Ka waajuli kɛ ɲɔgɔn fɛ, o bɛna ni nisɔndiya ye
1 Tuma min na a ye kalanden 70 bila ka taa waajuli kɛ, Yesu y’u kalan kuma fɔtaw la, k’u tila mɔgɔ fila-fila, ka wajulikɛyɔrɔ dantigɛ u ye. O kɛra nisɔndiya ye u bolo. (Luka 10:1-17) O cogoya kelen na bi, ka jɛ ka waajuli kɛ, o bɛ Ala ka jama dɛmɛ a ka minɛnw sɔrɔ, ka a labɛn ani ka dusu don a kɔnɔ waajulibaara kama.
2 Diinɛ maakɔrɔw bɛ a ɲɛmɔgɔya ta: Diinɛ maakɔrɔw bɛ jɔyɔrɔ koloma la walisa ka bɛɛ dɛmɛ ka waajulibaara kɛ tuma bɛɛ. Foro baara lakɔlɔsibaga de bɛ fɛɛrɛw tigɛ walisa ka waajuli boloda dɔgɔkun kɔnɔ. Gafe-kalan lakɔlɔsibaga kelen-kelen bɛɛ de bɛ waajuli boloda a ka gafe-kalan kulu kɔnɔ, kɛrɛnkɛrɛnnenya la sibiri donw ani kari donw na. Tuma min na jɛkulu mumɛ bɛ fara ɲɔgɔn kan foro baara kama, misali la La Tour de Garde kalan kɔfɛ, gafe-kalan lakɔlɔsibaga kelen-kelen bɛɛ de bɛ a janto a ka kulu la.
3 ‘Cogo bɛnnen na, ɲɛnabɔ koɲuman na’: Min ɲɛnatɔmɔna ka kɛ forobaara ɲɛminɛbaga ye, o ka kan ka lajɛ daminɛ a waati la, k’a lajɛ waati dan sanga 10-15 ma. A ɲuman ye a ka tila-tilali kɛ, ka waajulikɛyɔrɔ dantigɛ (fo ni a sɔrɔ la gafe kalan lakɔlɔsibaga de bɛna o kɛ i na a fɔ a fɔra cogo min na ka tɛmɛ), yanni a ka lajɛ kuncɛ ni delili ye. O b’a to weleweledalaw tɛ ton ɲɔgɔn kan waajulikɛyɔrɔ la, o dun bɛ se ka bonya bɔ an ka baara kan. O bɛnnen bɛ Paul ka kuma fɔlen ma ko: ‘Fɛn bɛɛ ka kɛ cogo bɛnnen na, ɲɛnabɔ koɲuman na.’ (1 Kɔr. 14:40) Mɔgɔ o mɔgɔ bɛ na waajuli lajɛw la, olu bɛɛ ka kan ka u sen don a ko ɲɛtaa la, ka na ka bɛn ni waati ye, ka lajɛ ɲɛminɛbaga dɛmɛ cogo bɛɛ la, ani ka sin ka taa waajuli la labilali mana kɛ kaban.
4 Kafolen ɲɔgɔn kan kelenya kɔnɔ: Fɛɛrɛ minnu tigɛra walisa mɔgɔw ka waajuli kɛ ɲɔgɔn fɛ, olu ye cogo ɲumanba ye an bolo walisa an ka se ka tɔw dɔn jɛkulu kɔnɔ. Hali ni mɔgɔ tɛ ban an ni mɔgɔ wɛrɛw ka bɔli boloda ɲɔgɔn fɛ, nafa b’a la fana ka waajuli lajɛw matarafa k’a sɔrɔ an ma bolodali si bila ɲɛfɛ. A bɛ se ka kɛ an ni mɔgɔ dɔ bɛ bila ka bɔ ɲɔgɔn fɛ foro kɔnɔ, an tɛ min dɔn kosɛbɛ, o bɛ cogoya di an ma, ka “an yɛrɛ dayɛlɛ tɔw ye” an ka kanuya kɔnɔ.—2 Kɔr. 6:11-13.
5 Ka jɛ ka waajuli kɛ ɲɔgɔn fɛ, o bɛ dusu don an na, ka an kafo ɲɔgɔn kan, ka kɛ ‘jɛɲɔgɔnw ye tiɲɛ baara kɛli la.’ (3 Yuh. 8)