Nin sɛbɛn mara

Ka Bibulu-kalanw ɲɛminɛ minnu bɛ taa ɲɛ

Barokun minnu bɔra ka tugu ɲɔgɔn kɔ An ka Masaya Cidenyabaara kɔnɔ Bibulu-kalanw ɲɛminɛni la minnu bɛ taa ɲɛ, olu kolomayɔrɔw de farala ɲɔgɔn kan nin cɛmancɛ sɛbɛnfura kɔnɔ. An bɛ dusu don aw bɛɛ kɔnɔ aw ka nin cɛmancɛ sɛbɛnfura in mara ka ɲɛ ani aw ka to ka a lajɛ ni aw bɛ Bibulu-kalanw ɲɛminɛ. Ka fara o kan, lajɛ min bɛ kɛ ka sɔrɔ ka waajuli daminɛ, nin sɛbɛn yɔrɔw bɛ se ka fɔ o lajɛw kɛtuma na ani baara lakɔlɔsibagaw bɛ se ka baara kɛ ni sɛbɛn in ye, ka a kɛ u ka jɛmu sinsin yɔrɔ ye ni u bɛ taa bɔ gafekalanw na.

Tila 1: Mun ye Bibulu-kalan ye?

Ni i bɛ baro kɛ Bibulu kan waatiw kɔnɔ ani ni fɛɛrɛ ye minnu sigilen don, hali ni baro bɛ kɛ waati kuntagala surun kɔnɔ, ni baara bɛ kɛ ni Bibulu ye walima sɛbɛnw dɔ la kelen ye minnu dilanna Bibulu-kalan kama, i bɛ ka Bibulu-kalan dɔ de ɲɛminɛ. Kalan dantigɛli bɛ se ka kɛ ni a ɲɛminɛna siɲɛ fila kalan kɛcogo fɔlɔ jiralen kɔ ani ni an dalen bɛ a la ko kalan bɛ taa ɲɛ.​—⁠km 7/04 ɲ. 1.

Sɛbɛn minnu bɛ kɛ ka Bibulu-kalan ɲɛminɛ:

◼ Ala bɛ mun wajibiya anw ma?

◼ Dɔnniya min bɛ na ni ɲɛnamaya banbali ye

◼ Adorez le Vrai Dieu

◼ I bɛ se ka kɛ Ala teri ye! O gafe bɛ se ka ta ka kalan kɛ ni mɔgɔ ye, min ma ɲɛtaaba sɔrɔ lakɔli la, walima min tɛ se ka kalanjɛ kɛ ka ɲɛ.

Tila 2: Labɛn minnu bɛ kɛ walisa ka Bibulu-kalan daminɛ

Wajibi don an ka dɔnniya di ni fɛɛrɛ ye min bɛ a to kalanden dusukun bɛ lasɔrɔ. O tɛ taa labɛnba kɔ. Labɛn kɛtɔ, an bɛ an hakili to kalanden na.​—km 8/04 ɲ. 1

Labɛn bɛ kɛ cogoya min na

◼ I bɛ jateminɛ kɛ kalansen tɔgɔ, ani dakunw tɔgɔw kan. Jaw ani o ɲɔgɔnna dɛmɛfɛn wɛrɛ minnu bɛ o Tila wala kalansen kɔnɔ, olu fana jateminɛ.

◼ Ɲininkali minnu kɛlen bɛ, olu jaabi ɲini ka dɔn, i ka tiiri ci daɲɛw walima kumasen kolomaw dɔrɔn kɔrɔ.

◼ I ka sɔrɔ k’a latigɛ aw bɛna tɛmɛsiraw minnu kalan Bibulu-kalan waati la. Sɛbɛnni kunkurunw kɛ sɛbɛnfura kɛrɛ fɛ walisa k’i yɛrɛ dɛmɛ.

◼ Yɔrɔ kolomaw seginkanni surun dɔ labɛn.

Kalan labɛn ka kɛnyɛ kalanden ma

◼ Delili kɛ kalanden ni a magow ko la.

◼ Yɔrɔ minnu faamuyali bɛna gɛlɛya kalanden ma, walima a tɛna sɔn yɔrɔ minnu ma kalan waati la, kɔn ka i hakili jakabɔ olu kan.

◼ I miiri: Kalanden ka kan ka mun de faamuya, walima a ka kan ka yɔrɔ jumɛn de baara a yɛrɛ la walisa a ka se ka ɲɛtaa sɔrɔ alako la? Ne bɛ se ka fɛɛrɛ jumɛn tigɛ ka a dusukun sɔrɔ?

◼ Ka kɛnyɛ ni aw mago ye, misali, wala ɲɛfɔli, wala ɲininkali damadɔw labɛn ka kalanden dɛmɛ a ka se ka yɔrɔ dɔ walima Bibulu tɛmɛsira dɔ faamuya.

Tila 3: Ka baara kɛ ni Bibulu tɛmɛsiraw ye walisa ka nɔ bɔ

An ka Bibulu-kalanw kun ye ka “mɔgɔw kɛ kalandenw ye”. O la sa, an bɛ u dɛmɛ u ka Ala ka Kuma kalansiraw faamu, ka sɔn o kalansiraw la, ka u waleya u ka ɲɛnamaya kɔnɔ. (Mat. 28:​19, 20; 1 Tes. 2:​13) O la sa, kalan ka kan ka sinsin Sɛbɛnniw de kan.​—⁠km 11/04 ɲ. 4

Kalan kɛ ni Ala ka kumakan ye

◼ A jira kalanden na cogo min na a bɛ se ka tɛmɛsira kɛrɛnkɛrɛnnenw ɲini a yɛrɛ ka Bibulu kɔnɔ.

◼ Bibulu tɛmɛsiraw minnu bɛ a jira ko an ka limaniya sinsinnen bɛ Sɛbɛnniw de kan, olu ɲini i ka baro kɛ u kan.

◼ Baara kɛ ni ɲininkaliw ye. Sanni i ka Bibulu tɛmɛsiraw ɲɛfɔ kalanden ye, a to a yɛrɛ ka u ɲɛfɔ i ye.

◼ A kɛ ni nɔgɔya ye. I kana a ɲini ka Bibulu tɛmɛsira kelen-kelen kɔrɔ bɛɛ ɲɛfɔ, kalan waati. Aw bɛ ka yɔrɔ min lajɛ, tɛmɛsira minnu bɛ aw dɛmɛ ka o faamu kosɛbɛ, olu dɔrɔn de sen don kalan na.

◼ Min bɔra kalan kɔnɔ, o waleyacogow jira. Kalanden dɛmɛ a k’a ye Bibulu kɔnɔkumaw ɲɛsinnen bɛ a ma cogo min na.

Tila 4: Kalandenw dege u k’u labɛn

Kalanden min bɛ kɔn ka kalansen kalan, ka tiiri ci jaabiw kɔrɔ, ka miiri a bɛna o jaabiw fɔ cogo min na a yɛrɛ ka kuma fɔcogo la, o kalanden bɛ taa ɲɛ alako ta fan fɛ. O kosɔn, ni Bibulu-kalan basigira kaban, i ni kalanden ka jɛ ka kalansen kelen labɛn ɲɔgɔn fɛ walisa i ka labɛn kɛcogo jira a la. Kalanden caman bɛ dɛmɛ sɔrɔ ni i ye Tila kuturu wala kalansen kuturu labɛn ni u ye.​—⁠km 12/04 ɲ. 1

Tiiri ci jaabiw kɔrɔ, ɲɛfɔli surunmanw sɛbɛn gafe kɛrɛda la

◼ Ɲininkali minnu bɛ sɛbɛn kɔnɔ, olu jaabi jɔnjɔnw bɛ sɔrɔ cogo min na, o ɲɛfɔ kalanden ye.

◼ I yɛrɛ ye tiiri ci cogo min na daɲɛ kolomaw kɔrɔ walima kumasen kolomaw kɔrɔ i ka sɛbɛn kɔnɔ, o jira kalanden na.

◼ Kalanden dɛmɛ a k’a faamu ko Bibulu tɛmɛsira kelen-kelen bɛɛ bɛ dakun miiriya dɔ de sinsin. A jira a la, a bɛ se cogo min na ka ɲɛfɔli surunw sɛbɛn a ka sɛbɛn kɛrɛda la.

Yɔrɔ kolomaw jateminɛni ani seginnkanni

◼ Sanni kalanden ka labɛn sɛbɛ daminɛ, a jira a bɛ se cogo min na ka jateminɛ kɛ kalansen tɔgɔ kan walima tila tɔgɔ kan, walima dakunw tɔgɔw kan ani a bɛ se ka jateminɛ kɛ cogo min na jaw kan yɔrɔ kalanta kɔnɔ.

◼ Dusu don kalanden kɔnɔ a ka segin ka yɔrɔ kalanta kolomayɔrɔw sɛgɛsɛgɛ ka labɛn kuncɛ.

Tila 5: Bibulu-kalan kelen-kelen bɛ kɛ ka dan yɔrɔ min na, o latigɛ cogo

Aw bɛna yɔrɔ hakɛ min kalan, o bɛ bɔ kalanden ani karamɔgɔ fila bɛɛ ka seko ni u cogoyaw la.​—km 1/05 p. 1

U dɛmɛ u ka limaniya ka kɔgɔ

◼ Kalanden bɛ faamuyali ɲuman min sɔrɔ Ala ka Kuma kan, an kana o faamuyali saraka kalan teliya kosɔn.

◼ Waati min ka kan ka ta, o ta walisa ka kalanden dɛmɛ a ka faamuyali sɔrɔ ani a ye fɛn minnu kalan, a ka sɔn olu la.

◼ Waati caman ta i ka Bibulu tɛmɛsira kolomaw lajɛ, kalan sinsinnen bɛ o minnu kan.

I kana kalan jɛgɛn

◼ Ni kalanden bɛ baro caman kɛ a yɛrɛ kunkow kan kalan waati la, an bɛ se ka fɛɛrɛ tigɛ walisa ka kuma o kan kalan kɔ fɛ.

◼ An kana kuma ka caya kalan waati la. Yɔrɔ minnu nafa man bon kosɛbɛ, kana baro caman kɛ olu kan, ani kana misali caman fɔ, o la, kalanden tɛna bali ka Bibulu kalansira kolomaw dɔnniya sɛbɛ sɔrɔ.

Tila 6: Ni kalanden ye ɲininkali dɔ lawuli

Ni aw ka Bibulu-kalan sigira ka ɲɛ, sanni aw ka to ka barokunw ta aw kunfɛ, min ka ɲi ni a bɛɛ ye, o ye ka kalan kɛ ka kɛnyɛ ni kalansenw sigicogoya ye. O bɛ kalanden dɛmɛ a ka dɔnniya jɔnjɔn jusigi ani a ka ɲɛtaa sɔrɔ alako ta fan fɛ.​—km 2/05 ɲ. 6

Jateminɛ kɛ

◼ Ɲininkali minnu bɛ aw ka yɔrɔ kalanta kan, olu jaabi bɛ se ka di o yɔrɔnin bɛɛ la.

◼ Ɲininkali min ni kalan tɛ sira kelen na, ni o dɔ lawulila, walima ni o jaabi ɲuman tɛ sɔrɔ ɲininiw kɔ, olu koɲɛ bɛ se ka lajɛ waati wɛrɛ la. Nafa bɛ se ka ye a la ni o ɲininkali sɛbɛnna ka bila.

◼ Ni kalanden ma sɔn Bibulu-kalansira dɔ ma, sɛbɛn wɛrɛw minnu bɛ Bibulu ka ɲɛfɔli dafalenw di o koɲɛ kan aw ye olu lajɛ.

◼ Nka ni hali o bɛɛ la kalanden ma wasa sɔrɔ a ka ɲininkali la, aw ka o koɲɛ bila ka waati wɛrɛ makɔnɔ, ka tɛmɛ ni aw ka kalan ye.

Kɛ mɔgɔ ye min ka kow ka nɔgɔn

◼ Ni i tɛ ɲininkali dɔ jaabi dɔn, kana hakilila dɔ fɔ i kun fɛ.

◼ Ɲininiw bɛ kɛ cogo min na, o dɔɔnin-dɔɔnin jira kalanden na.

Tila 7: Ka delili kɛ kalan waati

Walisa Bibulu-kalanden ka se ka ɲɛtaa sɔrɔ alako la, waajibi don fo a ka Jehowa ka dugawu sɔrɔ. O de kosɔn, ni kalan kɔni sigira ka ɲɛ, a bɛnnen bɛ o kalan ka daminɛ ani a ka kuncɛ ni delili ye.​​—⁠km 3/05 ɲ. 4.

Delili bɛ se ka sen don cogo di

◼ Diinɛko ka di mɔgɔ minnu ye, tuma caman na delili bɛ se ka kɛ ni olu ye kalan daminɛ-daminɛtuma yɛrɛ la.

◼ An ka kan ka jateminɛ kɛ ni kalanden tɔw ye walisa ka a dɔn tuma min na an bɛ se ka delili sen don kalan na.

◼ An bɛ se ka Zaburuw 25:​4, 5 ani 1 Yuhana 5:​14 ta ka kalanden dɛmɛ a k’a faamu mun na an bɛ delili kɛ.

◼ An bɛ se fana ka Yuhana 15: 16 ta k’a ɲɛfɔ, nafa min bɛ a la ka Jehowa deli Yesu tɔgɔ la.

Mun bɛ se ka fɔ delili kɔnɔ

◼ A bɛnnen bɛ an ka Jehowa tanu ale min ye an ka kalan Bɔyi ye.

◼ An bɛ se ka kumaw fɔ delili kɔnɔ, minnu bɛ a jira ko an bɛ ka an mago don sɛbɛ la an ka kalanden na.

◼ An bɛ se k’a jira delili kɔnɔ ko Jehowa bɛ ka baara kɛ ni a ka jɛkuluba min ye, ko an b’a waleɲumandɔn o la.

◼ Kalanden bɛ ka cɛsiri minnu kɛ walisa a ka se ka dɔnniya sɔrɔlenw sirataama a ka ɲɛnamaya kɔnɔ, an ka Jehowa deli a ka duba o cɛsiriw ye.

Tila 8: An ka kalanden ɲɛsin jɛkuluba ma

Ni an bɛ Bibulu-kalanw ɲɛminɛ, an ka kuntilenna tɛ dan kalansiraw dili dɔrɔn ma, nka an bɛ kalanden fana dɛmɛ a ka se ka kɛ Kerecɛn jɛkulu kɔnɔmɔgɔ dɔ ye. . . . Dɔgɔkun o dɔgɔkun an ka kalan waatinin dɔ ta, ka kalanden kalan Jehowa ka Jɛkuluba kɔnɔko dɔ la.​—km 4/05 ɲ. 8

Jɛkulu ka lajɛw

◼ An ka jɛkulu ka lajɛ kelen-kelen bɛɛ cogoyaw fɔ kalandenw ye. Kabini an ka kalan fɔlɔ la, an ka a ɲini u fɛ u ka na lajɛw la.

◼ Yɔrɔ kolomaw minnu fɔra lajɛw la, an ka olu fɔ u ye.

◼ An ka ɲɛfɔliw kɛ walisa Hakilijigin, kafo ka lajɛw, kafoba ka lajɛw ani kafo lakɔlɔsibaga ka naliko nege ka don kalandenw la.

◼ Foto minnu bɛ an ka sɛbɛnw kɔnɔ, olu ta ka kalandenw dɛmɛ u k’a faamuyali sɔrɔ.

◼ An ka dusu don u kɔnɔ u ka gafenin kalan min tɔgɔ ye ko : Les Témoins de Jéhovah​​—⁠Qui sont-ils? Quelles sont leurs croyances? (Jehowa Seerew ye jɔniw ye? U dalen bɛ mun na?)

Baara kɛ ni wideyo kasɛtiw ye walisa u ka kɛ waleɲumandonbagaw ye

◼ Les Témoins de Jéhovah — un nom, une organisation

◼ Toute la communauté des frères

◼ Unis grâce à l’enseignement divin

◼ Jusqu’aux extrémités de la terre

Tila 9: An ka kalandenw labɛn walisa u ka se ka senfɛ-seereya kɛ

Ni an ka Bibulu-kalandenw dalen bɛ u ka fɛn kalantaw la, o b’u bila ka kuma o kan.​—km 5/05 ɲ. 1

Dusu don u kɔnɔ u ka seereya kɛ

◼ Yala kalanden teriw bɛ yen, wala a somɔgɔw, a bɛ se ka minnu wele ka na Bibulu-kalan na wa?

◼ Kalandenw baarakɛɲɔgɔnw, wala a lakɔlidenɲɔgɔnw, wala a dɔnbaga wɛrɛw y’a jira ko kibaru duman ka di u ye wa?

U dege u k’u ka dannakow fɔ mɔgɔw ye

◼ I mana se i ɲɛna yɔrɔ damadɔw la kalan kɔnɔna na, i bɛ kalanden ɲininka o yɔrɔw kan ko: “E bɛ se ka Bibulu ta ka nin tiɲɛ in ɲɛfɔ i ka denbaya ye cogo di?

◼ Kalanden lafaamuya ko, ka kuma mɔgɔw fɛ Jehowa Ala kan ani Jehowa kuntilennaw ko la, o tɛ taa mɔgɔ-bonya ni ɲumanya kɔ.

◼ Gafenin min tɔgɔ ye ko Les Témoins de Jéhovah Qui sont-ils? Quelles sont leurs croyances? (Jehowa Seerew ye jɔniw ye? U dalen bɛ mun la?), kalandenw bɛ se ka o gafenin ta ka u teriw ani u yɛrɛ somɔgɔw dɛmɛ u ka an ka dannakow ni an ka kɛwalew faamu, minnu sinsinnen bɛ Bibulu kan.

Tila 10: Ka kalanden dege du-ni-du waajuli la

Kalanden min ma batɛmu ta fɔlɔ, ni diinɛ maakɔrɔw y’a ye ko o kalanden bɛ se ka kɛ weleweledala ye, o kalanden bɛ se ka bɔ ni jɛkulu ye ka jama-la-waajuli kɛ.​—km 6/05 ɲ. 1

Labɛnw kɛtɔ ɲɔgɔn fɛ

◼ Hakilila minnu dira sɛbɛn jiracogow kan, weleweledala kura bɛ se ka olu sɔrɔ yɔrɔ min na, o jira a la.

◼ A dɛmɛ ka kuma daminɛcogo nɔgɔman dɔ ɲɛnatɔmɔ, min bɛnnen bɛ sigida ma.

◼ Dusu don a kɔnɔ a ka baara kɛ ni Bibulu ye a ka cidenyabaara kɔnɔ.

◼ Aw ye to ka waajuli baara kɛcogow ladege ka sɔrɔ ka bɔ. Sigida-la-mɔgɔw bɛ deli ka an jaabi ni kuma minnu ye, olu bɛ kunbɛn ni fɛɛrɛ min ye, i bɛ o jira kalanden na.

Ka aw to waajuli la ɲɔgɔn fɛ

◼ Aw jɛra ka sɛbɛnjiracogo min labɛn ɲɔgɔn fɛ, a to kalanden k’a ye e bɛ o waleya cogo min na.

◼ Kalanden kɛcogoya ani dan min bɛ a la, olu jateminɛ.

◼ Tuma dɔw la, min ka fisa ni a bɛɛ ye, o ye ka yɔrɔ dɔ dɔrɔn de di a ma aw ka sɛbɛn jiracogo kɔnɔ.

◼ Weleweledala kura dɛmɛ a ka cidenyabaara boloda, ka o kɛ fɛn basigilen ye.

Tila 11: Kalanden dɛmɛ a ka se ka segin-ka-bɔnyew kɛ

Segin-ka–bɔnye labɛnw bɛ daminɛ kabini aw ka ɲɔgɔnye fɔlɔ la. Dusu don kalanden kɔnɔ a k’a mago don sɛbɛ la mɔgɔw la ni a bɛ kuma ni u ye. Kalanden dege dɔɔnin-dɔɔnin a k’a ɲini mɔgɔw fɛ u k’u ka hakilinataw fɔ, a ka u ka ɲɛfɔliw lamɛn, ka u haminakow sɛbɛn.​—⁠km 7/05 ɲ. 1

A’ y’aw labɛn ka segin ka taa bɔ u ye

◼ Sɛbɛnni min kɛra kabini ɲɔgɔnye fɔlɔ la, segin o kan i ka kalanden dɛmɛ a ka Masaya cikan yɔrɔ dɔ ɲɛnatɔmɔ min bɛna diya a kumaɲɔgɔn ye.

◼ Aw ka jiracogo surun dɔ labɛn ɲɔgɔn fɛ, min bɛ sinsin Bibulu kɔnɔ kuma kelen kan ani dakun kelen, min bɔra sɛbɛn dɔ kɔnɔ Bibulu-kalan bɛ kɛ ni min ye.

◼ Aw ka ɲininkali dɔ labɛn, aw bɛ se ka min lawuli baro laban na.

A’ k’aw timinandiya u nɔ fɛ

◼ Dusu don kalanden kɔnɔ walisa a ka teliya ka taa bɔ mɔgɔw bɛɛ ye minnu y’a jira ko kibaru duman ka di u ye.

◼ Kalanden dɛmɛ a ka a ye, ko a nafa ka bon ka a ɲini ka taa bɔ mɔgɔw ye minnu sɔrɔ man di u ka so ani k’i banban o kɛli fɛ.

◼ Waati bɛ se ka boloda cogoya min na i ni mɔgɔw cɛ walisa ka segin ka taa bɔ u ye, o jira kalanden na, ani a dɛmɛ a k’a faamu ko u bɛnna waati min kan, a ka kan ka segin ka na bɔ u ye o waati de la, ka kɛnyɛ ni u ka bɛnkan ye.

Tila 12: Kalanden dɛmɛ a ka se ka Bibulu-kalanw daminɛ ani ka u ɲɛminɛ

Ni aw bɛ Yesu ladege, ka kɛ misali ɲumanw ye aw yɛrɛ ka cidenyabaara kɔnɔ, o nafa ka bon kosɛbɛ. Ni aw ka kalanden bɛ to k’aw kɛcogo lajɛ cidenyabaara la, a bɛna a faamu, ko segin-ka-bɔnyew kɛkun ye Bibulu-kalanw daminɛni de ye.​—⁠km 8/05 ɲ. 1

Ni an bɛ Bibulu-kalan dajira mɔgɔw la

◼ A ɲɛfɔ i ka kalanden ye, ko a wajibiyalen tɛ tuma bɛɛ an ka Bibulu-kalan kɛcogo bɛɛ ɲɛfɔ a tigi ye.

◼ Tuma caman na, min ɲɔgɔn tɛ, o ye ka kalan kɛcogo ɲɛjira ni dakun kelen wala fila kalanni ye.

◼ Hakilila minnu dira Bibulu-kalan daminɛni kan, aw ye segin olu kan, ka ɲɛjirali kɛ u kan.​—⁠km 1/02 ɲ. 6. 

Ka kalandenw dɛmɛ walisa u ka kɛ karamɔgɔw ye

◼ Dusu don kalandenw kɔnɔ u ka don Ala-ka-Marako lakɔli la.

◼ Fɛɛrɛ tigɛ walisa weleweledala kuraw ka taa ni i ye Bibulu-kalan wɛrɛw la walisa u ka se ka karamɔgɔya baara dɔɔnin sɔrɔ ka kɛ olu kɔnɔ.