Kafo ka jamalajɛ kalan bolodalen kura
1 An Makɛ Yesu y’a fɔ ko a ka kalandenw bɛna tɔɔrɔ. (Mat. 24:9) An hakilila ka kan ka kɛ mun ye kɔrɔbɔlikow kan? Mun bɛna an dɛmɛ walisa an ka se ka muɲu tɔɔrɔ la? San 2004 Kafo ka jamalajɛ kalan bolodalen bɛna o ɲininkaliw jaabi. O kalan bolodala ka ɲɛsin nin waati ma: K’a ta Sɛtanburukalo san 2003 la ka na a bila Utikalo san 2004 la. Kafo ka jamalajɛ kumakun ye ko: ‘Aw ka ɲagali jigiya kɔnɔ, ka muɲu tɔɔrɔ kɔnɔ.’—Rom. 12:12.
2 Jɛmukan fila tilalen ka kɛ naani ye: O fɔlɔ tɔgɔ ye ko: ‘An ka kɛwale ɲumanw kɛ.’ An bɛ se ka kɛwale ɲuman minnu kɛ, o bɛna o ɲɛfɔ. Weleweledala caman b’a to u hakili la ko ka mɔgɔw waaju, k’u kalan, o ye baara ye min tɛ se ka bila ka sumaya. O weleweledalaw bɛ o kɛ cogo min na, u bɛna ɲininka o la. Bangebagaw bɛna ŋaniya kɛrɛnkɛrɛnnenya la k’u tulomajɔ kosɛbɛ nin jɛmukan na: “Ni Jehowa bɛ ka an kolo tuma min na.” Bangebagaw bɛ se ka hakilijakabɔ kɛ u denw fɛ cogo min na, jɛmukan bɛna o jira. An ka kan ka mun kɛ walisa diɲɛ kana nɔ jugu bila an na dɔɔnin dɔɔnin, ka kɛ sababu ye an kana kɛwale ɲumanw kɛ tun, kumana laban bɛna sinsin o kan.—Mar. 4:19.
3 O filanan tɔgɔ ye ko: ‘An ka kan ka boli min kɛ, an ka o kɛ ni muɲuni ye.’ O bɛna jira an na ka jɛya ko an ka boli ɲɛnamaya kama, o bɛ iko ɲɔgɔndan boli. Mun na an ka kan ka boli ka kɛɲɛ ni sariyaw ye? An bɛ se ka doni bɛɛ fili ka bɔ an kunna cogo di walisa an kana sɛgɛn an ka boli la ɲɛnamaya kama? Laadilikan minnu bɛ bɔ Bibulu kɔnɔ, ni olu bɛ di an ma a tuma na, olu bɛna an bɛɛ dɛmɛ walisa an ka t’a fɛ ka boli ni muɲuni ye.
4 Muɲuni b’a to an bɛ Ala ka mandiya sɔrɔ: Jɛmukan minnu bɛna kɛ kafo lakɔlɔsibaga taamakɛlaw fɛ, olu bɛna kɛ fɛnw ye minnu bɛna mɔgɔw ka dannaya kologɛlɛya, mɔgɔ minnu bɛ laadilikan mɛn, ka tugu o la. Kafoba lakɔlɔsibaga ka jɛmukan dɔ tɔgɔ ye ko: ‘Muɲuni bɛ na ni mandiya sɔrɔli ye.’ Foroba jɛmukan bɛna nin ɲininkaliw jaabi: Siyaw bɛna u jigi da jɔni tɔgɔ kan? O tɛ taa mun kɔ? Jɛmukan laban ye “Aw na aw yɛrɛ niw sɔrɔ aw ka muɲuni fɛ.” Yesu sera cogo min na ka tilenbaliyako muɲu k’a sɔrɔ a ma kumu mɔgɔ kɔrɔ, jɛmukan bɛna o ɲɛfɔ.
5 Aw kana ɲinɛ ka na ni École du Ministère gafe ye ani La Tour de Garde ye fana min bɛna kɛ o dɔgɔkun na. Aw ka fɛnw sɛbɛn minnu bɛna aw dɛmɛ k’aw tulomajɔ. Aw bɛna se k’o fɛn sɛbɛnnenw lajɛ kɔ fɛ. Kafo ka jamalajɛ kalanbolodalen seginnkanni bɛna kɛ kɔ fɛ jɛkulu kɔnɔ.
6 Jehowa yɛrɛ de ye nin dumuniba labɛn an ye walisa k’an balo hakili ta fan fɛ. Aw ye na dumuni kɛ! An na ɲagalikan bɔ, ni an yera jamalajɛ kɛyɔrɔ kɛnɛkan, ka nafa sɔrɔ kalanbolodalen kuuru bɛɛ la.—Esa. 65:14.