I mago bɛ min na alako ta fan fɛ, i ka o wasa
1 An ka Kafoba ka jamalajɛ nata ye ko: “Masaya weleweledala timinandiw.” O jamalajɛ bɛna sababu ɲuman di an ma ka an mago wasa alako ta fan fɛ. Iko dumuni ɲuman b’an balo cogo min na, jamalajɛ kalan fana bɛna an balo alako ta fan fɛ ni ‘limaniya kumaw ye.’ (1 Tim. 4:6) O bɛna an gɛrɛ kosɛbɛ Jehowa la. An bɛ se ka sigi n’a ye ka laadilikan ni dusulamin sɔrɔ minnu b’an dɛmɛ ka kɔrɔbɔli kun an ka diɲɛnatigɛ kɔnɔ. Jehowa b’an hakili latigɛ k’a jɛya ko: ‘Ne na hakilitigiya di i ma. I ka kan ka taama sira min kan, ne na o jira i la. Ne na i kalan ne ɲɛsiran ko la, ka ne ɲɛ jɔlen to i kan.’ (Zab. 32:8) Hɛrɛba don an bolo dɛ ka laadilikan kanuman sɔrɔ an ka diɲɛnatigɛ kɔnɔ! An k’a lajɛ an bɛ se ka walew minnu kɛ walisa ka nafa belebele bɔ jamalajɛ la.
2 A ka kan an k’an dusukun labɛn: An kelen-kelen dusukun lakanali ko bɛ a yɛrɛ bolo. (Nta. 4:23) O b’a wajibiya an ka an yɛrɛ kolo, ka tilen. Jamalajɛ ye waati ye ka taasi anw ni Jehowa cɛ ko la. Waati don fana ka ‘sariya dafalen lajɛ,’ ‘hɔrɔnya sariya.’ Walasa ka an dusukun labɛn a ka sɔn ‘kuma danni ma a la,’ an ka kan ka Jehowa deli kosɛbɛ a ka an sɛgɛsɛgɛ walasa fɛn o fɛn b’an na, min ye ‘sira jugu’ ye, ni an ka kan k’o tilen, Ala ka o jira an na, ka an bila sira kan, ‘waati banbali sira.’—Yak. 1:21, 25; Zab. 139:23, 24.
3 Lamɛnni kɛ, ka taasi: Yesu tun ye Mariyama tanu, bawo a tun y’a tulomajɔ kosɛbɛ a ka kumaw na. Yesu ko: ‘Mariyama ye niyɔrɔ ɲuman ɲɛnatɔmɔ, o tɛna bɔsi a la.’ (Luka 10:39, 42) Ni o jogo ɲuman bɛ an fana na, an tɛn’a to fɛn nafantan ka an hakili ta ka bɔ fɛn nafamaw kan. An bɛna an jija k’an sigi, ka an tulomajɔ kalan kuuru bɛɛ la. An bɛna an yɛrɛminɛ baro la, walima bɔ-ka-don fuw la. An bɛna an janto an ka telefɔni pɔrutabulu (selilɛriw), an ka biperiw, an ka fototalan, ani an ka kamera la, walasa o fɛnw kana tɔw bali u k’u tulomajɔ kalan kɛtuma na.
4 N’an bɛ ka jɛmukanw lamɛn, a ka ɲi an ka olu dɔw sɛbɛn ka surunya walasa o k’an dɛmɛ k’a jateminɛ barokun bɛ ka walanwalan cogo min na. An bɛ ka kuma minnu mɛn, ani an ye minnu dɔn kaban, olu bɛ ɲɔgɔn dafa cogo min na, an ka kan ka an hakili jakabɔ o kan. O bɛna an dɛmɛ ka kalan faamu koɲuman, k’a o to an hakili la. N’an seginna ka an ka kumaw sɛbɛnnen lajɛ kokura, an miiriya ka kan ka kɛ o kuma sɛbɛnnenw waleyali ye an ka ɲɛnamaya kɔnɔ. An kɛlen-kelen bɛ se ka a yɛrɛ ɲininka ko: Nin bɛ se ka nɔ bila ne ni Jehowa cɛ la cogo di? Ne ka kan ka yɛlɛma jumɛnw don ne ka ɲɛnamaya kɔnɔ? Nin dɔnniya in bɛ se ka waleya cogo di ne ni tɔw cɛ? Ne bɛ se ka baara kɛ ni a ye cogo jumɛn na ne ka cidenyabaara la?’ Yɔrɔ minnu diyara i ye kosɛbɛ, i ka baro kɛ olu kan ni tɔw ye. O kow kɛli bɛna an dɛmɛ ka Jehowa ka kuma fɔlenw ‘mara an dusukun cɛmancɛ la.’—Nta. 4:20, 21.
5 An ye min kalan, an k’o sirataama: Jamalajɛ bannen kɔfɛ, an balimakɛ dɔ ko: “Kalan tun ɲɛsinnen bɛ an kelen-kelen de ma. A y’an bila k’a lajɛ min b’an dusukun na, ani min b’an ka denbaya kɔnɔmɔgɔ kelen-kelen bɛɛ dusukun na. An mago bɛ dɛmɛ min na fana, a y’o di an ma kanuya la, Bibulu tɛmɛsiraw fɛ. A ye ne dɛmɛ k’a faamu kosɛbɛ ko ne bɛ dɛmɛ min kɛ jɛkulu ye, ne ka kan ka dɔ fara o kan.” I b’a sɔrɔ an caman miirila o cogo la. Nka, an bɛ dusu ni fanga minnu sɔrɔ, an bɔlen kɔ jamalajɛ la, an man kan ka dan o dɔrɔn ma. Yesu ko: ‘Ni aw bɛ o kow dɔn, ni aw bɛ u kɛ, aw ye dubadenw ye.’ (Yuh. 13:17) An ye fɛn minnu kalan, ni u bɛ an kun kan, an ka kan k’olu sirataama. (Fil. 4:9) An mago bɛ fɛn min na alako ta fan fɛ, an bɛna se k’o wasa, o cogo de la.
[Box on page 5]
I ye min mɛn, i ka taasi o la:
■ Ne ye min mɛn, o bɛ nɔ bila ne ni Jehowa cɛsiraw la cogo di?
■ O bɛ nɔ bila ne ni tɔw cɛsiraw la cogo di?
■ Ne bɛ se k’o sirataama ne ka ɲɛnamaya kɔnɔ ani ne ka cidenyabaara la cogo di?