An ka fara ɲɔgɔn kan ka Jehowa bato
1 Jehowa barika bɛ se ko bɛɛ la, a ka hakilitigiya ka bon fo o tɛ se ka dɔn ka ban, a dafalen don tilennenya la, ani a yɛrɛ de ye kanuya ye. Ale kelenpe de ka kan ni an ka bato ye k’a masɔrɔ ale de ye Dabaga ye, ale de ye Ɲɛnɛmaya Dibaga ye, ani ale de ye dunuya bɛɛ masaba ye. (Zab. 36:9; Jir. 4:11; 15:3, 4) Kafoba ka jamalajɛ “An ka nɔɔrɔ da Ala kan” min bɛna kɛ fonɛnɛ la, o bɛna dɔ fara an ka ŋaniya kan ka Jehowa bato i ko Ala sɛbɛ kelenpe.—Zab. 86:8-10.
2 A tɛ taa labɛn koɲuman kɔ: Jehowa ye dumuniba labɛn an ye hakili ta fan fɛ. Walisa an ka nafa sɔrɔ o la ka se a dan na, fo an ka an labɛn koɲuman. (Efɛ. 5:15, 16) An jatigila ni an taacogo koɲɛw ɲɛnabɔra kaban wa? Jamalajɛ bɛna waati min ta an ka baarakɛdonw ni an ka lakɔlikɛdonw na, o kow fana ɲɛnabɔra wa? Aw kana o sɛbɛkow ɲɛnabɔli bila ka jamalajɛ don makɔnɔ. N’aw sumayara ka lafiyɛnbɔtuma ɲini aw ka baarakɛyɔrɔ la walima lakɔli la, o bɛ se ka kɛ sababu ye aw ka nin ninsɔndiya ko yɔrɔ dɔw jɛ. An bɛɛ wajibiyalen don ka ye jamalajɛ kalan bɛɛ la.
3 A kɛ i kuntilenna ye, ka kɔn ka na jamalajɛ kɛyɔrɔ la. I na se k’i sigiyɔrɔ labɛn yanni lajɛ-daminɛ-dɔnkili ka se. O bɛna i dɛmɛ i hakili sigilen ka se ka kumaw lamɛn. Jamalajɛ kɛyɔrɔ daw bɛna yɛlɛ 8h:00 don o don sɔgɔma. An bɛ se ka sigiyɔrɔw maminɛ an ka denbaya ye, walima an ni minnu bɛ taama ɲɔgɔn fɛ, nka an kana tɛmɛ o kan.
4 A ɲininen bɛ bɛɛ fɛ, an ka na ni tilelafana ye an yɛrɛ bolo walisa an kana bɔ kɛnɛma ka taa dumuni san. O bɛna ni lafiya ye lajɛkɛyɔrɔ la, ka fara o kan an ni an balima dannabagaw bɛ fɛrɛ ko caman na. (Zab. 133:1-3) An kana ɲinɛ ko a dagalen tɛ ka na lajɛkɛyɔrɔ la ni minɛnw ye minnu dilanna ni wɛrɛ ye ani dɔlɔw.
5 Lamɛnni kɛ i ka dɔnniya sɔrɔ: Delili kɔnɔ, Esdrasi ye a dusukun sɛbɛkɔrɔ labɛn walisa a ka sɔn Ala ka kuma na. (Esdrasi 7:10) A y’a dusukun sin Jehowa ka kalansiraw ma. (Nt. 2:2) An bɛ se ka an dusukun labɛnni daminɛ hali k’a sɔrɔ an ma bɔ so fɔlɔ, ni an b’an hakilijakabɔ kafoba ka jamalajɛ tɔgɔ kan, ka baro kɛ ni an ka denbaya ye a ko la.
6 Lajɛkɛyɔrɔba kɔnɔ, an ɲɛ bɛ se ka ko caman ye ani an tulo bɛ se ka fɛn caman mɛn, minnu bɛ se ka an bali an k’an ɲɛmajɔ kalan fɛ. O ko ninnu bɛ se ka an hakili ta ka bɔ kumakɛbaga kan. Ni o kɛra, kunnafoni nafama caman bɛ pan an tulo kan. Tiiri kɛlen bɛ ka hakilila minnu lamini, olu bɛ se ka an dɛmɛ ka dɔ fara an ka ɲɛmajɔ kan.
7 Mɔgɔ tɔw bɔnya: Fotow bɛ se ka ta ni fotota kamera ye lajɛ tumaw na, nka aw k’a kɛ cogo bɛɛ la aw kana tɔw bali lamɛnni na. Aw ka fotow ta, ka aw to aw sigiyɔrɔ la. Aw k’a jija walisa aw ka telefɔni pɔrutabuluw (selilɛriw) ani aw ka bipɛriw kana mɔgɔw tɔɔrɔ. Tɔgɔla mansin si man kan ka don lajɛkɛyɔrɔ kuran na walima ka nɔrɔ juruw la, kumakan bɛ tɛmɛ juru minnu fɛ.
8 Siga t’a la ko a ka di an bɛɛ ye ka fara ɲɔgɔn kan, ka Jehowa bato! An bɛɛ ka an jija ka nɔɔrɔ da Jehowa kan, ka na lajɛ la tuma bɛɛ la, ka lamɛnni kɛ ni ɲɛmajɔ ye, ka an ka fɛn kalannenw waleya an ka ɲɛnamaya kɔnɔ.—Dut. 31:12.
[Study Questions]
1. Tɔgɔ jumɛn bɛ kafoba ka jamalajɛ la? Mun na Jehowa ni an ka bato ka kan?
2, 3. Labɛn koɲuman bɛ an dɛmɛ ka lajɛw nafaw bɛɛ sɔrɔ cogoya jumɛn na?
4. Mun na a ɲininen bɛ an bɛɛ fɛ an ka na ni tilelafana ye jamalajɛ kɛyɔrɔ la?
5. Tuma jumɛn na an bɛ se ka an dusukun labɛnni daminɛ kafoba ka jamalajɛ kama?
6. Mun bɛ se k’an dɛmɛ k’an ɲɛmajɔ jɛmukanw fɛ? (tiiri kɛlen bɛ ka sɛbɛnni minnu lamini, olu lajɛ)
7, 8. An bɛ se ka tɔw bonya cogo jumɛn na ?
[Box on page 3]
An lamɛnnikɛtɔ Lajɛba tuma na
▪ Miiri kosɛbɛ jɛmukanw tɔgɔ la.
▪ Bɛɛ bɛ Bibulu tɛmɛsiraw ɲini tuma min na, i fana ka a ɲini ni u ye.
▪ Kunnafɔni surumanw sɛbɛn.
▪ I ka kan ka jɛmukan yɔrɔ minnu waleya, olu sɛbɛn a dan ma walima sɛbɛncogo wɛrɛ la ka bɔ i ka sɛbɛnni tɔw la.
▪ I ye dɔnniya minnu sɔrɔ, segin olu kan.