Aw ka Jehowa nɔɔrɔ lakali
1 Zaburusɛbɛnbaga ko: ‘Aw ka dɔnkili da Jehowa ye dugukolo bɛɛ. . . . A’ ye a nɔɔrɔ kibaruya fɔ walima ka lakali siyaw cɛma, ka a ka kabako kɛlenw lakali siyaw bɛɛ cɛma.’ Jehowa ye min kɛ ka tɛmɛ, a bɛ ka min kɛ sisan, ani a bɛna min kɛ don nataw la, ni an bɛ miiri o bɛɛ la, o b’an bila ka a ka nɔɔrɔ lakali.—Zab. 96:1, 3.
2 An ka cidenyabaara la: Bonya dara Jehowa Seerew de kan ka Ala tɔgɔ ta, ani ka Ala tɔgɔ tanu kɛnɛkan, dugukolo yɔrɔ bɛɛ la. (Mal. 1:11) O ye danfaraba ye Jehowa Seerew ni Kerecɛnte ka diinɛ ɲɛmɔgɔw cɛ, olu minnu ma siran ka Ala tɔgɔ bɔ u ka Bibulu bayɛlɛmaliw kɔnɔ ! Ka mɔgɔw ladɔnniya Ala tɔgɔ la, o ye baara ye min tɛ se ka bila ka sumaya, bawo wajibi don mɔgɔw ka Ala tɔgɔ wele ni dannaya ye walisa ka se ka kisi tɔɔrɔba la, min natɔ don. (Rom. 10:13-15) Ka fara o kan, Ala tɔgɔ saniyali de bɛna na ni bɛn ye dunuya yɔrɔ bɛɛ la, o de bɛna na ni bɛn ye fana dugukolo-kan-mɔgɔw bɛɛ lajɛlen ni ɲɔgɔn cɛ. Tiɲɛ na, Ala ka kɛwalew bɛɛ sirilen bɛ a tɔgɔ de la.
3 “Jehowa ka bon, a ka kan ka tanu kosɛbɛ.” Nka, walisa mɔgɔw ka se ka “Jehowa bonya ka kɛnyɛ ni a tɔgɔ nɔɔrɔ ye”, fo u ka tiɲɛ dɔn a ko la. (Zab. 96: 4, 8) O n’a ta o ta, mɔgɔ dɔw b’a fɔ ko Ala tɛ yen. (Zab. 14 :1) Dɔ yɛrɛw bɛ Ala tɔgɔ tiɲɛ k’a fɔ ko sentan don, walima u b’a fɔ ko a mago tɛ hadamadenw ka kow la. An bɛ nɔɔrɔ da Jehowa de kan ni an bɛ mɔgɔ kɔnɔnajɛlenw dɛmɛ u ka dɔnniya lakika sɔrɔ an Dabaga ko la, a kuntilenna ko la, ani a jogoɲuman ko la.
4 An taamacogo fɛ: Ni an bɛ an ka ɲɛnamaya kɛ ka bɛn Jehowa ka sariyaw tilennenw ma, o bɛ bonya da a kan. Mɔgɔw bɛ an taamacogo ɲuman kɔlɔsi. (1 Pi. 2 : 12) Misali la, an yecogo saniyalen ani an labɛnnen koɲuman bɛ se ka mɔgɔw bila u ka an tanu. O bɛ cogo di an ma ka kuma nafaw kan, nafa minnu bɛ ɲɛnamaya kɛli la ka kɛnyɛ ni sariyakolow ye minnu bɛ Ala ka Kuma kɔnɔ. (1 Tim. 2: 9, 10) Ni mɔgɔ wɛrɛw bɛ ‘an ka kɛwale ɲumanw ye, ka an sankolola Fa bonya,’ o bɛ an nisɔndiya kosɛbɛ dɛ!—Mat. 5:16.
5 An ka kumaw fɛ ani an ka walew fɛ, an ka nɔɔrɔ da an ka Ala nɔɔrɔman kan don o don, an k’a kɛ iko nin Zaburu b’a fɔ cogo min na ni nisɔndiya ye ko: “Aw ka dɔnkili da Jehowa ye, aw ka a tɔgɔ tanu. Aw ka kisili kibaru fɔ don o don.”—Zab. 96:2.