Waleɲumandɔn ka ɲɛsin Ala ka makari ma

¹ Sanni a ka kɛ kerecɛn ye, ciden Paul tun ye kerecɛnya ka ɲɛtaa jugu belebele ye. Nka, Jehowa makarila a la, k’a masɔrɔ a tun bɛ kodɔnbaliya la. Mɔgɔ si ni ɲumanya min ka kan, Jehowa ye o ɲumanya jira. O kama waajulibaara nafamaba dira Paul ma. A y’o baara jate nafoloba ye. (Kɛw. 26:​9-18; 1 Tim. 1:​12-​14 ) Jehowa ka makari waleɲumandɔn ye dusu don Paul kɔnɔ, a ka a yɛrɛ bɛɛ di cidenyabaara ma, k’a kɛ ka dafa.​—⁠2 Kɔr. 12:15.

² Ala makarila an na ka cidenyabaara di an fana ma. (2 Kɔr. 4:⁠1) I n’a fɔ ciden Paul, an bɛ se k’a jira ko an bɛ Jehowa waleɲumandɔn a ka makari ko la, ni an bɛ an jija ka tɔw dɛmɛ u ka ɲɛtaa sɔrɔ alako ta fan fɛ. A cogoya dɔ ye ka Bibulu-kalanw daminɛ mɔgɔw kun, ka to k’o kalanw ɲɛminɛ.

³ Ka Bibulu-kalanw daminɛ: Bibulu-kalanw bɛ se ka daminɛ sira min fana fɛ, o ye ka mɔgɔw sɔrɔ, sɔn-ni-sɔn gafeninw ka di minnu ye sɛbɛ la, ani ka to ka o gafeninw di u ma. Ni an bɛ taga bɔ u ye tuma bɛɛ, ka gafenin kuraw di u ma, an na se ka u haminankow dɔn. Donw senfɛ, sɔn-ni-sɔn gafenin barokun dɔ la kelen bɛ se ka sira dayɛlɛ walisa ka Bibulu-kalan daminɛ Wajibiya gafe kɔnɔ. Sɔn-ni-sɔn gafenin wɛrɛw di tuma, anw na se ka tɛmɛ ni baro ye Wajibiya gafe kɔnɔ.

⁴ A tɛ taga delili ani jija kɔ: N’an ye delili fara timinandiya kan, o bɛ an ka waajuli sankɔrɔta. Bibulu-kalan kelen tun bɛ an balimamuso tutigɛbaga dɔ bolo. A ye Jehowa deli a ka Bibulu-kalan caman wɛrɛw di ale ma. A fana ye baara kɛ ka kɛɲɛ ni a ka delili ye. A ye jateminɛ kɛ a ka cidenyabaara la, a y’a ye ko ale tun tɛ Bibulu-kalan kofɔ mɔgɔw ye ni a nana segin-ka-bɔnyew kɛ. A y’o daminɛ, wa sɔɔni a ye Bibulu-kalan fila wɛrɛw daminɛ.

⁵ E m’a dɔn, ko ka an sen don ‘Ala ka ɲumanya kibaru duman ɲɛfɔli la, mɔgɔ si ni ɲumanya min man kan’ o ye bonyaba ye! (Kɛw. 20:24) Ala ye makari min ta ka ɲɛsin an ma, o waleɲumandɔn ka kɛ sababu ye ka dusu don an na walisa an ka timinandiya tɔw dɛmɛni na u ka Jehowa ka ɲumanya nafa sɔrɔ, mɔgɔ si ni ɲumanya min man kan.