An ka mɔgɔw ladɔnniya Ala tɔgɔ ko la
1 Mun de kɛra i la tuma min i ye Ala tɔgɔ mɛn a siɲɛ fɔlɔ? Mɔgɔ caman kɛcogo ni nin muso kɛcogo ye kelen ye, ale min ko: “Tuma min na ne ye Ala tɔgɔ ye Bibulu kɔnɔ, ne kasira. Ko ne sera ka Ala tɔgɔ yɛrɛyɛrɛ dɔn, ka se k’o fɔ, o donna ne na kosɛbɛ.” O muso in bolo, ka Ala tɔgɔ dɔn, o kɛra ɲɛtaa dɔ ye Jehowa dɔnniya sɔrɔli la. O y’a dɛmɛ a k’a ye ko Ala ye mɔgɔ kɛrɛnkɛrɛnnen ye teriyasira bɛ se ka don a ni min cɛ.
2 Mun na an ka kan ka mɔgɔw ladɔnniya a tɔgɔ ko la? Ala tɔgɔ sirilen bɛ a mankutuw, a sagonataw ni a ka wale kɛlenw na. O sirilen bɛ fana kisili la. “Mɔgɔ o mɔgɔ mana Jehowa tɔgɔ wele o na kisi,” Paul ye o de sɛbɛn. Nka, Paul taara a fɛ k’a fɔ “u na a tɔgɔ wele cogo di,” ni u m’a dege fɔlɔ ka Jehowa dɔn, ka dannaya da a kan? O la sa, kerecɛnw ka kan ka teliya ka Ala tɔgɔ fɔ mɔgɔ tɔw ye, ani a tɔgɔ kɔrɔ ye fɛn minnu bɛɛ ye, k’olu fana fɔ. (Rom. 10:13, 14) Nka, o n’a ta o ta, kun sɛbɛ wɛrɛ bɛ yen min kosɔn Ala tɔgɔ ka kan ka dɔn.
3 San 1920 waatiw la, Ala ka jamakulu ye koɲɛ faamu ka bɔ Sɛbɛnniw kɔnɔ, min ɲɛsinnen bɛ Ala ka masabaya lajɛyali ma, ani a tɔgɔ saniyali ma dunuya mumɛ bɛɛ kɔnɔ. Jehowa bɛna mɔgɔ juguw halaki walisa k’a tɔgɔ saniya, nɔgɔ fɛn o fɛn dara a kan ka o bɛɛ bɔ a la. Nka sani a ka o kɛ, tiɲɛ ka kan ka ‘fɔ a ko la dugukolo yɔrɔ bɛɛ la.’ (Esa. 12:4, 5; Eze. 38:23) O la sa, an ka waajuli kun belebeleba, walima a kun bɛɛ la fɔlɔ ye ka Jehowa tanu ani k’a tɔgɔ saniya mɔgɔ bɛɛ ɲɛ na. (Heb. 13:15) Kanuya min bɛ an na ka ɲɛsin Ala ma, ani an mɔgɔɲɔgɔn ma, o de bɛ an bila ka baara kɛ k’a dafa, Ala y’an ci ka o baara min kɛ.
4 “Jamakulu ɲɛnatɔmɔnen a tɔgɔ kosɔn”: San 1931 an ye an tɔgɔ yɛlɛma ka kɛ Jehowa Seerew ye. (Esa. 43:10) Kabini o tuma, Ala ka jamakulu ye mɔgɔw ladɔnniya Ala tɔgɔ ko la ka se hakɛ dɔ la fo Prédicateurs gafe ɲɛ 124nan jukɔrɔ, a fɔra ko: “Diɲɛ yɔrɔ bɛɛ la, mɔgɔ o mɔgɔ bɛ Jehowa tɔgɔ fɔ, a bɛ dɔn o yɔrɔnin bɛɛ la k’o tigi ye Jehowa Seere ye.” Yali o sira fɛ, e fana dɔnnen bɛ Jehowa Seere ye wa? Waleɲumandɔn Jehowa ka ɲumanya ko la, o ka kan ka an bila ka ‘a tɔgɔ tanu,’ ka kuma a ko la, o bɛnnen bɛ waati o waati la.—Zab. 20:7; 145:1, 2, 7.
5 Ikomi an ye ‘jamakulu ɲɛnatɔmɔnen ye a tɔgɔ kosɔn,’ an ka kan ka Ala ka naamuw lafasa. (Kɛw. 15:14; 2 Tim. 2:19) Tuma caman, mɔgɔw bɛ fɛn fɔlɔ min kɔlɔsi Jehowa Seerew ko la, o ye u taamacogo ye. (1 Pi. 2:12) An t’a fɛ abada ka Ala tɔgɔ tiɲɛ, an kɛtɔ ka a ka sariyalokolow lagosi, walima ka a ka bato bila kɔfɛ an ka ɲɛnamaya kɔnɔ. (Lev. 22:31, 32; Mal. 1:6-8, 12-14) Nka an ka ɲɛnamaya kɛcogo k’a jira ko Ala tɔgɔ min bɛ an kan o ye bonya ye min ko ka bon an bolo kosɛbɛ.
6 Bi, an ɲɛ bɛ a la ko Jehowa ka nin kuma bɛ ka tiimɛ: ‘Ka bɔ tilebɔ fan fɛ, fo ka taa a bila tilebin fan fɛ, ne tɔgɔ na bonya siyaw bɛɛ la.’ (Mal. 1:11) An ka taa a fɛ, ka mɔgɔw ladɔnniya Ala tɔgɔ ko la ani “ka a tɔgɔ senuma tanu abada fo abada.”—Zab. 145:21.
[Study Questions]
1. Ka Ala tɔgɔ dɔn, o bɛ se ka mun kɛ mɔgɔw la?
2. Mun na, an ka kan ka teliya ka mɔgɔw kalan Jehowa ko la?
3. Kun belebeleba jumɛn na an bɛ waajuli kɛ?
4. Ala tɔgɔ nana siri cogo jumɛn na Jehowa Seerew la?
5. Ala tɔgɔ min bɛ an kan, o bɛ nɔ bila an taamacogo la cogo di?
6. Bonya jumɛn b’an bolo sisan ni o bɛ se ka to an bolo fo abada?