Aw y’a daminɛ ka baara kɛ n’a ye wa?

¹ K’a daminɛ san 2004 Zuluyekalo la, An ka Masaya Cidenyabaara kɔnɔ, barokun damadɔw bɔra min tɔgɔ ko “Ka Bibulu-kalanw ɲɛminɛ minnu bɛ taa ɲɛ.” O barokunw ye a jira ko nafa bɛ u la, ka mɔgɔw dɛmɛ minnu bɛna kɛ Yesu ka kalandenw ye, u ka se u tɔgɔla dɔnbagaya sira don u ni Jehowa-Ala cɛ. (Rom. 5:1) Sisan an kɛlen kɔ ka barokun 7 kɛ ka ban, yali an y’a daminɛ ka baara kɛ ni fɛn kalannenw ye wa? (Fil. 4:⁠9) An ka yɔrɔ damadɔw filɛ, an ka kan ka an hakili to minnu na, ka an cɛsiri u nɔ fɛ.

² San 2004 Utikalo An ka Masaya Cidenyabaara kɔnɔ, a tun fɔra: [N’i bɛ ka Bibulukalan-labɛn kɛ,] i bɛ fɔlɔ ka Jehowa deli i ka kalanden ni a magow ko la. A ɲini Jehowa fɛ a k’i dɛmɛ i ka se ka kalanden dusukun lasɔrɔ. (km 8/04 1) I hakili tora o la wa? Nafaba de bɛ a la ka waati ta ka Bibulukalan kelen-kelen bɛɛ labɛn an hakili tolen kalanden na. (Nt. 15:28) Aw y’a daminɛ ka baara kɛ ni o hakilinata ye wa? A bɛ se ka kɛ ko i delila k’i yɛrɛ ɲininka, i danna yɔrɔ min na ni kalanden ye, i sigilen kɔ kalanden ɲɛkɔrɔ. O tuma e yɛrɛ de bɛ a fɔ ko: “Hmm. . . an y’a bila yɔrɔ jumɛn de la? I hakili bɛ o la wa?” Yali o delila k’i sɔrɔ wa? Tiɲɛ don, ko o tɛna kɛ ni an bɛ kɔn ka kalan labɛn delili kɔnɔ, an kɛtɔ ka tugu kɛcogow la minnu bɛ An ka Masaya Cidenyabaara kofɔlen la san fɛ.

³ San 2004 Nowanburukalo An ka Masaya Cidenyabaara kɔnɔ, nin tun fɔra: “I ka labɛnw kɛtuma,  . . . i ka a latigɛ aw bɛna tɛmɛsira minnu kalan ka baro kɛ u kan, kalan waati. A ka ca a la, min ɲininen bɛ an fɛ o ye ka Bibulu tɛmɛsiraw kalan, minnu bɛ a jira ko an ka limaniya sinsinnen bɛ Sɛbɛnniw de kan.” (km 11/04 4) I hakili tora o la wa? I y’a daminɛ ka baara kɛ ni o hakilinata ye wa? An ka misali dɔ ta. A ka kɛ ko i n’i ka Bibulu-kalandenw dɔ la kelen, aw bɛ ka dakun fɔlɔ ani filanan kalan Wajibiya gafenin kalansen 5nan la. O kalansen tɔgɔ ye ko “Ala sagonata ye mun ye ka ɲɛsin dugukolo ma?” Ɲininkali min kɛra ka ɲɛsin dakun fɔlɔ ani filanan ma o ye ko “Mun na Jehowa ye dugukolo da?” O dakun fila kɔnɔ Bibulu tɛmɛsira duuru dira: Zaburuw 115:16; Esayi 45:18; Zaburuw 104:5; Eklesiaste (Waajulikɛla) 1:4; Jenɛse 1:28; 2:8, 15. Aw bɛna jumɛn kalan, i n’i ka Bibulu-kalanden? Jumɛn de bɛ sin ka an ka dannaya jira ko Ala sago ye ko hadamadenw ka se “ka ɲɛnamaya diyabɔ [dugukolo] kan fo abada”, iko a fɔlen bɛ cogo min na dakun kɔnɔ?

⁴ A dɔ rɔ i bɛna Esayi 45:18 kalan, ka nin kuma jira: “a y’a dilan, walisa mɔgɔw ka sigi a kan”, ka a jira o cogo la ko Ala tun bɛ a fɛ mɔgɔw ka ɲɛnamaya kɛ dugukolo kan. O kɔ fɛ i n’a sugandi ka Zaburuw 104:​5 kalan, ka i sinsin kumasen nin kan “o tɛna yuguyugu abada”, walisa k’a jira ko mɔgɔw na sigi dugukolo kan fo abada. A laban na, i sinsinnen kumasen nin kan “a ka a sɛnɛ, ka a kɔlɔsi” ka bɔ Jenɛse 2:15 la, a bɛ diya i ye ka a ɲɛfɔ ko hadamadenw tun ka kan ka ɲɛnamaya diyabɔ nin sigiyɔrɔ cɛɲumanba la. Ka i to hakilijakabɔ la ni i ka kalanden ye Bibulu tɛmɛsiraw kan, i ye minnu sugandi, i bɛna a dɛmɛ nin cogo la a ka a faamu ka jɛya, Jehowa sagonata fɔlɔ tun ye min ye, dugukolo ko la. O cogo de la i na baara kɛ ni kumaw ye minnu tun ɲɛfɔlen bɛ An ka Masaya Cidenyabaara kɔnɔ. Siga si tɛ a la ko Jehowa bɛ duga nin ɲɔgɔnna cɛsiriw ye.

⁵ I bɛ i ka Bibulu tɛmɛsiraw ɲɛnatɔmɔ ka bɔ Bibulu tɛmɛsira dilen duuru cɛ ma, ka bɛn i ka waati ma, min bɛ i bolo kalan kama, ani ka bɛn i ka mɔgɔ kalanta ma, ka i ka dannaya kɔkɔrɔdon ko “Jehowa ye nin dugukolo da walasa hadamadenw ka se ka ɲɛnamaya diyabɔ a kan fo abada.”

⁶ Ni i bɛ seginnkanni surun kɛ barokunw kolomayɔrɔw kan, barokun min tɔgɔ ye ko “Ka Bibulu-kalanw ɲɛminɛ minnu bɛ taa ɲɛ”, o bɛ se ka kɛ i bolo dɛmɛ belebele ye, i ka cɛsiriw senfɛ, ka i ka mɔgɔ kalantaw dusukun sɔrɔ. Mun na an t’a to o masalakunw ka kɛ an bololaminɛn ye ni an bɛ Bibulu kalanw kɛ? Siga t’a la, ko o sira fɛ, an ka Bibulu-kalan kɛcogow na ɲɛ ka taga a fɛ, ani an bɛ nisɔndiya sɔrɔ ka mɔgɔw dɛmɛ u ka Jehowa tɔgɔ tanu ni an ye! (Heb. 13:15)