Tila 2: Ka Bibulu-kalanw ɲɛminɛ minnu bɛ taa ɲɛ
Bibulu-kalan-daminɛ labɛnw
1 Ni i b’a fɛ ka Bibulu-kalan ɲɛminɛ walisa a ka nɔ bɔ, i tɛ dan baro ma gafe kɔnɔnata kan, ka tila ka tɛmɛsiraw lajɛ Bibulu kɔnɔ dɔrɔn. Wajibi don an ka dɔnniya di ni fɛɛrɛ ye min bɛ a to kalanden dusukun bɛ lasɔrɔ. O tɛ taa labɛnba kɔ. Labɛn kɛtɔ, an bɛ an hakili to kalanden na.—Nt. 15:28.
2 Labɛn bɛ kɛ cogoya min na: I bɛ fɔlɔ ka Jehowa deli i ka kalanden ni a magow ko la. A ɲini Jehowa fɛ a k’i dɛmɛ i ka se ka kalanden dusukun lasɔrɔ. (Kol. 1:9, 10) Aw bɛna yɔrɔ min kalan, o sɛbɛnna kun min na, walisa i ka o dɔn tigitigi, i bɛ waati de ta ka jateminɛ kɛ Tila wala kalansen tɔgɔ, ani dakunw tɔgɔw kan. Jaw ani o ɲɔgɔnna dɛmɛfɛn wɛrɛw fana jateminɛ. I yɛrɛ ɲininka: ‘Mun de kama nin yɔrɔ sɛbɛnna?’ O bɛna i dɛmɛ k’i sinsin kalan kolomayɔrɔw kan ka aw to Bibulu-kalan na.
3 Segin dakunw kelen-kelen bɛɛ kan ni timinandiya ye. Ɲininkali minnu kɛlen bɛ, olu jaabi ɲini ka dɔn, i ka tiiri ci kumaden walima kumadenkulu kolomaw kɔrɔ. I ka a fɛsɛfɛsɛ ka a dɔn mun bɛ Bibulu tɛmɛsira sɛbɛnnenw ni dakun yɔrɔ kolomaw cɛ, i ka sɔrɔ k’a latigɛ aw bɛna tɛmɛsiraw minnu kalan Bibulu-kalan waati la. A bɛ se ka kɛ i bɛ sɛbɛnni kunkuruw kɛ sɛbɛnfura kɛrɛfɛ walisa k’i yɛrɛ dɛmɛ. Fo kalanden ka a ye ka jɛya ko ale bɛ ka kalan kɛ Ala ka Kuma de kan.—1 Tes. 2:13.
4 Kalan labɛn ka kɛɲɛ kalanden ma: Sisan i bɛ jateminɛ kɛ kalan kan walisa a ka se ka i ka kalanden mago ɲɛ. Kalanden bɛna ɲininkali suguya minnu kɛ ani yɔrɔ minnu faamuyali bɛna gɛlɛya a ma, walima a tɛna sɔn yɔrɔ minnu ma kalan waati la, kɔn ka i hakili jakabɔ olu kan. I yɛrɛ ɲininka: ‘Kalanden ka kan ka mun de faamuya, walima a ka kan ka yɔrɔ jumɛn de baara a yɛrɛ la walisa a ka se ka ɲɛtaa sɔrɔ alako ta fan fɛ? Ne bɛ se ka fɛɛrɛ jumɛn tigɛ ka a dusukun lasɔrɔ?’ I b’i ka kalan kɛcogo bɛn o ma. K’i to labɛn na, i bɛ na a ye ko misali, wala ɲɛfɔli, wala ɲininkali damadɔw kɛli bɛ se ka kalanden dɛmɛ a ka se ka yɔrɔ dɔ walima Bibulu tɛmɛsira dɔ faamuya. (Ne. 8:8) Aw bɛna kalan kɛ yɔrɔ min kan, o sɛbɛnna kun min na, ni kunnafoniw bɛ i fɛ ka fɔ o kan nafa bɛrɛ tɛ minnu na, kana olu fɔ. A laban na i bɛ segin kokura kalan nafamayɔrɔw kan. O bɛna kalanden dɛmɛ a ka yɔrɔ kolomaw mara a hakili la.
5 Ni mɔgɔ kuraw ye tilennenya jogow don u yɛrɛ la ka Jehowa bato o bɛ an nisɔndiya kosɛbɛ! (Fil. 1:11) Walisa ka u dɛmɛ ka o kɛ, an ka an sɛbɛkɔrɔ labɛn ka sɔrɔ ka taa Bibulu-kalan kɛ.