Tila 3: Ka Bibulu-kalanw ɲɛminɛ minnu bɛ taa ɲɛ
Ka baara kɛ ni Bibulu tɛmɛsiraw ye walisa ka nɔ bɔ
1 An ka Bibulu-kalanw kun ye ka “mɔgɔw kɛ kalandenw ye”. O la sa, an bɛ u dɛmɛ u ka Ala ka Kuma kalansiraw faamu, ka sɔn o kalansiraw la, ka u waleya u ka ɲɛnamaya kɔnɔ. (Mat. 28:19, 20; 1 Tes. 2:13) O la sa, kalan ka kan ka sinsin Sɛbɛnniw de kan. Kalan daminɛ na, o bɛ se ka kɛ dɛmɛ ye ni i ye a jira kalanden na cogo min na a bɛ se ka tɛmɛsira kɛrɛnkɛrɛnnenw ɲini a yɛrɛ ka Bibulu kɔnɔ. An dun bɛ se cogo di ka Sɛbɛnniw ta ka kalandenw dɛmɛ u ka ɲɛtaa sɔrɔ Alako ta fan fɛ?
2 Tɛmɛsira kalantaw woloma: I ka labɛnw kɛtuma, Bibulu tɛmɛsira kelen-kelen jɔyɔrɔ ye min ye dakun kalanta kɔnɔ o jateminɛ i ka a latigɛ aw bɛna tɛmɛsira minnu kalan ka baro kɛ u kan, kalan waati. A ka ca a la, min ɲininen bɛ an fɛ o ye ka Bibulu tɛmɛsiraw kalan, minnu bɛ a jira ko an ka limaniya sinsinnen bɛ Sɛbɛnniw de kan. Kunnafoni minnu nafa man bon kosɛbɛ, olu bɛ tɛmɛsira minnu kɔnɔ, wajibi tɛ ka o tɛmɛsiraw kalan. Kalanden kelen-kelen magow ani u cogoyaw jateminɛ.
3 Baara kɛ ni ɲininkaliw ye: Sanni i ka Bibulu tɛmɛsiraw ɲɛfɔ kalanden ye, a to a yɛrɛ ka u ɲɛfɔ i ye. O bɛ se ka kɛ ni i ka ɲininkaliw kɛcogo ka ɲi. Ni a sɔrɔla ko Bibulu tɛmɛsira sɛbɛnna kun min na, o faamuyali ka di, i bɛ kalanden ɲininka dɔrɔn a ka a ɲɛfɔ o tɛmɛsira in bɛ dakun kɔnɔkuma kɔkɔrɔdon cogo min na. Dakun tɔw la, i bɛ se ka ɲininkali jɔnjɔn dɔ kɛ walima ɲininkali dama dɔw walisa ka kalanden bila sira kan, a ka se ka jaabi ɲuman sɔrɔ. Ni i y’a ye ko ɲɛfɔliw wɛrɛw ka kan ka kɛ, a to kalanden ka jaabi di, o kɔ i ka o ɲɛfɔliw kɛ.
4 A kɛ ni nɔgɔya ye: Tontigi min tɛgɛ ka di, o tɛ fɛn bon siyɛn fila, a bɛ kalakisɛ kelen dɔrɔn kɛ ka a ka fɛn bonta sɔrɔ. O cogo kelen na, mɔgɔ min bɛ karamɔgɔya ɲɛdɔn kosɛbɛ, o tigi mago tɛ dakuruɲɛ caman na walisa ka ɲɛfɔli ɲuman kɛ. A tigi bɛ se ka kunnafoni lase ni nɔgɔya ye, k’a fɔ ka jɛya, fili tɛ ye a la. Waati dɔw la i ka kan ka ɲininiw kɛ an ka Kerecɛn sɛbɛnw kɔnɔ walisa i ka se ka Bibulu tɛmɛsira dɔ faamu, ka se ka o ɲɛfɔ koɲuman. (2 Tim. 2:15) I kana a ɲini ka Bibulu tɛmɛsira kelen-kelen kɔrɔ bɛɛ ɲɛfɔ, kalan waati. Aw bɛ ka yɔrɔ min lajɛ, tɛmɛsira minnu bɛ aw dɛmɛ ka o faamu kosɛbɛ, olu dɔrɔn de sen don kalan na.
5 A jira baara bɛ kɛ ni a ye cogo min na: Ni a bɛnnen bɛ, kalanden dɛmɛ a k’a ye a bɛ se k’a tɔgɔla baara kɛ ni Bibulu kɔnɔkumaw ye cogo min na. Misali la, ni i bɛ ka Heburu 10:24,25 de kalan ni kalanden ye min ma deli ka na lajɛ la fɔlɔ, i bɛ se ka baro kɛ lajɛ dɔ la kelen kan, ka sɔrɔ ka a ɲini a tigi fɛ a ka to ka na o lajɛ la. Nka i kana a tigi diyagoya. A to Ala ka Kuma ka a bila ka ko kɛ min ka di Jehowa ye.—Heb. 4:12.
6 Cikan dira an ma ka mɔgɔw kɛ kalandenw ye. Ni an bɛ o kɛ, an ka baara kɛ ni Sɛbɛnniw ye ka nɔ bɔ cogo la min ‘b’a to kanminɛli ka kɛ ni limaniya ye.’—Rom. 16:26.
[Study Questions]
1. Mun na ka an to Bibulu-kalan na, an ka kan ka Sɛbɛnniw de sankɔrɔta?
2. An bɛna Bibulu tɛmɛsira minnu kalan ka baro kɛ u kan, an bɛ o koɲɛ latigɛ cogo di?
3. Nafa jumɛn bɛ ɲininkaliw kɛli la, ani ɲininkaliw bɛ kɛ cogo di?
4. An bɛ Bibulu tɛmɛsira minnu kalan, an bɛ se ka olu ɲɛfɔ ka se hakɛ jumɛn na?
5, 6. An bɛ se cogo di ka kalanden dɛmɛ a ka Ala ka Kuma sirataama a ka ɲɛnamaya kɔnɔ, nka an mankan ka mun kɛ?