An ka tutigɛbagaw kɔkɔrɔdon

¹ Ala ka baarakɛlaw dɔnnen don n’u ka cɛsiri ye cidenyabaara la. Hali ni an bɛɛ ka cogoyaw tɛ a to an ka kɛ tutigɛbagaw ye, an bɛɛ ka kan k’an cɛsiri ka tutigɛbagaya hakili sɛnɛ an yɛrɛ la, ka baara kɛ n’an barika bɛɛ ye. O cogo la, an balima caman minnu bɛ se ka don tutigɛbagaya baara la, an na dusu don olu kɔnɔ, ka ɲagali ni u ye.

² Ka kɛ tutigɛbaga ye, ani ka to o la, o tɛ ko fitinin ye. Waajuli baara, ani kalan baara fanba bɛ tutigɛbagaw de kan, wa, o baara tɛ taa cɛsiriba ni yɛrɛdi kɔ. Weleweledala tɔw bɛ se cogo di ka o tutigɛbaga timinandiw kɔkɔrɔdon, ka dusu don u kɔnɔ?

³ Fɛn min bɛ se k’a kɛ: Tutigɛbagaw mago bɛ maakɔrɔw ka dɛmɛ na. Ni maakɔrɔw ni tutigɛbagaw bɛ baara kɛ ɲɔgɔn fɛ, o bɛ dusu don kosɛbɛ tutigɛbagaw kɔnɔ. Maakɔrɔ caman b’a ɲini ka baara kɛ ni jɛkulu tutigɛbaga kelen-kelen bɛɛ ye, a dɔgɔyalenba ye siɲɛ kelen ye san kɔnɔ. O cogo de la, maakɔrɔw bɛ se k’u tanu u ka baara kɛlen na, k’u dɛmɛ u ka dɔ fara u ka ɲɛtaa kan. Tutigɛbagaw bɛ se k’a ye, k’u ka kan ka yɛlɛma don u ka waajuli boloda cogo la walisa maakɔrɔw ka se ka bɔ ni u ye tuma min na maakɔrɔw bolodegunnen tɛ. Maakɔrɔw ka kan fana ka ko bɛɛ kɛ walisa waajulikɛyɔrɔ ka sɔrɔ min bɛ labɔli kɛ. Lajɛ wɛrɛw bɛ se ka sigi sen kan forobaara kama wuladafɛlaw la, ka kɛɲɛ ni tutigɛbagaw ka baara kɛ waati ye. O bɛ se ka kɛ kɛrɛnkɛrɛnnenya la, kalow la, balima caman bɛ tutigɛbagaya baara kɛ kalo minnu na. ​—⁠Esa. 40:⁠11.

⁴ Cidenyabaara magannaw bɛ jɔyɔrɔ ɲuman na walisa ka tutigɛbagaw dɛmɛ, k’u kɔkɔrɔdon cidenyabaara la, ka jɛkulu ka ko sigilenw fana kɔkɔrɔdon ni timinandiya ye. Balimamuso minnu ye tutigɛbagaw ye, a ka di olu ye ka balimakɛw ye u cɛma minnu bɛ forobaara ɲɛminɛ. Balimakɛ minnu bɛ sɛbɛnw ani sɔn-ni-sɔn gafeninw ko ɲɛnabɔ, olu b’u jija walisa sɛbɛn hakɛ caman maralen ka sɔrɔ jɛkulu la. Ni balimakɛw b’u hakili to o kow la, o b’a to tutigɛbagaw ka se k’u yɛrɛ bɛɛ di u ka cidenyabaara ma.

⁵ An kelen-kelen bɛɛ bɛ se ka dɛmɛ don: Weleweledalaw bɛ se ka dɛmɛ don, ni u y’a to u ni tutigɛbagaw ka waajuli kɛ ɲɔgɔn fɛ siɲɛ caman. Tutigɛbagaw bɛ nisɔndiya sɔrɔ weleweledalaw ka jɛɲɔgɔnya ni u ka dɛmɛ na. Laala, i bɛ se k’i ka kow labɛn walisa e ni tutigɛbagaw ka baara kɛ ɲɔgɔn fɛ, siɲɛ kelen dɔgɔkun kɔnɔ, walima siɲɛ fila kalo la. Ni an b’an bolofɛnw tila anw ni tutigɛbagaw cɛ, o bololabila bɛna diya u ye kosɛbɛ.​—⁠Fil. 4:​14-19.

⁶ Denbayaw bɛ se ka fɛn caman kɛ walisa k’u ka sokɔnɔmɔgɔw dɛmɛ minnu ye tutigɛbagaw ye. Tuma caman na sokɔnɔbaaraw bɛ se ka labɛn cogo la, walisa denbaya kɔnɔ, mɔgɔ kelen, walima mɔgɔ caman ka se ka kɛ tutigɛbagaw ye. Balimamuso dɔ, ni den saba b’a bolo, a bɛ baara kɛ tile fila dɔgɔkun kɔnɔ. Walisa k’a dɛmɛ, a denkɛw bɛ taa sanni kɛ a ye, ka kɛnɛma baaraw kɛ, a denmuso bɛ yɔrɔ saniya, ka tobili kɛ. Kabini a denmuso tilara kalan na, o fana ye tutigɛbagaya baara daminɛ. Ale ni a ba bɛ ɲɔgɔn falen baara la. Denbaya kɔnɔmɔgɔw ka sɔn ka baara kɛ ɲɔgɔn fɛ nin cogo la, o b’a to mɔgɔ kelen, walima mɔgɔ caman ka se ka kɛ tutigɛbagaw ye, ka dugawu caman lase denbaya bɛɛ ma.

⁷ Tutigɛbaga timinandiw ye dugawu ye jɛkulu ma sira caman fɛ. U ka timinandiya, n’u ka misali ɲuman bɛ dusu don mɔgɔ caman kɔnɔ ka dɔ fara u ka waajuli baara kan. Siga t’a la ko an b’a fɛ ka an seko kɛ walisa k’u kɔkɔrɔdon. Ka jɛ ka an cɛsiri ɲɔgɔn fɛ, o bɛ nisɔndiya lase an bɛɛ ma, ka kɛ tanuli fana ye ka ɲɛsin Jehowa ma.