An ka fɛɛrɛw tigɛ ka waajuli kɛ
1 Mɔgɔ minnu bɛ Kerecɛn jɛkulu kɔnɔ, olu ka kow ni u ka cogoyaw tɛ kelen ye. Nka kuntilenna kelen de bɛ an bɛɛ la. O ye k’an jija ka Jehowa tanu. (Zab. 79:13) Ni i tɛ kɛnɛbagatɔ ye, walima ni gɛlɛya wɛrɛw bɛ i kan, ni o b’a to i tɛ se k’i sen don kosɛbɛ kibaru duman weleweledali la, i bɛ se ka mun kɛ walisa ka siraw sɔrɔ ka waajuli kɛ?
2 I ka don o don kow sen fɛ: Yesu tun bɛ seereya kɛ tuma bɛɛ n’a bɛ mɔgɔya kɛ ni tɔw ye. A tɛmɛtɔ nisɔngɔminɛyɔrɔ dɔ fɛ, a kumana Matiyu fɛ. A ka dugutaa dɔ sen fɛ, a kumana Zankɛn fɛ. A tun bɛ k’a lafiya tuma min na, a kumana Samarika muso fɛ. (Mat. 9:9; Luka 19:1-5; Yuh. 4:6-10) An ka don o don kow sen fɛ, an fana bɛ se ka baro gansan dɔ yɛlɛma k’o kɛ seereya kɛli ye. Ka fara Bibulu kan, ni sɛbɛndenninw walima gafeninw b’an bolo kɔrɔ, o bɛna dusu don an kɔnɔ, an labɛnnen bɛ sɔrɔ o la sa waajuli kama, an jigiya kan.—1 Pi. 3:15.
3 Yala i farikolo cogo tɛ taama nɔgɔya i ma walisa i ka se ka bɔ ka i sen don da-ni-da baara la wa? Ni o don, i ɲɛmajɔ cogow fɛ walisa i ka se ka seereya kɛ dɔgɔtɔrɔso baarakɛlaw fɛ, mɔgɔ minnu bɛna bɔ i ye, ani i ni mɔgɔ o mɔgɔ bɛ bɛn. (Kɛw. 28:30, 31) Ni tuma caman na, kow cogoyaw b’i wajibiya ka to i ka so kɔnɔ, yala i y’a lajɛ ka seereya kɛ telefɔni walima lɛtɛrɛ fɛ wa? An balimamuso dɔ bɛ to ka lɛtɛrɛ ci a somɔgɔw ma minnu tɛ Jehowa Seerew ye. A ka lɛtɛrɛ kɔnɔ, a bɛ hakililaw sɛbɛn ka bɔ Bibulu kɔnɔ minnu bɛ dusu don mɔgɔ kɔnɔ. A ye ko duman minnu sɔrɔ a ka waajuli kɔnɔna na, a bɛ olu fana ɲɛfɔ a ka lɛtɛrɛ kɔnɔna na.
4 Baarakɛyɔrɔ la walima lakɔli la: Ikomi Jehowa batoli de ye an diyanyeko ye, o bɛna an bila ka fɛɛrɛw tigɛ ka tiɲɛ kisɛw dan an ka baarakɛyɔrɔ la walima lakɔli la. Weleweledala dɔ si ye san segin ye. O weleweledala ye fɛn minnu kalan kalo ko la Réveillez-vous ! kɔnɔ, a y’o fɔ a ka klasi kɔnɔmɔgɔw ye. Mɛtiri y’a dɔn tuma min na ko weleweledala y’a ka kunnafoni bɔ Réveillez-vous ! kɔnɔ, a tora ka La Tour de Garde ni Réveillez-vous ! minɛ Jehowa Seerew bolo n’u y’a di a ma tuma o tuma. Baarakɛyɔrɔ la, ni an bɛ Qu’enseigne réellement la Bible ? gafe to yɔrɔ la mɔgɔw bɛ se k’a ye yɔrɔ min na, o bɛ se ka mɔgɔw bila u ka ɲininkaliw kɛ, ka cogo di an ma ka seereya kɛ.
5 Yala aw bɛ se k’aw miiri fɛɛrɛw la, aw bɛ se ka minnu tigɛ ka waajuli kɛ aw ka don o don kow sen fɛ wa? An bɛɛ ka an jija k’ an ka kow ni an ka cogoyaw kɛ “ka tanuli saraka bɔ Ala ye” don o don.—Heb. 13:15.