Finidoncogo ani labɛncogo bɛnnen
1 Cɛw bɛɛ bɛ karawati don, hali cɛmisɛnninw. Musow ani npogotigiw bɛɛ, demisɛnninw fara kɔrɔbalenw kan, u bɛ ɔrɔbu walima zupu don. I tɛ jini pantalɔn walima dulɔki kan dayɛlɛlen ye. Bɛɛ nisɔn ka di yan.” Nin ye zurunali dɔ kumakan ye. A tun bɛ kuma jamakulu suguya jumɛn de kan tan? Politiki lajɛ dɔ wa? Farikolo ɲɛnajɛ dɔ wa? Ɔrɔki dɔnkili kɔnsɛri dɔ wa? Ayi dɛrɛ! A tun bɛ kumana balimakɛw ani balimamusow de kan, san tɛmɛnnen jamalajɛba dɔ tuma na.
2 Dugubakɔnɔ jamalajɛ dɔ wɛrɛ la, zurunalisi cɛman dɔ ye nin ɲɛfɔli kɛ Jehowa seerew jama dɔ kan ko: “Cɛw bɛɛ saniyalen don; vɛsiti kɔnpilɛ bɛ u la, wa, karawati bɛ u bɛɛ kan na. Musow bɛ fini don cogo bɛnnen na, nka u b’u pari cogo cɛɲi la. Filɛlikɛla filanan, min ka baara ye lakanali ye (sɔrɔdasi cɛ), o ko: Aw ye jɛkulu ye min kɔnɔmɔgɔw jogo ka ɲi, mɔgɔ minnu ni bonya ka kan, mɔgɔ saniyalenw, mɔgɔ labɛncogo ɲumanw. Ne ɲɛ bɛ min na, o bɛ aw nege don mɔgɔ la. Nin diɲɛ nɔgɔlen kɔnɔ, aw sera ka nɔgɔtɔya furan ka bɔ aw yɛrɛ kɔrɔ! O ye seereya ɲumanw ye ka ɲɛsin an ma dɛ! Yala o tɛ hɛrɛ ye wa, k’a dɔn ko mɔgɔ wɛrɛw bɛ kuma an ka balimaya kan nin cogo la? Tiɲɛ fɔ la, jɛkulu mɔgɔ kelen-kelen bɛɛ de ka cɛsiri y’a to nin kuma ɲumanw fɔra an yecogo ɲuman ko la.
3 An kodɔnna diɲɛ bɛɛ fɛ bawo an yecogo dɔnnen bɛ, ani a danfaralen bɛ ka bɔ tɔw la. (Mal. 3:18) Mun na? Bawo an tugura Sɛbɛnniw ka laadilikanw kɔ ‘k’an yɛrɛ pari ni finiw ye, minnu labɛnna koɲuman, ni hakili ye, . . . kɛcogoya la min bɛnnen bɛ mɔgɔw ma , minnu k’u bɛ bonyaba da Ala kan.’—1 Tim. 2:9, 10.
4 I ka finidoncogo ni i yecogo bɛ mun de jira? An bɛ fini suguya minnu don ani an b’u don cogoya min na, o bɛɛ bɛ kuma an kan—an ka dannayakow, an b’an yɛrɛ kɛ cogo min na, ani an ŋaniya. An bɛ finikalacogo minnu ɲɛnatɔmɔ, olu b’a jira an ye mɔgɔ suguya minnu ye, ani an bɛ jɛ suguya min na. Diɲɛ b’a ka miiriya ani a ka kokɛcogo cɛnnenw minnu sankɔrɔta, an man kan k’olu kɔkɔrɔdon. Ka finiw kala, mɔdi laban kalacogo la, an tɛ hami ni o ye; an b’an jan to de, a ka kɛ finikalacogo ye min bɛnnen bɛ mɔgɔw ma, mɔgɔ minnu ko u ye Ala ka cidenyabaarakɛlaw ye. (Rom. 12:2) Sanni an ka labɛncogo ta min bɛ yɛrɛsagokɛ jira, walima min bɛ mɔgɔ hakili jigin jatɔw ka ɲɛnamaya kɛcogo la, an b’a fɛ k’a jira ko ‘an bɛ Ala bonya sɛbɛ yɛrɛ la.’—1 Piɛ. 2:12.
5 Tuma ni tuma, batiselen kuraw, minnu ma kɔrɔbɔli caman ye, walima minnu ka alako ma kɔgɔ fɔlɔ, olu bɛ se ka sɔn diɲɛ ka finikalacogo ani yɛrɛlabɛncogo bɛɛ la, diɲɛ bɛ minnu nege don mɔgɔw la, wa u t’a jateminɛ a bɛ nɔ min bila Jehowa ni a ka jɛkuluba la. An bɛɛ bɛ se k’an yɛrɛ sɛgɛsɛgɛ k’a filɛ n’a sɔrɔ diɲɛ in ka miiriyaw ma nɔ bila an na. An bɛ se ka gɛrɛ balimakɛ dɔ la, walima balima muso dɔ, bonya bɛ min kan, min ye maa mɔlen ye alako ta fan fɛ, ka o ɲininka o ka tiɲɛ fɔ an ye an ka finikalacogo kan ani an labɛncogo kan; o kɔ an ka o laadilikanw minɛ ni sɛbɛ ye.
6 Dɔw tɛ siga don a la, k’u wajibiyalen don k’u ka finidontaw kɔlɔsi n’u bɛ na jamalajɛbaw la. Nka o kɔ, u t’u ka finidoncogo jate kosɛbɛ ko wɛrɛw kɛtuma na, lajɛw kelen-kelen bɛɛ kɔfɛ. I nɔɔrɔ kɛcogo sankɔrɔtalenw na minnu ye Kerecɛn sɛbɛ, cidenyabaarakɛla tagalan ye. (2 Kɔr. 6:3, 4). An mana taa jama la yɔrɔ o yɔrɔ, an ka jamalajɛ badiji, o ni an ka fini doncogo ɲuman ni an yecogo ɲumanw b’a seereya ko an ye Jehowa seerew ye. O la sa, an k’an labɛn ka ɲɛ tuma bɛɛ, wa, cogo bɛrɛ bɛnnen na, walisa k’a jira ko ‘an ɲi tɛ diɲɛ in la.’—Yuh. 15:19.
7An bɛɛ ka se k’a jira nin san in jamalajɛba la, min tɔgɔ ye ko “Masaya weleweledala timinandiw,” ko anw ye ‘jamakulu sanuyalen ye min bilalen bɛ Jehowa, [an] ka Ala kama.’ Tanuli ɲuman min bɛna bɔ o la, o bɛna dɔ de fara ‘bonya, tɔgɔbɔ ani cɛɲa kan ka ɲɛsin Jehowa ma’—Dut. 26:19.
[Box on page 6]
Bonya bɛ da Jehowa kan cogo min na:
■ I ka fini don cogoya la, min bɛnnen bɛ Jehowa ka cidenyabaarakɛla ma.
■ I k’i yɛrɛ tanga finikalacogo ma min ni diɲɛ miiriyaw bɛ ɲɔgɔn ta.
■ A jira k’i ka kow bɛrɛ bɛnnen don; o b’a jira k’i ye hakilitigi ye.