Baara bɛ kɛ ni sɛbɛn-jiracogo-dilenw ye cogo min na
1 Sɔn-ni-sɔn gafeninw ani sɛbɛn wɛrɛw jiracogow bɛ sɛbɛn tuma bɛɛ An ka Masaya Cidenyabaara kɔnɔ. Ka an to an ka cidenyabaara la, an wajibiyalen tɛ ka segin o jiracogow kan cɔyi i ko a sɛbɛnnen bɛ cogoya min na. Sɛbɛn-jiracogo ninnu dira an ma walisa an ka se k’an ka kuma fɔta dɔn. Ni an bɛ sɛbɛnw jira an yɛrɛ ka kumacogo la, an bɛ se ka nɔ ɲumanba bɔ. An bɛ deli ka kuma cogo min na don o don, n’an bɛ kuma o cogo la ni an lamɛnbaga ye, o b’a hakili sigi ani o b’a jira ko an dalen bɛ an ka kuma fɔta la. O bɛ an ka ŋaniya ɲumanya fana jira.—2 Kɔr. 2:17; 1 Tes. 1:5.
2 I ka jiracogow bɛn i lamɛnbaga ma: Sigida-la-mɔgɔw delikow jɔyɔrɔ ka bon an ka kibaru duman jira cogo la. Yala i bɛ se k’i lamɛnbaga fo fɔlɔ ka sɔrɔ k’i ka sɛbɛn-jira daminɛ wa, walima i ka sigida-la-mɔgɔw b’a fɛ i ka sin k’i nakun fɔ? O bɛ bɔ sigida cogoya la ani o bɛ se ka bɔ hali sigida-la-mɔgɔw kelen-kelen bɛɛ cogoya la. Jateminɛ ka kan ka kɛ ɲininkali kɛcogo fana na. Ɲininkali minnu bɛ se ka bɛn sigiyɔrɔ dɔ mɔgɔw ma, olu bɛ se ka kɛ gasi ye sigiyɔrɔ wɛrɛ mɔgɔw bolo. O de kosɔn, an ka kan ka kow lajɛ ka ɲɛ, ka sɔrɔ ka an ka sɛbɛn-jiracogow yɛlɛma walisa sigida-la-mɔgɔw ka sɔn an ka kuma la.
3 Ka fara o kan, an ka kan ka mɔgɔw bɔyɔrɔ ni u miiricogow jateminɛ an ka forobaara labɛnw kɛtuma na. Misali la, i bɛ se ka baro kɛ Matiyu 6: 9, 10 kan ni Katoliki-diinɛ mɔgɔ ye cogoya min na, i tɛna a kɛ ten ni mɔgɔ ye, min yɛrɛ t’a dɔn ko delili cogoya bɛ yen min tɔgɔ ye ko “An fa.” Ni an kɔnna ka miiri dɔɔnin o ko sifaw la, an bɛ se ka an ka sɛbɛn-jiracogow labɛn walisa u ka diya mɔgɔw ye, an ni minnu bɛ bɛn an ka cidenyabaara waati.—1 Kɔr. 9:20-23.
4 Hali ni a sɔrɔla ko an b’a fɛ ka sɛbɛn-jiracogo-dilenw ta, ka kumakan dɔ fara u kan walima ka u surunya ka sɔrɔ ka baara kɛ ni olu ye, foyi tɛ labɛnkoɲuman bɔ. An b’a fɛ ka barokun walima yɔrɔ min jira mɔgɔw la, an ka kan k’o kalan ni ɲɛmajɔ ye, ka fɛnw lajɛ a kɔnɔ minnu bɛ se ka diya mɔgɔ ye. O kɔ, an bɛ o sen don an ka sɛbɛn-jiracogo kɔnɔ. Kunnafoni min bɛ an ka sɛbɛnw kɔnɔ, ni an ye olu dɔn kosɛbɛ, o dɔrɔn de b’a to an ka se ka u jira mɔgɔw la ni nisɔndiya ye.
5 Kɛcogoya wɛrɛw:Yala an ka kan ka baara kɛ ni sɛbɛn-jiracogo-dilenw dɔrɔn de ye wa? Ayi dɛ. Ni a ka nɔgɔn an ma ka baara kɛ ni sɛbɛn-jiracogo wɛrɛ ye, walima ni Bibulu tɛmɛsira wɛrɛ ye, an bɛ se ka o kɛ. Kɛrɛnkɛrɛnnenya la, ni an b’a fɛ ka sɔn-ni-sɔn gafeninw de jira, an bɛ se k’a ɲini ka gafeninw kɔnɔna barokun wɛrɛw ta minnu bɛ diya sigida-la-mɔgɔw ye, ka an ka sɛbɛn-jira kɛ ni o ye. Forobaara lajɛ waati la, ni ɲɛjirali de bɛ kɛ sɔn-ni-sɔn gafeninw jiracogo kan, an bɛ se ka fɛɛrɛw tigɛ ka ɲɛjiraliw kɛ minnu bɛ nɔ bɔ sigida la. O bɛ an bɛɛ dɛmɛ an ka se ka kibaru duman lase cogoya la min bɛ nɔ bɔ.
[Study Questions]
1. An ka kan ka sɛbɛn-jiracogo-dilenw filɛ ni ɲɛ jumɛn ye?
2. Ni an bɛ ka sɛbɛn-jiracogow labɛn, mun na an ka kan ka sigida-la-mɔgɔw delikow jateminɛ?
3. An bɛ kuma ni mɔgɔ minnu ye, mun na an ka kan ka olu bɔyɔrɔ ni u ka miiricogoyaw jateminɛ?
4. Mun na labɛnkoɲuman nafa ka bon kosɛbɛ?
5. Mun na an bɛ se ka sɛbɛn jiracogo wɛrɛ kɛ, ani an bɛ se ka o kɛ cogo di?