I “labɛnnen ka sɔrɔ kɛwale ɲumanw bɛɛ kɛli kama”

¹ Tuma min na Yesu tun bɛna a ka waajuli baara kura dɔ daminɛ, a ye waati ta ka a ka kalandenw labɛn. (Mat. 10:5-14) Tiɲɛ don ko an bɛɛ bolo degunnen don, nka n’an bɛ miniti damadɔw dɔrɔn ta walisa k’an yɛrɛ labɛn k’a sɔrɔ ka taa cidenyabaara kɛ da-ni-da, o bɛna an dɛmɛ an ka nafa caman sɔrɔ an ka cidenyabaara la.—2 Kɔr. 9:6.

² I bɛ se k’i labɛn cogo min na: Labɛn koɲuman bɛ daminɛ n’an ka sɛbɛn jirataw kɔnɔkow dɔnni ye. An ka kan ka miiri fana mɔgɔw la minnu bɛ an ka waajulikɛyɔrɔ la. Kunko jumɛnw de bɛ u da la? An ka teli ka u ka diinɛ kalansira jumɛnw mɛn? Walisa ka hakilila wɛrɛw sɔrɔ, an bɛ se ka hakilila dilenw lajɛ minnu bɛ An ka Masaya Cidenyabaara ani Comment raisonner à partir des Écritures gafe kɔnɔ.

³ Ɲɛjirali minnu bɛ kɛ Baara ka lajɛ la, n’an b’an tulomajɔ olu kɛtuma na, o fana bɛna an dɛmɛ. Ikomi an bɛ dɔnniya sɔrɔ n’an bɛ baara kɛ ni an ka kibaru duman ɲɛfɔcogo ye, o la sa, an tɛna waati bɛrɛ ta k’an labɛn. Nka, o n’a ta o ta, n’an bɛna bɔ tuma o tuma ka taa cidenyabaara la, n’an bɛ miiri kumaw la an bɛna minnu fɔ, wa, n’an bɛ taa a fɛ ka an ka kibaru duman ɲɛfɔcogo ɲɛ, an bɛna nɔ bɔ kosɛbɛ. An ka kan fana ka waati dɔ ta k’a lajɛ ni an mago bɛ sɛbɛn minnu na, olu bɛɛ lajɛlen bɛ an ka bololabɔrɛ kɔnɔ.

⁴ Mun bɛna an dɛmɛ an hakili ka to an ka kibaru duman ɲɛfɔcogo la? A cogo dɔ ye ka segin o kan k’o fɔ siɲɛ caman an kan kɔrɔtalen. Dɔw bɛ o kɛ u ka denbaya ka kalan kɛtuma na. Dɔ wɛrɛw y’a ye ko ka u ka kuma fɔta bakuruba sɛbɛn papiye dɔ kan, ani ka to k’u ɲɛ fili o kan sani u ka se da dɔ la, k’o bɛ u dɛmɛ kosɛbɛ.

⁵ Munna nafa b’o la: N’an labɛnnen don ka ɲɛ, an ka baara bɛ ɲɛ an bolo ka taa a fɛ, wa, dɔ bɛ fara an ka nisɔndiya kan cidenyabaara la. O b’an dɛmɛ an kana jɔrɔ kosɛbɛ ani an ka to an cogo la mɔgɔw ka daw la. An bɛ se fana k’an mago don kosɛbɛ an barokɛɲɔgɔn na, sani ka jɔrɛ an bɛna min fɔ a ye. Ka fara o kan, n’an b’an ka sɛbɛn jirataw kɔnɔkow dɔn, o bɛna an dɛmɛ dɔ ka fara an ka nisɔndiya kan u jira tuma na.

⁶ Sɛbɛnniw bɛ dusu don an kɔnɔ walisa an “labɛnnen ka sɔrɔ kɛwale ɲumanw bɛɛ kɛli kama.” (Tite 3:1) Yala baara bɛ yen min bɛ se ka fisaya ni kibaru duman waajuli ye wa? N’an b’an labɛn ka ɲɛ, an b’a jira o cogo la ko an bɛ an barokɛɲɔgɔn bonya min sɔnna k’an lamɛn, wa, an b’a jira fana ko an bɛ Jehowa Ala bonya min tɔgɔ b’an kan.—Esa. 43:10.