Masaya weleweledali—Bonyaba dɔ don
1 Fɛn caman bɛ bɔ Jehowa yɔrɔ minnu bɛ an ka ɲɛnamaya kɔkɔrɔdon. Dugukolo kan mɔgɔ miliyari caman bɛ o fɛnw diyabɔ don o don. (Mat. 5:45) Nka, mɔgɔ minnu bɛ bonya kɛrɛnkɛrɛnnen sɔrɔ ka u ka waleɲumandɔn jira u Dabaga la, Ala ka masaya kibaru duman weleweledali fɛ, o mɔgɔw ka dɔgɔ kosɛbɛ. (Mat. 24:14) O bonyaba min b’an bolo nin ye, o ko ka bon an bolo fo k’a se hakɛ jumɛn ma?
2 Masaya weleweledali bɛ bonya da Ala kan, ka jigiya ni hɛrɛ lase mɔgɔw ma minnu dusukasilen bɛ bi waati ferekelenw fɛ. (Heb. 13:15) Mɔgɔ minnu sɔnna cikan na, o bɛ jigiya di o mɔgɔw ma ka ɲɛnamaya banbali sɔrɔ. (Yuh. 17:3) Nin nafa suguw bɛ se ka sɔrɔ dahirimɛɲini baara jumɛn na? Ciden Paul y’a ka cidenyabaara kɛ cogo min na, a y’a jira o fɛ ko a ka cidenyabaara ko tun ka bon kosɛbɛ a bolo. A tun bɛ o mafilɛ i ko nafoloba.—Kɛw. 20:20, 21, 24; 2 Kɔr. 4:1, 7.
3 An ka waleɲumandɔn jira o bonyaba ko la: An bɛ an ka waleɲumandɔn jira o bonyaba ko la, sira min dɔ fɛ, o ye ka an mago don an ka baara la walisa o kɛcogo ka ɲɛ kosɛbɛ. Yala an bɛ waati boloda walisa ka kibaru duman ɲɛfɔcogo dɔ labɛn min bɛna an lamɛnbagaw dusu minɛ wa? Min ye ka baara kɛ ni Sɛbɛnniw ye ani ka hakilijakabɔ kɛ mɔgɔw fɛ, yala an bɛ se ka fɛn dɔ kɛ walisa ka dɔ fara an seko kan o yɔrɔw la wa? Waajulikɛyɔrɔ min dira an ma ka baara, yala an ye o mumɛ bɛɛ baara koɲuman wa? Yala an bɛ Bibulu-kalan daminɛcogo ni a ɲɛminɛcogo dɔn wa? Hakilila ɲuman bɛ an na ka ɲɛsin o baara ma, i n’a fɔ fɔlɔ ani sisan Kerecɛn kantigiw, wa o bonyaba in ko ka bon an bolo kosɛbɛ.—Mat. 25:14-23.
4 Ni kɔrɔya sɛgɛnw bɛ an kan tuma min na, ni an tɛ kɛnɛbagatɔw ye, walima ni gɛlɛya wɛrɛw bɛ an da la waati min na, an bɛ dususaalo sɔrɔ k’a dɔn ko an bɛ cɛsiri minnu kɛ ka an sen don cidenyabaara la, ko olu nafa ka bon kosɛbɛ. An bɛ o cɛsiri sugu minnu kɛ Ala ka baara la, hali ni olu tɛ koba ye mɔgɔ wɛrɛw bolo, Jehowa bɛ nafa don olu la kosɛbɛ. Ala ka Kuma bɛ o daŋaniya di an ma.—Luk. 21:1-4.
5 Masaya weleweledali bɛ nisɔndiyaba de lase mɔgɔ ma. An balimamuso dɔ min si ye san 92 ye, o y’a fɔ ko: “Bonyaba don ne bolo ka miiri ne ka san 80 ni kɔ baara la min kɛra kɛrɛnkɛrɛnnenya la Jehowa ye, wa, nimisa hali kelen tɛ ne na! Ni ne tun bɛ se ka segin n ka denmisɛnninya la ko kura, ne tun na n ka ɲɛnamaya kɛ o cogo kelen na, bawo tiɲɛ na ‘Ala ka makari ka fisa ni ɲɛnamaya ye.’ ” (Zab. 63:4) Nin bonyaba min bɛ bɔ Ala yɔrɔ, n’o ye Masaya weleweledali baara ye, o ka taga a fɛ ka kɛ an bolo ko nafamaba ye kosɛbɛ.