikomi mɔgɔw bɛ kan caman fɔ an ka waajulikɛyɔrɔ la, yala i b’a ɲini k’i ka kuma fɔ kan na i barokɛɲɔgɔnw bɛ min mɛn kosɛbɛ wa? I b’a fɛ ka kuma fɛn min kan, yala o fɛn ka di u ye wa? I bɛ ɲininkaliw minnu lawuli, yala o ɲininkaliw bɛ u bila ka i jaabi wa? Ni o ɲininkaliw tɛ u bila ka i jaabi, yɛlɛma don i ka kuma na, fo i ka fɛn sɔrɔ k’a fɔ min bɛ nɔ bɔ.

⁴ Fɛn minnu b’an dɛmɛ an kana ɲinɛ: A ka gɛlɛn mɔgɔ caman bolo k’u hakili to sɛbɛn jiracogo la, ni u bɛ da dɔ la. Ni o ɲɔgɔn de b’i sɔrɔ, yala i y’a ɲini mɔgɔ wɛrɛ fɛ o k’i lamɛn n’i bɛ segin i ka sɛbɛn jiracogo kan siɲɛ caman fo k’i se a la wa? O bɛ se k’i dɛmɛ i ka sɛbɛn jiracogo ka to i kɔnɔ ka ɲɛ, ani i ka se k’olu fɔ a fɔcogo la ni nɔgɔya ye. O bɛ se fana k’i dɛmɛ k’a dɔn i ka kan ka min fɔ, n’i barokɛɲɔgɔn kumana walima n’i ye kɛcogo dɔ ye a la tuma min na.

⁵ Fɛn min fana bɛ se k’an dɛmɛ an kana ɲinɛ, o ye ka o sɛbɛn jiracogo sɛbɛn ka surunya sɛbɛnfura dɔ kan, ani ka to k’o filɛ sanni i ka se du dɔ ma. Mɔgɔ dɔw y’a fɔ k’o bɛ olu dɛmɛ k’u hakili sigi, ani ka baro kɛ mɔgɔw fɛ ka ɲɛ. Ni an b’an labɛn ka ɲɛ nin cogow la, o bɛ se k’an dɛmɛ k’a jira mɔgɔw la ko an bɛ u fɛ, ani ka an ka kibaru duman ɲɛfɔcogo ɲɛ ka t’a fɛ.