Miiricogo min bɛ Yesu la, aw ka o ladege
1 Hali ni an ma deli ka Ala denkɛ ye an ɲɛ na, sɛbɛnni minnu kɛra Yesu ka ɲɛnamaya ani a ka cidenyabaara kan, olu sababu la a ko nana diya an ye. (1 Pi. 1:8) A ye a Fa kanmɛn k’a ka jɔyɔrɔba bila sankolo la ka na dugukolo kan. A kɛlen hadamaden ye, a ye baara kɛ mɔgɔw ye ani a ye a ka ɲɛnamaya di hadamadenw ka nafa kama, a ma a yɛrɛ ka nafa ɲini. (Mat. 20:28) Ala ka Kuma b’a fɔ an ye ka gɛlɛya ko: ‘Nin miiricogo min fana tun bɛ Yesu la, aw ka o mara.’ An bɛ se ka a ka jɛn-yɛrɛ-kɔ hakilila ladege cogoya jumɛn na?—Fil. 2:5-8.
2 Ni an sɛgɛnnen bɛ: Hali k’a sɔrɔ Yesu tun dafalen bɛ, a tun bɛ sɛgɛn o bɛɛ n’a ta. Waati dɔ la, k’a sɔrɔ a tun ‘sɛgɛnna taama la,’ a ye seereya dafalen kɛ Samarika muso dɔ ye. (Yuh. 4:6) O gɛlɛya sugu bɛ kerecɛn caman kan. Mɔgɔ kɛlen ka baara kɛ dɔgɔkun kɔnɔ fo k’i sɛgɛn, a bɛ se ka gɛlɛya i ka fanga sɔrɔ k’i sen don waajulibaara la. O bɛɛ n’a ta, n’an bɛ to ka o kɛ tuma bɛɛ, an bɛna a ye ko kerecɛnya cidenyabaara bɛ an kuraya alako ta fan fɛ.—Yuh. 4:32-34.
3 Waati wɛrɛ la, Yesu ni a ka kalandenw taara yɔrɔ dɔ la u dan na walisa k’u lafiyɛn dɔɔnin. O bɛɛ n’a ta mɔgɔ camanba y’u taatɔ ye ka u dɔn, ka kɔn ka boli ka taa sigi k’u kɔnɔ. Sanni Yesu ka dimi o la, “u hinɛ donna a la” ani a binna ka u “kalan fɛn caman na.” (Mar. 6:30-34) Miiriya in ɲɔgɔn de bɛ ta ka Bibulukalanw daminɛ ani ka u kɛ. Fo i ka to cɛsiri kɔnɔ ani i ka kanuya sɛbɛ ta ka ɲɛsin mɔgɔw ma. Ni Bibulukalan tɛ i bolo sisan, i kana i fari faga a ɲinini na.
4 Alakow bila i ka kow bɛɛ ɲɛfɛ: Tutigɛbagaya baara bɛ se ka an dɛmɛ an ka se ka an ɲɛdon kosɛbɛ alako baaraw ma. Balimamuso denmisɛn dɔ y’a fɔ ko: “Ne terimuso dɔ bamuso ye dusu don an fila bɛɛ kɔnɔ an ka tutigɛbagaya baara kɛ ni ale ye kalo kelen kɔnɔ. Tiɲɛ na ne nisɔndiyalen don ko an ni a sera ka o kɛ ɲɔgɔn fɛ. O y’a to ne sera ka balimakɛw ni balimamusow dɔn kosɛbɛ wa an ma mɛn o la u kɛra iko sokɔnɔmɔgɔw ye ne bolo. Ne sera ka kuma ni mɔgɔw ye ka caya Jehowa ko la, ka u kalan Masaya ka tiɲɛ kabakomaw la. Nin bɛɛ y’a to ne y’a ye ko ne ni Jehowa ni a ka jɛkuluba cɛ ka surun.”—Zab. 34:9.
5 Kɛlɛ de bɛ an kelen-kelen bɛɛ farisogo dafabali ani an nege cɛ, an ko ka diya Jehowa ye nege. (Rom. 7:21-23) Yɛrɛkolontanya min bɛ diɲɛ in na, an kana sɔn o ka se sɔrɔ an kan. (Mat. 16:22, 23) Jehowa bɛ se ka a ka hakili Senu kɛ ka an dɛmɛ walisa an ka se ka ɲɛtaa sɔrɔ a ko la. (Gal. 5:16, 17) Ka an to kisi makɔnɔni la walisa an ka se ka don diɲɛ kura kɔnɔ, an bɛɛ ka a ɲini ka Yesu ka miiricogo ladege ka Masaya kow ani tɔw ka kow bila an taw ɲɛfɛ.—Mat. 6:33; Rɔm. 15:1-3.
[Study Questions]
1. Miiricogo jumɛn de tun bɛ Yesu la?
2. Gɛlɛya jumɛn bɛ kerecɛn caman kan, ani mun bɛ se ka u dɛmɛ ka o ɲɛnabɔ?
3. Mɔgɔ kalan ŋaniya min bɛ Yesu la, an bɛ se ka o ladege cogoya jumɛn na?
4. Tutigɛbaga farankanya bɛ se ka an dɛmɛ cogo di ka Krista ka miiricogo ladege?
5. Mun na an ka kan ka an cɛsiri kudayi ka Yesu ka miiricogo ladege?