“Ala ka Kuma kɛbagaw”—Jehowa Seerew ka san 2000 kafoba ka jamalajɛ
1 “Ne na i tanu jamaba cɛma, ne na barika da i ye mɔgɔ caman cɛma.” (Zab. 35:18) I miiri timitimiko ma min tun na Dawuda minɛ n’a ɲɛ tun dara mɔgɔ ba caman kan bi, mɔgɔ minnu dalajɛlen don walasa ka Ala ka kalan lamɛn kafoba ka jamalajɛ la! Mɔgɔ 1 414 534 minnu tun bɛ “Ala ka kiraya kuma” jamalajɛw la, yali i tun bɛ olu cɛla wa? K’a ta san 1999 Mɛkalo sa ma fo ka taa se Sɛtanburukalo daminɛ ma, jamalajɛ 201 de tun labɛnna Etazuni duguba 71 na. An ka kafoba ka jamalajɛ minnu bɛ na kɛ san 2000 na, olu na cogo kura di an ma ka Jehowa tanu, an ni an batokɛɲɔgɔn minnu b’a “dɔn ko u ye faantanw ye Ala ta fan fɛ”, ani minnu kɔrɔtɔlen don ka ‘hakili senu ka fɔta lamɛn, fɔta min ɲɛsinnen bɛ jɛkuluw ma’.—Mat. 5:3, NW; Jir. 2:29.
2 An k’an jan to mago kɛrɛnkɛrɛnnen tigiw la: A dɔ rɔ, weleweledala dɔw mago na kɛ dɛmɛ na walasa ka taa jamalajɛ la: mɔgɔkɔrɔbaw, lujuratɔw, waati dafalen baarakɛlaw, ani mɔgɔ wɛrɛw mago kɛrɛnkɛrɛnnenw bɛ minnu na. U somɔgɔw ni maakɔrɔw ni jɛkulu mɔgɔ wɛrɛ minnu bɛ bɔ u ka cogoya kala ma, olu bɛ se k’u jan to u la ni kanuya ye, ka dɛmɛ don u ma. (1 Timote 5:4 lajɛ.) Mɔgɔ ka kan ka lahaalaya minnu dafa walasa ka Mago kɛrɛnkɛrɛnnen tigiw ka Siyɔrɔ ɲinisɛbɛn (Demande de chambre pour cas particuliers) lafa, o lahaalaya pereperelatigɛlenw bɛ o sɛbɛn kɔnɔ. O fɛɛrɛ in ɲɛsinnen bɛ weleweledalaw tɔgɔ ɲuman tigiw dama ma ani minnu denw taamacogo ka ɲi, ani minnu ka siyɔrɔ ɲinisɛbɛn yamaruyara jɛkulu ka baara kulunin fɛ. O siyɔrɔ ɲinisɛbɛnw ka kan ka ci joona jatigila baarada ma a ka ladɛrɛsi la min bɛ sɛbɛn kɔkan.
3 Walasa ka taa jamalajɛ wɛrɛ la: N’i b’a fɛ ka tɔgɔtasɛbɛn sɔrɔ min bɛ jamalajɛ wɛrɛ ka mɔgɔ jiginyɔrɔ ɲumanw kofɔ, walima ka kunnafoniw sɔrɔ o ko la, i ka jɛkulu ka sɛbɛnnikɛla bɛ se ka jamalajɛ ciyakɛda ka ladɛrɛsi di i ma; o ladɛrɛsi bɛ Mago kɛrɛnkɛrɛnnen tigiw ka siyɔrɔ ɲinisɛbɛn kɔkan. N’i bɛ sɛbɛn ci tuma min na jatigila, walima kunnafoni wɛrɛw ko la, i ka lɛtɛrɛ foroko dɔ fara o kan tuma bɛɛ. Tɛmburu dɔ da o lɛtɛrɛ foroko kan, k’i ka ladɛrɛsi kɛ o kan fana. Ni jamalajɛ caman bolodalen don o dugu kɔnɔ, i bɛna taa min na, i k’i hakili to a la k’o donw pereperelatigɛ o sɛbɛn kan.
4 I k’i labɛn walasa i ka kɛ a kɛnɛ kan a tile saba bɛɛ la: Yali Sitanɛ y’a ɲini k’i hakili bɔ Ala ka kow kɔ wa? Nisɔngoyako don k’a ye ko balimakɛ ni balimamuso caman n’u ka denbayaw b’u yɛrɛ jɛ alako ta fan fɛ dumuni nafama na. Cogo jumɛn na? N’u tɛ ye Jumadon kalanw kɛnɛ kan. Jamalajɛ dɔw kɛtuma na, an y’a kɔlɔsi ko balimakɛ ni balimamuso caman tun bɛ se ka alako kalan ni balimaw ka jɛɲɔgɔnya minnu sɔrɔ Jumadon kalanw na, u ye olu jɛ.
5 Yali balima dɔw bɛ siga ka baara bila donw ɲini u ka baaratigiw fɛ walasa u ka se ka taa jamalajɛ la wa? Yali o y’e ko ye wa? Mun na i t’o fɔ Jehowa ye i ka deliliw kɔnɔ, k’a ɲini a fɛ a ka dusu don i kɔnɔ walasa i ka se k’o ko ɲɛfɔ i ka baaratigi ye? Nehemi ye o ko sugu dɔn, wa, o ye laban ɲuman min sɔrɔ, i k’i hakili to o la. (Neh. 2:1-6) I ka d’a la k’a ka di an sankolo la Fa ye k’an kɔkɔrɔdon. N’an bɛ jɔyɔrɔ fɔlɔ di a ka Masaya kunkankow ma, a na an magoɲɛfɛnw di an ma.—Mat. 6:32b, 33.
6 An bɛ nafa jumɛn sɔrɔ an ka jamalajɛw la? Ka bɔ Etazuni kɔrɔn yanfan na, balimamuso dɔ y’a sɛbɛn ko: “Aw ni ce kosɛbɛ san 1999 jamalajɛ ko la. N tɛ balimakɛ ni balimamuso minnu ye fo siɲɛ kelenpe san kɔnɔ, olu yeli ye nisɔndiya koba ye ne bolo. N ye tiɲɛ dɔn tuma min na, n tun ye npogotiginin ye, ani n tun kɔnɔma don. Balimamuso min tun bɛ ne kalan, siɲɛ fɔlɔ min na a taara ni ne ye jamalajɛ la, ne kunmasicɛlen de bɛ miiri o la tuma bɛɛ. K’an to “Balima waa tan tan” dɔnkili da la o ntolatankɛnɛ kan, ne ye n ɲɛ kɔrɔta kabanɔgɔw fan fɛ, ka kasi. N y’a fɔ n yɛrɛ kɔnɔ ko ‘Nin mɔgɔw bɛɛ tilennen don kosɛbɛ. Jehowa bɛ se ka sɔn ne ɲɔgɔnna na cogo di?’ O don na, n y’a latigɛ ka baara kɛ Jehowa ye k’a sɔrɔ n ma tɔ to.” Nin ye seereya ye min bɛ mɔgɔ kun minɛ dɛ! Yali o tɛ ko duman ye ka kɛ Jehowa ka baarakɛla saniyalenw cɛma ma?
7 Ikomi an bɛ laban donw na, an ka kafoba ka jamalajɛ minnu bɛ kɛ siɲɛ kelenpe san kɔnɔ, an mago b’olu de la kosɛbɛ ka tɛmɛ fɛn bɛɛ kan. Jehowa ka fɛɛrɛ tigɛlen de don walasa k’an ka alako ta fan fɛ kɛnɛya n’an ka basigilenya tanga. O la sa, an k’a latigɛ ka kɛ ɲinan kafoba ka jamalajɛ la a tile saba bɛɛ la. A kumakun ye ko: “Ala ka Kuma kɛbagaw.” I bɛ se k’i ŋaniya jira cogo di? I ka kɔn k’a ɲini i ka baaratigi fɛ a k’i bila walasa ka kɛ jamalajɛ kɛnɛ kan a tile saba bɛɛ la. N’i ka sɔrɔ man bon, i mago bɛna jɔ wari min na, i k’a daminɛ k’o bila kɛrɛfɛ kabini sisan. Gɛlɛya fɛn o fɛn mana na, i k’a ɲini Jehowa fɛ a k’i dɛmɛ. N’i b’a kɛ o cogo la, i hakili sigilen bɛ se ka waati makɔnɔ, waati min na e n’i balimakɛw ni balimamusow bɛna ɲɔgɔn sɔrɔ jɛɲɔgɔnya duman kɔnɔ, ani ka ɲɛnamaya banbali kumaw lamɛn ka bɔ an sankolo la Fa ɲuman yɔrɔ, n’o ye Jehowa ye. — Yuhana 6:68 lajɛ.
[Box on page 5]
Kalanw waatisigiw
Juma ni Sibiri
9 h 30 — 17 h
Kari
9 h 30 — 16 h