Minnu dalen bɛ Jehowa la, a bɛ olu dɛmɛ

¹ Mɔgɔ caman fɛ, wari, setigiya ani hadamaden bɛ se ka ko minnu kɛ, olu jɔyɔrɔ ka bon kosɛbɛ walisa mɔgɔ ka ɲɛtaa sɔrɔ. (Zab. 12:4; 33:16, 17; 49:7) O n’a ta o ta, mɔgɔ minnu bɛ siran Jehowa ɲɛ, minnu bɛ u ka dannaya da a kan, Bibulu b’a sɛmɛntiya olu ye ko Jehowa ‘ye u dɛmɛbagaw ni u ka nɛgɛ kunbɛnnan ye.’ (Zab. 115:11) An ka yɔrɔ fila lajɛ, yɔrɔ minnu na a ka kan an ka an ka dannaya da Jehowa kan.

² An ka kerecɛn cidenyabaara kɔnɔna na: Ni kalansen dira an ma jɛkulu kɔnɔ walima ni an bɛ ka mɔgɔw kalan foro cidenyabaara la tuma o tuma, an ka kan ka an jigi da Ala kan. An ka Yesu ka misali ta. Hali k’a sɔrɔ a ye Ala Denkɛ ye, a tun m’a jigi da a yɛrɛ ka hakilitigiya walima a yɛrɛ seko kan, nka a y’a jigi bɛɛ da a sankolola Fa kan. (Yuh 12:49; 14:10) Ni ale ye o kɛ, kuma tɛ an ma! (Nt. 3:​5-7) Jehowa ka dugawu dɔrɔn de sababu la an bɛ cɛsiri minnu kɛ ni majigilenya ye, olu na se ka bonya da Jehowa kan, ani ka mɔgɔ wɛrɛw nafa.​—Zab. 127:​1, 2.

³ An b’a jira ko an b’an jigi da Jehowa kan, an kɛtɔ ka a deli walisa a ka an ɲɛminɛ, ka an dɛmɛ ni a ka hakili senu ye. (Zab. 105:4; Luka 11:13) Ka fara o kan, ni an bɛ mɔgɔw kalan, an b’a jira ko an b’an jigi da Ala kan, an kɛtɔ ka an ka kalan sinsin a ka Kuma kan, n’o ye Bibulu ye. Cikan min bɛ a kɔnɔ, se bɛ o ye ka dusu don mɔgɔw kɔnɔ, k’u bila u ka u ka ɲɛnamaya kɛcogo yɛlɛma. (Heb. 4:​12) Ni ‘an bɛ baara kɛ i ko mɔgɔ minnu dulonnen bɛ barika la, Ala bɛ min di,’ o bɛ nɔɔrɔ da Jehowa kan.​—1 Pi. 4:​11.

⁴ Ni an bɛ ka an ka kunkow ɲɛnabɔ: Ni degunkow ni kunkow bɛ an da la, an mago b’a la fana ka an ɲɛsin Jehowa ma walisa ka a ka dɛmɛ sɔrɔ. (Zab. 46:1) Misali la, baaratigi dɔ bɛ se ka siga ka donw di an ma walisa an ka taa jamalajɛ la, walima an bɛ se ka gɛlɛya dɔ sɔrɔ an ka denbaya kɔnɔ. An b’a jira ko an b’an ka dannaya da Jehowa kan, an kɛtɔ k’a sɛbɛkɔrɔ deli, ka tugu a ka laadilikan na, a bɛ o min di a ka Kuma ni a ka jamakulu sababu fɛ. (Zab. 62:9; 119:143, 173) Ni Jehowa ka baarakɛlaw bɛ o kɛ, u bɛ a ka dɛmɛ sɔrɔ u ka ɲɛnamaya kɔnɔ.​—Zab. 37:5; 118:13, 16.

⁵ Jehowa yɛrɛ b’a sɛmɛntiya an ye ko: ‘Mɔgɔ barikama min y’a ka dannaya da Jehowa kan, min ye Jehowa kɛ a jigidayɔrɔ ye, o tigi ye dubaden ye.’ (Jer. 17:⁠7) An k’a jira ko an ka dannaya bɛ a kan an ka ko kɛtaw bɛɛ la!​—Zab. 146:5.