I ka sɔn-ni-sɔn gafeninw jira i ka cidenyabaara kɔnɔna na
1“Sɛbɛnw don minnu kɔnɔkow ka di. Sɛbɛnw don minnu bɛ kuma bi koɲɛw kan, minnu bɛ dusu don mɔgɔw kɔnɔ.” “Ne ma deli ka zurunali kalan min bɛ dusu don mɔgɔ kɔnɔ ka a bɔ.” La Tour de Garde ni Réveillez-vous ! kalanbaga minnu bɛ diɲɛ kɔnɔ, olu bɛ fɛn min miiri o sɛbɛnw kan, o de jiralen bɛ nin kumaw fɛ. Siga t’a la, an ka gafeninw y’a jira k’u ye baarakɛminɛnw ye, dan tɛ minnu nafa la, kibaru duman laseli la ‘mɔgɔ sugu bɛɛ’ ma.—1 Tim. 2:4.
2 Cɛ dɔ, min ka baara ye sanni-feere koɲɛ ɲɛnabɔli ye, o ye Réveillez-vous ! sɔrɔ min barokun dɔ diyara a ye kosɛbɛ. La Tour de Garde min ni o Réveillez-vous ! tun bɛ ɲɔgɔn fɛ, a tilara ka o fana kalan. Barokun dɔ tun bɛ o La Tour de Garde kɔnɔ min y’a bila a ka Sabaya ko sɛgɛsɛgɛ, a tun dalen bɛ o min na kabini tuma jan. O kɛra sababu ye kibaru duman ka diya a ye kosɛbɛ. Kalo wɔɔrɔ o kɔ fɛ, a batisera. Cɛ dɔ wɛrɛ fana tun bɛ Réveillez-vous ! ni La Tour de Garde sɔrɔ tuma bɛɛ, nka a tun tɛ u kalan abada. A muso tun bɛ a mabɔ Jehowa Seerew la, nka sɛbɛn minnu tun bɛ di cɛ ma, muso tun bɛ olu kalan. Layidu min bɛ Bibulu kɔnɔ ko dugukolo bɛna kɛ alijinɛ ye min bɛna fa mɔgɔ tilennenw na, o ye muso dusukun minɛ kosɛbɛ. Waatijan tɛmɛnen kɔ fɛ, muso, a denkɛ ni a dɔgɔmuso bɛɛ kɛra Jehowa ka baarakɛlaw ye.
3 U jɛ k’u di ɲɔgɔn fɛ: Iko misali dilenw y’a jira cogo min na, an tɛ se k’a dɔn jɔni bɛna an ka sɛbɛnw kalan. Sɛbɛnw bɛ se ka o mɔgɔw dɛmɛ cogo min na u ka kibaru duman kanu, an tɛ se k’o fana dɔn. (Ekl. 11:6) O de y’a to, a nafa ka bon kosɛbɛ an ka La Tour de Garde ni Réveillez-vous ! di ɲɔgɔn fɛ, hali ni tuma caman na, an bɛ kuma gafenin kelen dɔrɔn de kan ni an bɛ u jira tuma min na. Waati dɔ yɛrɛ la, a ka ɲi ka gafenin caman di ɲɔgɔn fɛ ni an bɛ taa bɔ mɔgɔ dɔ ye.
4 A ka ɲi an ka don kelen boloda dɔgɔkun o dɔgɔkun walisa ka an sen don gafeninw dili baara la. Calendrier des Témoins de Jéhovah 2005, n’o ye Jehowa Seerew ka san 2005 donjatelan ye, sibiri bɛɛ bilara ‘sɔn-ni-sɔn gafeninw don kama.’ Ikomi sigidaw tɛ kelen ye ani ko an ka cogoyaw fana tɛ kelen ye, dɔw bɛ se ka don wɛrɛ bila an ka zurunaliw dili kama. Yala e ye o baara boloda i yɛrɛ ye dɔgɔkun kɔnɔ wa?
5 Kuntilenna sigi i yɛrɛ ye: Ni an bɛ kuntilenna sigi an yɛrɛ ye ka La Tour de Garde ni Réveillez-vous ! hakɛ dɔ di kalo o kalo, o bɛ se k’an dɛmɛ an ka an cɛsiri kosɛbɛ o gafeninw dili la. Yali mɔgɔ b’i bolo i bɛ to ka taa gafenin nimɔrɔ kuraw di min ma tuma bɛɛ wa? I bɛ mɔgɔ minnu sɔrɔ cidenyabaara la, yala i bɛ gafeninw di u ma wa? Yala i bɛ se ka gafeninw di n’i bɛ waajuli kɛ nbɛda la, jagokɛyɔrɔw la ani forobayɔrɔw la wa? Yala i bɛ gafeninw ta i bolo n’i bɛ taa taama na, n’i bɛ taa sanni na ani n’i bɛ taa ɲɔgɔnyew la wa? N’a bɛnnen don tuma o tuma, baara ɲuman kɛ ni gafeninw ye walisa ka mɔgɔ wɛrɛw dɛmɛ u ka nafa sɔrɔ La Tour de Garde ni Réveillez-vous ! la.
6 Gafenin kɔrɔ minnu b’an bolo, an ka kan k’a kɛ an kuntilenna fana ye ka olu di mɔgɔw ma. Kalo min sɛbɛnnen bɛ gafeninw kan, hali ni gafeninw ma se ka di mɔgɔw ma o kalow kɔnɔ, walima kalo fila, o kalow kɔ fɛ, kunnafoni minnu bɛ sɛbɛnw kɔnɔ, nafa min bɛ olu la, o nafa tɛ ban. U di mɔgɔw ma minnu y’a jira ko kibaru duman ka di u ye. Mɔgɔ miliyɔn caman bolo, La Tour de Garde ni Réveillez-vous ! gafeninw kɛra ‘kuma ye . . . ka bɛn a waati ma.’ (Nt. 25:11) An ka baara kɛ ni o gafeninw ye walisa ka mɔgɔ miliyɔn caman wɛrɛw dɛmɛ u ka Jehowa dɔn, ka baara kɛ a ye.
[Study Questions]
1, 2. La Tour de Garde ni Réveillez-vous ! ye nɔ jumɛn bila mɔgɔw ka ɲɛnamaya la?
3. Nafa jumɛn b’a la ka gafeninw jɛ k’u di ɲɔgɔn fɛ?
4. An bɛ se cogo di ka gafeninw dili baara boloda?
5. An ka kan ka an hakili to waati jumɛnw na walisa ka La Tour de Garde ni Réveillez-vous ! di mɔgɔw ma, ani mun bɛ se k’an dɛmɛ ka o kɛ?
6. An bɛ se ka baara ɲuman kɛ ni La Tour de Garde ni Réveillez-vous ! gafenin kɔrɔw ye cogo jumɛn na?