Jehowa Seerew ka san 2005 Kafoba ka jamalajɛ min tɔgɔ ko “L’obéissance à Dieu”
1 Ikomi Jehowa Ala ye an Karamɔgɔba ye, a ye fɛɛrɛw tigɛ walisa an ka ɲɔgɔn lajɛ a ka an kalan a ka siraw la. (Esa. 30:20, 21; 54:13) A bɛ o kɛ jɔnkɛ dannamɔgɔ hakilima sababu fɛ, jɔnkɛ dannamɔgɔ hakilima min bɛ nin ɲɔgɔnlajɛ suguw labɛn i n’a fɔ an ka san o san kafoba ka jamalajɛw. (Mat. 24:45-47) An kɔnɔnataw ni zaburusɛbɛnbaga Dawuda kɔnɔnataw bɛɛ ye kelen ye, ale min ye dɔnkili da ko: ‘Ne na Jehowa tanu jamaw cɛ ma.’ (Zab. 26:12) Dawuda y’a faamu k’a jɛya ko nafa bɛ a la ka kalan Jehowa fɛ, wa, a tun jɔlen bɛ a kan ka kɛ Jehowa ka jamaw cɛ ma, jama mana lajɛ tuma o tuma.
2 Yala i bɛna kɛ ‘jamaw cɛ ma’ minnu bɛna ye ɲinan Kafoba ka jamalajɛ “L’obéissance à Dieu” la wa? Ni i ko ɔwɔ, nin kunnafoniw bɛna i dɛmɛ i ka labɛnw na walisa i ka ye jamalajɛ kɛnɛ kan.
3 Kow labɛn kabini sisan walisa i ka ye kɛnɛ kan don o don: ‘Min tɛ ko bila ka sumaya, o ka ko latigɛlenw bɛ a kɛ fɛntigi ye.’ (Nt. 21:5) Yala nin kumaw t’a jira k’a jɛya ko a nafa ka bon kosɛbɛ ka kɔn ka kow labɛn walisa ka ye kafoba ka jamalajɛ kɛnɛ kan wa? Kalan min bolodara, o bɛ mɔgɔ barika kuraya alako ta fan fɛ. Walisa ka da a la tigitigi ko i tɛna kalan bolodalen yɔrɔ si jɛ, i ka kan ka labɛn o labɛn kɛ ka se ka ye kɛnɛ kan tile saba bɛɛ la, a ka ɲi i ka labɛnw daminɛ ni hakili ye, kabini sisan. Ni i ka kan k’a ɲini i ka baarada kuntigi fɛ a ka i labila walisa ka se ka taa jamalajɛ tile saba bɛɛ la, o ɲini a fɛ kabini sisan. Ni i furuɲɔgɔn tɛ Jehowa Seere ye, ni e ni a ka kan ka kuma i ka ko labɛnnenw kan, i kana o kuma to fo jamalajɛ surunyalen. Gɛlɛya o gɛlɛya mana kɛ i kan, Jehowa deli o kow la. I ka da a la ko a ka dɛmɛ fɛ, ‘I ka ko latigɛlenw na ɲɛ.’ Ka fara o kan, i bɛ Bibulu kalan kɛ mɔgɔ minnu kun, i ka olu fana dɛmɛ u ka ko labɛntaw la walisa u ka ye jamalajɛ kalan bolodalen yɔrɔ kelen-kelen bɛɛ la.
4 Jiginyɔrɔko: Aw ka lafiya kama, jamalajɛ bɛna kɛ dugu minnu na, labɛnw kɛra jiginyɔrɔ ko la kaban o dugu kelen-kelen bɛɛ la. Mɔgɔ minnu mago bɛ jatigila la kafoba ka jamalajɛ tuma na, an b’a fɛ ka olu bɛɛ hakili jigin ko u ka sɔn fɛɛrɛw tigɛlen la walisa u kana kɛ doni ye balimaw bolo minnu sɔnna ka u ka so dayɛlɛ mɔgɔw ye minnu bɛ bɔ yɔrɔ wɛrɛw la.
5 Ni weleweledala dɔ ye Demande de chambre pour cas particuliers sɛbɛn lafa, jɛkulu-ka-baara komite bɛna o tigi ka ko lajɛ. O komite bɛna a sinsin kunnafoniw kan minnu bɛ o sɛbɛn kɔnɔ. Tɔgɔ duman bɛ weleweledala minnu na, ni u denw fana jogo ka ɲi, Demande de chambre pour cas particuliers fɛɛrɛ tigɛra olu dɔrɔn de kama. Ni Jatigilako-ɲɛnabɔ-jɛkulu b’a fɛ ka ɲininkali kɛ mago kɛrɛnkɛrɛnnen dɔ ko kan, a na a ɲɛsin jɛkulu sɛbɛnnikɛla ma.
6 Mago kɛrɛnkɛrɛnnenw: Ciden Paul kumana balima dɔw kan minnu ye ale ‘dusu saalo kɔsɛbɛ.’ (Kol. 4:7-11) U ye Paul dɛmɛ sira min fɛ, o dɔ ye ko u ye Paul mago ɲɛ. Kafoba ka jamalajɛ ko la, e bɛ se ka mun kɛ walisa ka tɔw ‘dusu saalo’? Weleweledala minnu kɔrɔla kosɛbɛ, minnu ye lujuratɔw ye, minnu bɛ waajuli baara la waati dafalen na, ani weleweledala wɛrɛw, olu mago bɛ se ka kɛ dɛmɛ na min ye u taacogo ye jamalajɛ la, walima min ye u ka jatigilako ye. A ko bɛ somɔgɔw de kan fɔlɔ ka o mɔgɔ suguw dɛmɛ. (1 Tim. 5:4) Ni u somɔgɔw tɛ se ka o kɛ, u kerecɛnɲɔgɔnw ka kan ka se ka u dɛmɛ. (Yak. 1:27) Gafe kalan lakɔlɔsibagaw ka kan k’a sɛgɛsɛgɛ o mago kɛrɛnkɛrɛnnen sugu bɛ u ka kulu kɔnɔmɔgɔ minnu na, ka kɔn ka o ko ɲɛnabɔ sanni jamalajɛ ka se.
7 Ni i bɛ taa jamalajɛ wɛrɛ la: Ni kow b’a wajibiya i ka taa jamalajɛ wɛrɛ la, an b’a ɲini i fɛ i ka se i ka jɛkulu sɛbɛnnikɛla ma walisa i bɛ taa jamalajɛ min na, i ka o jamalajɛ kɛyɔrɔ ladɛrɛsi sɔrɔ. Kunnafoniw bɛ sɔrɔ o jamalajɛ kan Demande de chambre pour cas particuliers sɛbɛn kɔ kan. A lajɛ ni i ma ɲinɛ ka i ka ladɛrɛsi sɛbɛn, ani ka tɛnburu nɔrɔ lɛtɛrɛ foroko kan, ka o ni i ka Liste des lieux d’hébergement recommendés ɲinisɛbɛn walima kunnafoni wɛrɛw fara ɲɔgɔn kan ka o ci. I bɛ taa jamalajɛ min na, ni jamalajɛ kelen dɔrɔn tɛ kɛ o dugu kɔnɔ, i ka jamalajɛ bɛ kɛ waati minnu na, i ka o pereperelatigɛ.
8 An mago bɛ dɛmɛbagaw la: Yesu kɛra ɲɛjirabaga dafalen ye min ye ka a kɔlɔsi mɔgɔ wɛrɛw mago bɛ min na, ka tila ka o mɔgɔw mago ɲɛ ni majiginnenya ye. (Luk. 9:12-17; Yuh 13:5, 14-16) Mɔgɔ minnu bɛ u yɛrɛ di walisa ka baara kɛ jamalajɛw la, o hakilila sugu bɛ olu fana na. Walisa ka jamalajɛ baaradaw magow ɲɛ, jamalajɛ komite minnu bɛ sigida la, olu bɛna balimakɛ wɛrɛw wele sɔɔni walisa u ka jɛ ka baara kɛ ɲɔgɔn fɛ. U mago bɛ diinɛ maakɔrɔw ka dɛmɛ na kɛrɛnkɛrɛnnenya la, ani baara minnu bɛna di u ma ka kɛ, u mago bɛ a la fana u ka sɔn ka olu kɛ. O diinɛ maakɔrɔw ka jɛnyɛrɛkɔ hakilila bɛna kɛ misali ɲuman ye bɛɛ bolo jɛkulu kɔnɔ.—1 Pi. 5:2, 3.
9 Mɔgɔ wɛrɛw bɛ min ye: Muso dɔ, min ye lotɛli kuntigi ye, o y’a fɔ ko: “Aw ye mɔgɔ ye minnu ma ka di. Ni an ye aw ka mɔgɔw taamacogo ani tɔw taamacogo suma ɲɔgɔn ma, aw ka ɲi kosɛbɛ. Baarakɛla minnu bɛ lotɛli la, olu bɛɛ y’a fɔ ko aw bɛ mɔgɔw minɛ ka ɲɛ kosɛbɛ, ko u ye wari fana sɔrɔ u ka baara kɛlen na. Aw bɛ yan sibiri ni kari minnu na, bɛɛ b’a fɛ ka baara kɛ o donw na!” Cɛ dɔ, min fana ye lotɛli kuntigi ye, o ko: “A ka nɔgɔn kosɛbɛ ka baara kɛ ni Jehowa Seerew ye.” Laala e yɛrɛ taamacogo ɲuman de y’a to nin kumaw fɔra. K’a ye ko an ka walew kɛcogo de bɛna ni nin tanuni suguw ye, e ka miiri o bɛ Jehowa nisɔndiya cogo min na bani!—1 Pi. 2:12.
10 “Sokunnasigibaga dannamɔgɔ” sababu fɛ, Jehowa ye fɛɛrɛw tigɛ walisa a ka jama ka lajɛ ka kalan alako ta fan fɛ, san bantuma na. (Luk. 12:42) Ni an ko an bɛ an ka kow labɛn walisa ka ye kɛnɛ kan tile saba kuuru bɛɛ la, o tɛna taa cɛsiri kɔ, nka o ni cɛsiri ka kan. Ɲinan Kafoba ka Jamalajɛ min ye ko “L’obéissance à Dieu” siga t’a la o bɛna dɔ fara an ka cɛsiri kan ka baara kɛ Jehowa ye sisan ani fo abada. An bɛɛ jɔlen ka to a kan ka tugu zaburusɛbɛnbaga ka laadilikan na ko: ‘Aw ka Ala tanu jamaba la.’—Zab. 68:27.
[Box on page 7]
Jamalajɛ kɛwaatiw
Jumadon ni Sibiri don
Sɔgɔma 9:30 – Wulada 5:05
Karidon
Sɔgɔma 9:30 – Wulada 4:10