Tila 7: Ka Bibulu-kalanw ɲɛminɛ minnu bɛ taa ɲɛ
Ka delili kɛ kalan waati
1 Walisa Bibulu-kalanden ka se ka ɲɛtaa sɔrɔ Alako la, waajibi don fo a ka Jehowa ka dugawu sɔrɔ. (1 Kɔr. 3:6) O de kosɔn, ni kalan kɔni sigira ka ɲɛ, a bɛnnen bɛ o kalan ka daminɛ ani a ka kuncɛ ni delili ye. Tuma caman na, an bɛ se ka o kɛ kalan daminɛ-daminɛni yɛrɛ la ni mɔgɔw ye diinɛko ka di minnu ye. An ka kan ka jateminɛ kɛ ni kalanden tɔw ye walisa ka a dɔn tuma min na an bɛ se ka delili sen don kalan na. An bɛ se ka Zaburuw 25:4, 5 ani 1 Yuhana 5:14 ta ka kalanden dɛmɛ a k’a faamu mun na a ka kan an ka delili kɛ. An bɛ se fana ka Yuhana 15: 16 ta ka a ɲɛfɔ, nafa min bɛ Jehowa delili la Yesu tɔgɔ la.
2 Jɔni de ka kan ka delili kɛ Bibulu-kalan waati? Ni balimakɛ batiselen dɔ de bɛ balimamuso dɔ bilasira a ka Bibulu-kalan na, o balimakɛ de bɛ delili kɛ, hali ni balimamuso de bɛ Bibulu-kalan ɲɛminɛ a kunkolo datugulen. (1 Kɔr. 11:5, 10) Fan wɛrɛ fɛ, ni balimakɛ weleweledala dɔ bɛ ka balima muso dɔ bilasira, ni o balimakɛ ma batise, balimamuso de bɛ delili kɛ. O tuma na, a bɛ a kunkolo datugu delili kɛtɔ ani Bibulu-kalan kɛtɔ.
3 Mun bɛ se ka fɔ delili kɔnɔ: Delili minnu bɛ kɛ Bibulu-kalan waati, olu man kan ka janya. Ko kɛrɛnkɛrɛnnen de ka kan ka fɔ o deliliw kɔnɔ. An bɛ se ka Ala deli a ka an dɛmɛ kalan waati la ani an bɛ se ka foli lase a ma bawo a ye tiɲɛ dɔnniya lase an ma. Ka fara o kan, a bɛnnen bɛ an ka Jehowa tanu bawo an ka kalan Bɔyɔrɔ ye ale de ye. (Esa. 54:13) An bɛ se ka kumaw fɔ delili kɔnɔ, minnu bɛ a jira ko an bɛ ka an mago don sɛbɛ la an ka kalanden na. Ani an bɛ se ka a jira delili kɔnɔ ko Jehowa bɛ ka baara kɛ ni a ka jɛkuluba min ye, ko an b’a waleɲumandɔn o la. (1 Tes. 1:2, 3; 2:7, 8) Kalanden bɛ ka cɛsiri minnu kɛ walisa a ka se ka dɔnniya sɔrɔlenw sirataama a ka ɲɛnamaya kɔnɔ, ni an bɛ Jehowa deli a ka duba o cɛsiriw ye, o bɛ kalanden dɛmɛ a k’a faamu ko, ka kɛ mɔgɔ ye min bɛ ‘kuma bɔ a sira fɛ’ nafa bɛ o la.—Yak. 1:22
4 Delili nafaw ka ca. Delili bɛ Ala ka dugawu lase an ma. (Luka 11:13) A b’a jira ni barika ye ko Ala ka Kumakan kalanni ye sɛbɛko de ye. Ni kalanden bɛ to ka an ka deliliw lamɛn, o bɛ a dege delili kɛcogo la. (Luka 6:40) Ka tɛmɛ o bɛɛ kan, dusukun min falen bɛ Alakanuya ani waleɲumandɔn na ka ɲɛsin Ala jogow ma, minnu ɲɔgɔn tɛ ɲumanya la, ni o dusukun sugu ye delili kɛ, o bɛ se ka kalanden dɛmɛ a fana ka a tɔgɔla dɔnbagaya sira don a ni Jehowa cɛ.
[Study Questions]
1. (a) Mun na a bɛnnen bɛ Bibulu-kalan ka daminɛ ani a ka laban ni delili ye? (b) An bɛ se ka delili sen don Bibulu-kalan na cogo di?
2. Ni balimakɛ batiselen, walima balimakɛ min ma batise fɔlɔ, o dɔ bɛ ka balimamuso dɔ bilasira, jɔn de bɛ delili kɛ?
3. A bɛnnen bɛ ka fɛn jumɛnw sen don an ka delili kɔnɔ Bibulu-kalan waati la?
4. Ka Bibulu-kalan daminɛ ani ka a laban ni delili ye, o bɛ nafa jumɛnw di?