‘Tugu koɲuman kɛli la tuma bɛɛ’
1 Krecɛn ka ɲɛnamaya kɛcogo ye ka ‘tugu koɲuman kɛli la mɔgɔw bɛɛ ye tuma bɛɛ.’ (1 Tes. 5:15) Ni an bɛ kafoba ka jamalajɛ kɛnɛ kan, cogo caman b’an bolo ka koɲuman kɛ mɔgɔ tɔw ye. Mɔgɔw ɲɛ b’an na o yɔrɔ suguw la, wa, an ni mɔgɔ o mɔgɔ bɛ gɛrɛ ɲɔgɔn na, olu bɛ hakilila dɔ sɔrɔ an kan. O hakililaw bɛ sinsin min kan, o ye an b’u minɛ cogo min na. Walasa ka Jehowa Seerew tɔgɔ ɲuman to an na, an ka kan k’a jira an ka kɛwalew fɛ ko an bɛ “mɔgɔw bɛɛ bonya.” (1 Pi. 2:17) O kosɔn sa, ‘An si kana miiri an yɛrɛw ka kow la dɔrɔn, nka an bɛɛ kelen-kelen ka miiri an mɔgo ɲɔgɔn ka ko fana na.’ (Fil. 2:4) A lajɛ o bɛ sirataama cogo min na jatigila ɲinini la, kafoba ka jamalajɛ la.
2 I bɛna jigin yɔrɔ min na kafoba ka jamalajɛ tuma na, yali i miirila ka fɛɛrɛw tigɛ o ko la wa? Denbaya dɔw b’a miiri ko ni u sera jamalajɛ kɛyɔrɔ la, a kɛra alamisadon, walima jumadon sɔgɔma ye, o don yɛrɛ la, u bɛ se ka siyɔrɔ ɲini, ka sɔrɔ. O man kan. Mɔgɔ minnu b’a fɛ ka jigin mɔgɔ dɔ bara, walima siyɔrɔ dɔ la, o tigiw ka kan ka nin kow jateminɛ: (1) N’i ye demande de logement (jatigila ɲinisɛbɛnfura) sɔrɔ tuma min na, i k’o lafa koɲuman, wa, joona fana. (2) I ye mɔgɔ hakɛ min sɛbɛn o kan, e ni o mɔgɔ hakɛ de ka na, mɔgɔ wɛrɛw kana fara o hakɛ kan (3) Hali ni yɔrɔ dira i ma min tɛ i ka so bɔ, o n’a ta o ta, i ka waleɲumandɔn jira. Ikomi i ye baara kɛ ni ji ni kuran ye, i bɛ se k’i ka waleɲumandɔn jira i kɛtɔ ka bolomafara di o kow kama. (4) N’i kasaara kɛra i bɛ yɔrɔ min na, o yɔrɔnin bɛɛ la, i ka jamalajɛ koɲɛnabɔyɔrɔ ladɔnniya. (5) N’i bɛ siyɔrɔw la, wa, ni jamalajɛ koɲɛnabɔyɔrɔ ye fɛɛrɛ tigɛ ka cɛw bila fan kelen fɛ, ani ka muso bila fan wɛrɛ fɛ, i ka sɔn o ma. N’i dun bɛ lotɛli de la, i ka nin kow to i hakili la: (1) I ka muɲu mɔgɔw kɔrɔ, ka lotɛli koɲɛnabɔbagaw bonya. (2) I ka taama ka kɛɲɛ ni lotɛli sariyaw bɛɛ ye ka ɲɛsin a sow koɲɛw ma. (3) Aw ka aw jan to aw denw la, k’u ka kɛtaw kɔlɔsi. An bɛɛ k’an jija walasa an kana mɔgɔ wɛrɛw tɔɲɔn u ka yɔrɔ la, wa, a kɛra an bɛ lotɛli la, walima yɔrɔ wɛrɛ la, an ka tugu koɲuman kɛli la tuma bɛɛ.
3 An ka denmisɛnninw kalan koɲuman kɛcogo la: Tuma ni tuma, denmisɛn minnu tora u yɛrɛma, k’a sɔrɔ mɔgɔkɔrɔba tɛ yen k’u kɔlɔsi, o nana ni kasaaraw ye lotɛli kɔnɔ, walima u jatigila la. (Nta. 29:15) Tuma dɔw la, bangebagaw tun bolo degunnen bɛ baara wɛrɛw la minkɛ, u ye u denw kɔlɔsibali to so kɔnɔ lotɛli la, walima lotɛli yɔrɔ wɛrɛ la, walima u jatigila la. Denmisɛnnin dɔw ye mankan ci, ka kɛlɛ kɛ fo lotɛli baarakɛlaw, walima u jatigi wajibiyara k’u bali u ka se yɔrɔ dɔw la. Mɔgɔ minnu ye Jehowa Seerew ye, ani minnu tun tɛ Jehowa Seerew ye, o ko ye u tɔɔrɔ, k’u tɔɲɔn. N’i bɛ balimaw de bara, walima mɔgɔw bara, tiɲɛ ka di mɔgɔ minnu ye, i ka taama ka kɛɲɛ ni u ka sariyaw ye. I ma yamaruya ka se yɔrɔ min na, i kana se yen. A sɛgɛsɛgɛ k’i denw ye o kumaw faamu, wa k’u bɛ taama ka kɛɲɛ ni o ye.
4 Bangebagaw, sanni jamalajɛ ka kɛ, a nafa ka bon kosɛbɛ aw ka waati ta k’a lajɛ kokura ni aw denw ye, Kerecɛn jogo min ka kan ka ye u la tuma bɛɛ, ani yɔrɔ bɛɛ la. (Efe. 6:4) Misali la, aw k’a jira u la ko Kerecɛn ka kanuya lakika tɛ “ko bɛnbali kɛ, a tɛ a yɛrɛ nafa ɲini, a tɛ dimin joona.” (1 Kɔr. 13:5) Dɔ bɛ fara o kumaw barika kan, ni mɔgɔkɔrɔbaw kɛra ɲɛjirabaga ɲumanw ye. Denmisɛnninw, aw bɛ se ka tugu koɲuman kɛli la aw kɛtɔ ka aw bangebagaw kanminɛ, ka lotɛli, walima jatigi ka fɛnw minɛ ka ɲɛ, ka bonya fana da mɔgɔw kan minnu bɛ aw lamini na. (Kol. 3:20) N’an kɛra kelen ye cɛsiri la walasa ka koɲuman kɛ bɛɛ ye, an bɛ “an Kisibaga Ala ka kalan bonya ko bɛɛ la.”— Tit. 2:10.
5 An taamacogo ɲuman tɛ nɔ ɲuman bila an kɔlɔsibagaw dɔrɔn na, a bɛ nɔ bila mɔgɔw fana na minnu bɛ an kɔrɔfɔ k’a da kun caman kan. An bɛ fɛn kelen o kelen kɛ jamalajɛ kɛyɔrɔ la, walima dugu kɔnɔ—a kɛra an bɛ sira kan wo, an bɛ dumuni na ɛrɛsitoran la wo, walima n’an bɛ ka senfɛ seereya kɛ wo-an ka Kerecɛn kuma ni an ka walew ka kan k’a jira ko an b’a fɛ ka tugu fɛnw na minnu ka ɲi.
[Box page 4]
Aw ka aw hakili to nin na:
■ Demande de logement (Jatigila ɲini) sɛbɛnfura lafa koɲuman, wa a tuma na.
■ I ye mɔgɔ hakɛ min sɛbɛn o kan, e ni o mɔgɔ hakɛ de ka na. Dɔ kana fara o hakɛ kan.
■ Baara kɛ ni jamalajɛ koɲɛnabɔbagaw ye.
■ Bonya da i jatigi kan, walima lotɛli koɲɛnabɔbagaw kan.