Mɛlɛkɛw bɛ ka an dɛmɛ
1 “A filɛ, ne bɛ to aw fɛ don o don fo nin diɲɛ ka ban.” Nin kumaw bɛ dusu don kosɛbɛ mɔgɔw kɔnɔ, mɔgɔ minnu bɛ tugu Yesu ka ci la ko: ‘O kosɔn, a’ ye taa ka u kɛ kalandenw ye.’ (Mat. 28:18-20) Yesu bɛ to kerecɛn lakikaw fɛ sira nafama min dɔ fɛ, o ye ko a bɛ mɛlɛkɛw bila k’an dɛmɛ. (Mat. 13:36-43) E m’a dɔn ko nisɔndiyakoba don an bolo ko anw ni Ala ka mɛlɛkɛ kantigiw bɛ jɛ ka “abada kibaru duman fɔ” ɲɔgɔn fɛ, an kanw bɛnnen ɲɔgɔn ma!—Jir. 14:6, 7.
2 An ka cidenyabaara kɔnɔna na: Bibulu b’a jira ko Ala ye mɛlɛkɛw ci walisa ka mɔgɔw ‘mago ɲɛ, mɔgɔw minnu bɛna kisili ciyɛn ta.’ (Heb. 1:14) San kɛmɛ fɔlɔ la, mɛlɛkɛw ye Yesu ka kalandenw dɛmɛ k’u ɲɛsin mɔgɔw ma minnu tun ka kan ni a ye. (Kɛw. 8:26) Hali bi fana, Ala ka baarakɛlaw y’a kɔlɔsi ko mɛlɛkɛw bɛ u ɲɛminɛ u ka cidenyabaara kɔnɔna na. Tuma caman na, an taara bɔ mɔgɔ minnu ye, u dɔw y’a fɔ ko u ye dɛmɛ ɲini delili la tuma min na, ko o de kɔ fɛ Seere dɔ nana bɔ u ye. Anw ni mɛlɛkɛw ka nisɔndiya ka bon kosɛbɛ ni o mɔgɔ suguw bɛ sɔn Masaya cikan ma!—Luka 15:10.
3 Ni mɔgɔw bɛ k’an kɛlɛ: Daniɛl ni a jɛɲɔgɔnw, Heburu kamalen saba, ani ciden Piɛrɛ, ani mɔgɔ caman wɛrɛw, olu bɛɛ tɛmɛna kɔrɔbɔlibaw fɛ, nka o kɔrɔbɔliw kɔnɔna na, Jehowa ye u lakana mɛlɛkɛ ‘fangatigi barikamaw’ sababu fɛ. (Zab. 103:20; Dan. 3:28; 6:21, 22; Kɛw. 12:11) Hali ni tuma dɔw la, an b’a ye ko se si t’an ye kɔrɔbɔli dɔ kɔnɔna na, an bɛ se ka dusu sɔrɔ Elise ka baaraden ka misali fɛ, ale min nana a dɔn ko ‘an ɲinw ka ca ka tɛmɛ olu ɲinw kan.’ (2 Mas. 6:15-17) Hali ni u y’an diyagoya fara ka bɔ an balima kerecɛnw la, a kun tɛ an jigi ka tigɛ. Ala ka Kuma b’a sɛmɛntiya an ye ko: ‘Jehowa ka mɛlɛkɛ bɛ daga ka a ɲɛsiranbagaw lamini.’—Zab. 34:8.
4 Mɔgɔ minnu bɛ Krista ka kuntigiya kɛlɛ, yan ni dɔɔnin cɛ mɛlɛkɛ kuluw bɛna olu bɛɛ bɔ yen pewu. (Jir. 19:11, 14, 15) K’a sɔrɔ an bɛ ka o don makɔnɔ, an ka taga a fɛ ka Jehowa tanu ni jagɛlɛya ye, ka an dalen to a la cogo dafalen na, ko sankolola mɛlɛkɛw bɛ ka an kɔkɔrɔdon ni barikaba ye, Krista ka kuntigiya kɔrɔ.—1 Pi. 3:22.