Tila 12: Ka Bibulu-kalanw ɲɛminɛ minnu bɛ taa ɲɛ
Kalanden dɛmɛ a ka se ka Bibulu-kalanw daminɛ ani ka u ɲɛminɛ
1 Ni an ka kalandenw ye waajuli daminɛ, min bɛ se ka u ja siran, o ye ka u tɔgɔla Bibulu-kalanw daminɛ ani ka u ɲɛminɛ. Cogo di an bɛ se ka kalandenw dɛmɛ walisa u ka miiriya ɲuman ta ka ɲɛsin nin cidenyabaara kolomayɔrɔba in ma?—Mat. 24:14; 28:19, 20.
2 Tuma min na yamaruya bɛ di Bibulu-kalanden ma a ka kɛ weleweledala batisebali ye, a ka c’a la, o tuma b’a sɔrɔ a donna ala-ka-marako cidenyabaara kalan na. Kalansen minnu bɛ di a ma ka baara, a bɛ degeli min sɔrɔ olu labɛnni ani olu kɛli la, o bɛna a dɛmɛ ka karamɔgɔya sekow ni dɔnkow sɔrɔ, olu minnu ka kan ka ye baarakɛla la min bɛ mɔgɔw kɛ kalandenw ye, ‘baarakɛla min ka kɛwalew tɛna a kunmajigin, ani min bɛ tiɲɛkuma walawala ni tilennenya ye.’—2 Tim. 2:15.
3 I yɛrɛ ka kɛ misali ye k’u kalan: Yesu ye kalansira jɛlen ani kɛwale ɲuman kɛ k’a ka kalandenw dege. A y’a fɔ ko: “Kalanden o kalanden kalanna ka se, o na kɛ i ko a karamɔgɔ.” (Luka 6:40) Ni aw bɛ Yesu ladege, ka kɛ misali ɲumanw ye aw yɛrɛ ka cidenyabaara kɔnɔ, o nafa ka bon kosɛbɛ. K’a masɔrɔ aw ka kalanden bɛ to k’aw kɛcogo lajɛ cidenyabaara la, a bɛna a faamu, ko segin-ka-bɔnyew kɛkun ye Bibulu-kalanw daminɛni de ye.
4 A ɲɛfɔ kalanden ye, ko ni an bɛ ka sokɔnɔmɔgɔ ɲininka ni a b’a fɛ ka Bibulu-kalan kɛ, a wajibiyalen tɛ tuma bɛɛ an ka Bibulu-kalan kɛcogo bɛɛ ɲɛfɔ a tigi ye. Tuma caman na, min ɲɔgɔn tɛ, o ye ka kalan kɛcogo ɲɛjira ni dakun kelen wala fila kalanni ye. O dakunw bɛ ta ka bɔ sɛbɛn kɔnɔ, min dabɔra Bibulu-kalan kama. Hakilila ɲumanw dilen bɛ o kɛcogo kan, nin sɛbɛn ɲɛ 8nan na ani san 2002 Zanwuyekalo An ka Masaya Cidenyabaara ɲɛ 6nan na.
5 Ni a bɛnnen bɛ, a ɲini kalanden fɛ a ni e walima a ni weleweledala ŋana wɛrɛ ka taa ɲɔgɔn fɛ Bibulu-kalan wɛrɛw la. Kalan senfɛ, a bɛ se ka ɲɛfɔli dɔ kɛ dakun kan walima Bibulu tɛmɛsira koloma dɔ kan. Nin de kosɔn, ni kalanden bɛ jateminɛ kɛ, a bɛna fɛn caman kalan Bibulu-kalan ɲɛminɛcogo kan, Bibulu-kalan minnu bɛ taa ɲɛ. (Nta. 27:17; 2 Tim. 2:2) Kalanden tanu a ka ko kɛlen na, i ka baro kɛ ni a ye a ka ɲɛtaa sɔrɔ siraw kan.
6 Ni an bɛ weleweledala kuraw dege walisa u ka kɛ Ala ka Kuma karamɔgɔw ye, o bɛna kɛ labɛn ye u bolo walisa u ka se ka “baara ɲuman” kɛ. O “baara ɲuman” ye ka Bibulu-kalanw daminɛ ani ka Bibulu-kalanw ɲɛminɛ minnu ye olu yɛrɛ ta ye. (2 Tim. 3:17) Nisɔndiya don ka baara kɛ ni kalandenw ye nin welekan jɛnsɛnni baara la: “Min b’a fɛ, o ka ɲɛnamaya ji min gansan”!—Jir. 22:17.