Alako-ta-fan-fɛ dumuni a dituma na

¹ Matigi Jehowa ko: ‘Ne n’a fɔ ko sɛnɛfɛnw ka ɲɛ ka caya, ne tɛna kɔngɔ bila aw la tun.’ (Eze. 36:29) Nin kirayakumaw bɛ tiimɛ Ala ka jamakulu kan bi. N’an bɛ se k’a fɔ ni kɔrɔ ye, Jehowa y’a kɛ sɛnɛfɛn minnu bɛ ɲɛnamaya kɔkɔrɔdon, olu ka ɲɛ, wa, olu ka caya a ka jamakulu ye. O bɛ ye cogo jɛlɛn na an ka Kafoba ka jamalajɛw la, minnu bɛ alako-ta-fan-fɛ dumuni di an ma a dituma na.

² Kafoba ka jamalajɛ min kɛra Kolumbus, Ohio, san 1931, Jehowa ye a batobagaw ɲɛminɛ u ka tɔgɔ kura ta​—Jehowa Seerew. (Esa. 43:10-12) San 1935, jamaba min kofɔra Jirali 7:9-17 la, o faranfasiyara cogo jɛlen na. San 1942, balimakɛ Nɔr ye jɛmukan dɔ di min tɔgɔ ye ko “La paix de demain sera-t-elle de longue durée ?” O jɛmukan ye fangaba di diɲɛ bɛɛ waajulibaara ma, ka na ni lakɔli dayɛlɛli ye min tɔgɔ ye ko: Guiléad, l’École biblique de la Société Tour de Garde. Hali ni Kafoba ka jamalajɛ dɔw bɛ yen minnu bɛ to mɔgɔ hakili la, u kelen-kelen bɛɛ ye alako-ta-fan-fɛ dumuni caman de ye min dira a dituma na.​—Zab. 23:5; Mat. 24:45.

³ Aw bɛ dumuni kɛ ka ɲɛ wa? Dumuni camanba bɛ se ka an lamini, nka, an balocogo tɛ ɲɛ ni an tɛ an jija ka dumuni kɛ. (Nt. 26:15) A bɛ ten fana alako-ta-fan-fɛ. A kɔlɔsila ko Kafoba ka jamalajɛ dɔw la, ka kalan to sen na, mɔgɔ caman bɛ yaala-yaala jamalajɛ kɛyɔrɔ la ten, walima u bɛ baro kɛ mɔgɔ wɛrɛw fɛ. Tiɲɛ don ko ka jɛɲɔgɔnya ɲuman diya bɔ anw ni ɲɔgɔn cɛ, o jɔyɔrɔ ka bon kosɛbɛ Kafoba ka jamalajɛ la, nka, o kɛwaati ɲuman ye sanni kalan ka daminɛ ani kalan bannen kɔ fɛ. (Ekl. 3:1, 7) Ni an sigilen tɛ an sigiyɔrɔ la, ani ni an ma an tulomajɔ sɛbɛ la, kuma kolomayɔrɔ dɔ bɛ se ka tɛmɛ an kan. Lakɔlɔsibaga minnu bɛ Kafoba ka jamalajɛ kow ɲɛnabɔli la ani baara dɔw dira balimakɛ minnu ma, tuma dɔw la olu bɛ se k’a ye ko nafa b’a la ka kuma jamalajɛ koɲɛ dɔw kan, k’a sɔrɔ kalan bɛ sen na. Nka k’a bɔ o la, u ka kan ka kɛ ɲɛjirabaga ɲumanw de ye, min ye k’u ɲɛmajɔ kosɛbɛ kalan fɛ. Alako-ta-fan-fɛ dumuni min bɛ di jamalajɛ la, an si man kan k’o yɔrɔ si jɛ.​—1 Kɔr. 10:12; Fil. 2:12.

⁴ Jehowa bɛ alako-ta-fan-fɛ dumuni min di an ma, n’o ye tiɲɛkumaw ye, ni an ye olu suma ni Kerecɛnte ka kalansira fuw ye minnu tɛ mɔgɔ balo, an ka kan ka nisɔndiya kosɛbɛ dɛ! (Esa. 65:13, 14) An bɛ se k’a jira ko an ye ‘ɲumandɔnbagaw ye’ sira min fɛ, o ye ka Kafoba ka jamalajɛ mafilɛ fɛɛrɛ dɔ ye, Jehowa b’an kalan min fɛ. (Kol. 3:15) Balimakɛ min bɛ ka jɛmukan kɛ, an kana dan ale filɛli ma. An ka an tulomajɔ kosɛbɛ a ka kumaw la. A bɛ kuma minnu fɔ, an ka olu jate iko cikan min bɛ bɔ an ‘Karamɔgɔba’ yɔrɔ. (Esa. 30:20, 21; 54:13) Aw ka aw tulomajɔ kosɛbɛ yɛrɛ de. Yɔrɔkoloma minnu bɛ fɔ, aw ka olu sɛbɛn. Kalan min bɛ kɛ don o don, aw ka o kalan kolomayɔrɔw lajɛ ko kura su o su. Aw ye min kalan, aw ka taama o kɔnɔ.

⁵ Sanni Armagedɔn ka na, Kafoba ka jamalajɛ mana kɛ yɔrɔ o yɔrɔ la, a kɛra yɔrɔ ye mɔgɔw bolila kɛlɛ ɲɛ ka taa sigi yɔrɔ min na wo, walima kɛlɛ bɛ ka jamana min farafara wo, walima kɛlɛ tɛ yɔrɔ min na wo, o jamalajɛ kelen-kelen bɛɛ ye sesɔrɔli de ye Sitanɛ kan. Ikomi an ye balimaw ye kelenya bɛ minnu cɛ ma, cogo minnu b’an bolo ka an fara ɲɔgɔn kan ka kɛ kulu kelen ye Kafoba ka jamalajɛw la, olu ka di an ye kosɛbɛ. (Eze. 36:38) An dalen b’a la ko Jehowa ka kanuya kɔnɔ, a bɛna “dumuni di” an ma tuguni “a dituma na.”​—Luka 12:42.

[Study Questions]

1. Ezekiɛl 36:29 bɛ ka tiimɛ cogo jumɛn na bi?

2. Jehowa ye Kafoba ka jamalajɛw kɛ baarakɛminɛn ye cogo jumɛn na walisa ka alako-ta-fan-fɛ dumuni di a dituma na?

3. An ka kan ka mun kɛ walisa ka nafa sɔrɔ alako-ta-fan-fɛ dumuniba la min bɛ di an ka Kafoba ka jamalajɛ la?

4. Jehowa bɛ alako-ta-fan-fɛ dumuniba min di an ma, an bɛ se k’a jira cogo di ko an ye ɲumandɔnbagaw ye o ko la?

5. Kafoba ka jamalajɛw bɛ kun jumɛnw di an ma k’an nisɔndiya?

[Box on page 4]

Aw ka waleɲumandɔn jira Jehowa ka dumuni ko la

◼ Aw ka aw tulomajɔ sɛbɛ la

◼ Aw ka kalan kolomayɔrɔw sɛbɛn

◼ Su o su, aw ka don kalan lajɛ ko kura

◼ Aw ye min kalan, aw ka taama o kɔnɔ