Ala-ka-marako Cidenyabaara Kalanso Dalafɔ-seginnkanni

Ɲininkali ninnu jaabiw bɛna kɛ dalafɔ ye Ala-ka-Marako Cidenyabaara kalanso ka lajɛ la, o min bɛna kɛ Awirilikalo tile 26nan dɔgɔkun kɔnɔna na, san 2004. Kalan lakɔlɔsibaga bɛna seginnkanni ɲɛminɛ sanga 30 kɔnɔ. O seginnkanni bɛna sinsin kalanw kan minnu kɛra k’a ta Marisikalo tile fɔlɔ ka na a bila Awirilikalo tile 26nan na, san 2004. [Kɔlɔsili: Ni ɲininkali dɔ kɔfɛ, sinsin yɔrɔ ma fɔ, i wajibiyalen bɛ ka i yɛrɛ ka ɲininiw kɛ walisa ka jaabiw sɔrɔ.​—École du ministère mafilɛ ɲ. 36-7.]

JƐMU KƐCOGO ƝUMANW

1. Mun na a ka fisa i ka kuma ka pilan dɔ to i bolo ka tɛmɛ jɛmu mumɛ sɛbɛnnen kalanni kan? [be ɲ. 166 d. 3] Ni an kumatɔ b’an sinsin pilan kan, a bɛ nɔgɔya an bolo ka jɛmu kɛ ikomi an bɛ deli ka kuma ni mɔgɔw ye don o don cogo min na, ani ka kuma ni an dusukun ye. Ni an bɛ an jan to an lamɛnbagaw la, u n’a ye ko an bɛ miiri u la tiɲɛ na, ko an b’a ɲini ka an ka kumafɔta kɛɲɛ ni u kunkow cogoyaw ye.

2. An labɛntɔ foro baara kama, an bɛ se ka an ka hakilinataw labɛn cogo jumɛn na walisa o ka kɛ pilan bisigi ye an hakili la? [be ɲ. 167 d. 2] Kunko minnu bɛ an sigida mɔgɔw da la, an ka o dɔ la kelen mara an kɔnɔ. Kuma kɛrɛnkɛrɛnnen ka sɔrɔ an kɔnɔ ka fɔ o ko kan, ani Bibulu tɛmɛsira kelen walima fila. An labɛnnen ka sɔrɔ walisa k’a pereperelatigɛ ko Jehowa ka Masaya min ɲɛmɔgɔya bɛ Yesu Krista bolo, ko o Masaya ye gɔfɛrɛnaman ye min bɛna o kunko ɲɛnabɔ. An ka dusu don an lamɛnbaga la a ka wale kɛ ka bɛn kuma fɔlen ma.

3. Aw ka baara kɛ ni Kɛwalew 13:16-​41 ani Kɛwalew 17:​2, 3 ye ka a ɲɛfɔ, cogo min na Paul ‘ye a da kɛnɛ kan ni dalilu jɔnjɔn ye ko Yesu de ye Krista ye.’ (Kɛw. 9:​22) [be ɲ. 170 d. 2] Yahutuw tun b’a fɔ ko Heburusɛbɛnniw bɛ min fɔ Masiya ko la, ko u sɔnna o ma. Paul fɔlɔla ka bɛnkan sigi o kan. O kɔ, a ye o sɛbɛnni yɔrɔ dɔw ɲɛnatɔmɔ, minnu bɛ Masiya ka ɲɛnamaya n’a ka cidenyabaara kofɔ; Paul tilala k’a jira cogoya min na o kow tiimɛna Yesu ka ɲɛnamaya kɛcogo fɛ. Paul tun b’a lamɛnbagaw dɛmɛ u ka se k’a ye hakilijakabɔ sira fɛ, ko tiɲɛ na, Yesu de ye Masiya ye, wala Krista.

4. Jɛmu balalen nafa dɔw ye jumɛn ye? [be ɲ. 175 d. 1-4] 1) Aw ka fɔta bɛ kɛ kuma ɲɛnama ye min faamu bɛ diya, o b’aw ka kuma diya mɔgɔw ye. 2) Aw ni aw lamɛnbagaw bɛ se ka ɲɔgɔn filɛ kuma senfɛ. 3) U bɛna a ye ko aw bɛ ka min fɔ ko aw b’o dɔn wa ko aw dalen b’o la kosɛbɛ fana. 4) Jɛmu senfɛ, aw bɛ se ka kuma kɛ ka bɛn a sen ma ni kow nacogo ye. 5) Aw na se ka aw hakili bila baara la, o na aw dɛmɛ ka jɛmu kɛ ka bɛn a sen ma, ka hakilina dɔw walawala kosɛbɛ, walima k’aw sinsin dɔ wɛrɛw kan.

5. Jan jumɛn bɛ se ka sɔrɔ aw ɲɛ ni aw bɛ jɛmu balalen kɛ, ani an bɛ se ka mun kɛ walisa k’an yɛrɛ tanga o ma? [be ɲ. 175 d. 5–​ɲ. 176 d. 3] Waati hakɛ min dantigɛra jɛmu yɔrɔ kelen-kelenw fɔli kama, ni an ma olu dan sagon, o bɛ se k’a to jɛmukan bilawaati tɛ an minɛ. Ni an tora majiginnenya kɔnɔ, ka waleɲumandɔn jira k’a sabu kɛ ko jɔyɔrɔba dira an ma walisa an ka jɛɲɔgɔnya sɔrɔ Karamɔgɔba ka kalan bolodalen na, o bɛɛ n’an dɛmɛ walisa an kana farati ka da an yɛrɛ la k’a dama tɛmɛ. Ka i labɛn koɲuman, k’i sinsin Ala ka hakili senu kan, o bɛ mɔgɔ dɛmɛ walisa a kana siran ka ɲinɛ a ka kumafɔtaw kɔ. (Es. 30:20; Rom. 12:6-8).

KALANSEN FƆLƆ

6. Jenɛse 32:24-​32 ka fɔ la, ka Yakuba to san 97 la a ye mun kɛ walisa ka Jehowa ka dugawu sɔrɔ, ani o bɛ an kalan mun na? [w02 1/8 ɲ. 29-​31] Yakuba tun ye Jehowa sago maralen to a hakili la, ciyɛn min ye a ta ye, o tun ka di a ye kosɛbɛ. A ye delili sɛbɛkɔrɔ kɛ walisa ka Ala ka dugawu sɔrɔ, a ye baara kɛ ni daŋaniya ye ka kɛɲɛ ni Ala sago ye. Nin maana b’a jira ko an si mana kɛ hakɛ o hakɛ ye, wala an mana kɛ ka waati hakɛ o hakɛ sɔrɔ Jehowa ka baara la, Yakuba ye cɛsiriwalew minnu bɛɛ kɛ ni kɔnɔnajɛya ye, an bɛɛ nafa b’a la k’olu ladege. Badaa an man kan ka siɲɛta dabila walisa ka baara kɛ Jehowa ye n’an ni bɛɛ ye.

7. “Ka se hakilijakabɔ la” kɔrɔ jumɛn bɛ o la ani a bɛ se ka an tanga cogo di basigibaliya ani dusutiɲɛ fuw ma? (Nt. 1:4) [w02 15/8 ɲ. 21-2] Heburukan daɲɛ min bayɛlɛmara ka kɛ “ka se hakilijakabɔ la” ye, o bɛ bɔ kumasun min na, o sun kɔrɔ ye “k’a ɲaniya jira ka ko dɔ kɛ, ka kokɛta dɔw latigɛ”. Mɔgɔ ka se hakilijakabɔ la, o kɔrɔ ye ka kow ɲɛsigi, ka u kɛcogoyaw ni u kɛsiraw ni u kɔmanaw jateminɛ. Ikomi o “mɔgɔ tɛ yen min tɛ jurumu kɛ,” a man kan ka bala an na ni an balima kerecɛn dɔ la kelen ye an dusukasiko kɛ walima n’a donna an gasi la. O dɔnniya kosɔn, an bɛ se k’an yɛrɛ labɛn o ko sugu kunbɛnni kama, k’an yɛrɛ ɲininka an bɛna min kɛ o tuma la. O b’a to an tɛna mɔgɔ jaabi ni dusubɔ ye, ni dɔ bagara an ma. (1 Mas. 8:46)

8. Foroba-jɛmu fɔbagaw bɛ se ka Bibulu tɛmɛsiraw kɛ u ka jɛmu jusigilanw ye cogo di? [be ɲ. 52 d. 6–​ɲ. 53 d. 5] Sanni a ka dan kuma ni kunnafoni dɔrɔn dili ma, jɛmukan fɔbaga ka kan k’a jilaja k’a jira cogo min na a ka tiɲɛkuma fɔlenw sinsinnen bɛ Sɛbɛnniw kan. A bɛ se ka Bibulu tɛmɛsira dɔw sɛgɛsɛgɛ, ka u ɲɛfɔ u sɛbɛncogo hukumu kɔnɔ, k’u sɛmɛntiya ni misaliw ye, ka u waleya cogo dɔ jira. Foroba-jɛmu fɔbaga bɛɛ ka kan k’u jilaja k’u lamɛnbagaw dɛmɛ u ka se ka Bibulu faamuya, k’a faamu min ni min ka kan ka kɛ ka kɛɲɛ ni Ala sago ye.

9. Jɛmu fɔbaga ka kan ka ko jumɛnw latigɛ ni a bɛ a fɛ ka jɛmu pilan dilen yɛlɛma ka kɛ Bibulu kalan koloma ye? [be ɲ. 54 d. 2-4] Jɛmu fɔbaga ka kan k’a latigɛ a yɛrɛ ye a bɛna waati hakɛ min kɛ hakilinaw ɲɛfɔli la, minnu nafa ka dɔgɔ. Jɛmu yɔrɔ minnu bɛna Ala ka kuma sankɔrɔta, minnu bɛna mɔgɔw bila ka waleɲumandɔn jira ka ɲɛsin Jehowa n’a ka fɛɛrɛ tigɛlenw ma, minnu bɛna jɛmu hakilina kolomaw kɔkɔrɔdon, ani yɔrɔ minnu bɛna lamɛnbagaw nafa kosɛbɛ, a ka kan ka olu lakɔlɔsi.

10. Munna Jehowa ye Israɛl mɔgɔw balo ni manɛ ye dɔgɔkun o dɔgɔkun, kalo o kalo, k’u to kungokolon kɔnɔ, ani an bɛ se ka kalan jumɛn sɔrɔ ka bɔ o la? (Dut. 8:​16) [w02 1/9 ɲ. 30 d. 3-4] Hali ni o dumunifɛn dunni ye dɔw sɛgɛn k’a nege bɔ u la, o n’a ta o ta, Jehowa ye o dumuni wajibiya u kan k’a kɛ iko kɔrɔbɔli bisigi, walisa a ka jama ka majiginnenya kalan, u k’u jigi da ale kan. (Dut. 8:3) Anw fana ka majiginnenya bɛ se ka kɔrɔbɔ ni Jehowa bɛ kunnafoni kuraw di a ka jama kolabɛnni cogo kan, walima n’a bɛ Bibulu tiɲɛkuma lajɛya “Jɔnkɛ kantigi hakiliman” sababu fɛ. (Mat. 24:45-47)

DƆGƆKUN KƆNƆ BIBULUKALAN

11. Jenɛse 37:12-​17 bɛ a jira cogo min na, sumanɲɔgɔnya jumɛn bɛ Yusufu ani Yesu ka siraw cɛ? [w87 1/5 ɲ. 12 d. 12] Hali k’a sɔrɔ a balimaw y’a koniya, o bɛɛ n’a ta Yusufu ye sira minɛ yɔrɔnin kelen walisa ka taga u dɛmɛ. (Jen. 37:5-11) O cogo kelen na, Yesu sɔnna ka ci kɛ ni nisɔndiya ye Jehowa ye ci min kalifa a la dugukolo kan, hali n’o tun bɛna tɔɔrɔbaw lase a ma.

12. An b’a ye cogo min na Jenɛse 42:25-​35 ka fɔ la, Yusufu ye makari jira cogo di iko Yesu? [w87 1/5 ɲ. 18 d. 10; ɲ. 19 d. 17] A kɛlen ka sɛgɛsɛgɛli kɛ k’a ye ko a fadenw nimisara tiɲɛ na, Yusufu makarila u la k’u ka bɔrɛw fa suman kisɛ la, k’u ka wari segin u ma, ka dumuni di u ma u bɛ min dun u ka dugutaga sen fɛ. Bi, Yesu bɛ makari “saga tɔw” la, ka i janto u la. (Yuh.10:16)

13. Jɔnkɛ kantigi bɛ dumuni min di bi, o ni Yusufu ka ɲɔ tilali bɛ suman ni ɲɔgɔn ye sira jumɛn fɛ? (Jen. 47:21-​25) Yesu ka ɲɛmɔgɔya kɔnɔ, ale min ye Yusufukɔrɔba ye, jɔnkɛ kantigi b’a seko bɛɛ kɛ —k’a sɔrɔ a ma Sɛbɛnniw ka ko yamaruyalenw dan sagon— walisa Jehowa Seerew ani tiɲɛ kanubagaw ka Alako dumuni ɲɛnama sɔrɔ. Jɔnkɛ ye jɛkuluw fana kolabɛn, ka Bibulu ɲɛfɔli-sɛbɛn camanba di olu ma walisa foro min kalifara u la, u ka o sɛbɛnw jɛnsɛn o foro la. [4, w87 1/5 ɲ. 15 d. 3-4]

14. A kɛlen ka a fɔ “Ne bɛ kɛ min ye ne na kɛ o ye” Jehowa tun bɛ ka mun jira kɛnɛkan a tɔgɔ ko la? (Ek. 3:​14, 15) Jehowa ye a tɔgɔ kɔrɔ jira. O kuma kɔrɔ ye ko a sagonakow tiimɛni bɛ se ka fɛn o fɛn waajibiya, Jehowa bɛ kɛ o ye. A tun bɛna kɛ fɛn ye Min bɛ a ka layiduw fa cogo la, Israɛlkaw bɛnbaw tun ma min dɔn. (Ek. 6:2, 3) [5, w95 1/3 ɲ. 10 d 6]

15. Farati fila jumɛn bɛ sɔrɔ dajukɔrɔ kuma fɔli kɔnɔ ni o bɛ Ekisode 16:​2, 3 la? [w93 15/3 d. 21] A fɔlɔ ye ko dajukɔrɔ kuma bɛ iko bana min bɛ se ka yɛlɛma mɔgɔ wɛrɛ la. A filanan: min bɛ ŋunan tɔw kɔrɔ, tuma caman o tigi bɛ a ko juguya. Israɛlkaw ka ko la, olu y’a fɔ ko u cogoya tun na fisaya Misira jamana la k’a masɔrɔ nburu hakɛ ni sogo hakɛ min ka di u ye, u tun na se ka o dun yen. U ŋunanna k’a fɔ ko taga-kɛra n’u ye kungokolon na walisa dɔrɔn u ka sa kɔngɔ fɛ.