Yali i b’i ka cidenyabaara kɛ
ka dafa wa?
1 A fɔra an ye Kɛwalew kitabu kɔnɔ ko Yesu ka kalandenw kɛtɔ k’u ka cidenyabaara kɛ, u ye ‘seereya kɛ ka dafa’ mɔgɔw ye. (Kɛw. 2:40, NW; 8:25; 28:23) Siga t’a la k’o tun ye ciden Pol kuntilenna ye. (Kɛw. 20:24) Ikomi e yɛrɛ ye Masaya kibaru duman cidenyabaarakɛla ye, yali o fana tɛ i kuntilenna ye wa? I bɛ se k’o kuntilenna sɔrɔ cogo di?
2 I k’i ka kuma labɛn: Labɛn nafa ka bon walasa ka d’a la k’i bɛ seereya nafama kɛ cidenyabaara la. O ye tiɲɛ ye kɛrɛnkɛrɛnnenya la sɔn-ni-sɔn gafeninw jiratuma na, katuguni u barokunw bɛ yɛlɛma tuma bɛɛ. Walasa k’an dɛmɛ an labɛnnen ka kɛ koɲuman, An ka Masaya Cidenyabaara bɔko in ye fɛn kura dabɔ. Nin ɲɛ in na, numakuru yanfan fɛ, La Tour de Garde ni Réveillez-vous! kuraw jiracogo misali dɔw ɲɛfɔlen bɛ o yɔrɔ la. Barokun bɛnnen minnu bɛna diya mɔgɔ caman ye, olu bɛna jira ka jɛya a bɔko kelen-kelen bɛɛ kɔnɔ. E bɛna o jiracogo surunw ɲɛfɔ cogo di?
3 E ɲɛ na hakilila min nafa bɛna bonya kosɛbɛ i ka wajulikɛyɔrɔ la, i k’o sugandi. Barokun min jiralen bɛ o hakilila la, i ka o barokun kalan ɲɛmajɔ la. Yɔrɔ kɛrɛnkɛrɛnnen minnu ka teli k’u kalan nege don mɔgɔ la, i k’olu jateminɛ. Bibulu tɛmɛsira dɔ ɲini sɔn-ni-sɔn gafenin kɔnɔ min bɛ baro kan, n’i bɛna se k’o kalan i barokɛɲɔgɔn ye. I ka kuncɛli kuma surun dɔ fara o kan min bɛ dusu don i lamɛnbaga kɔnɔ a ka sɔn-ni-sɔn gafenin kalan. N’a bɛnnen don, kuma surun labɛn walasa k’a jira a la k’a bɛ se ka fɛn dɔ di walasa ka Jehowa Seerew ka diɲɛ mumɛ la baara kɔkɔrɔdon. Sisan sa, i ka segin siɲɛ caman na i ka kuma jiracogo kan.
4 I k’i ka kow labɛn walasa ka baara kɛ ni Bibulu ye: N’i y’i ka kow labɛn ka ɲɛ, i bɛ se ka Bibulu tɛmɛsira kalan tuma caman na i ka kuma jiracogo la. Misali la, yɔrɔ caman na, weleweledala ŋanaw ye taɲɛ sɔrɔ; tuma min na u bɛ taa da dɔ la, u bɛ Bibulu minɛ u bolo, k’u barokɛɲɔgɔn fo, k’a fɔ ko:
◼ “An bɛ ka mɔgɔw ɲininka n’u dalen bɛ nin na . . . ” Jenese 1:1 kalan, ka tila ka ɲininkali kɛ ko: “Yali e sɔnna o kuma ma wa?” N’o tigi sɔnna o ma, o kɔfɛ, i k’a fɔ ko: “Ne fana sɔnna o kuma ma. Nka, e miiri la, ni Ala ye fɛn bɛɛ da, yali ale fana de ye kojugu sababu ye wa?” I kɛlen kɔ k’a fo a ka jaabi la, i ka Waajulikɛla (Ekilesiaste) 7:29 kalan. Dɔnniya gafe dayɛlɛ a ɲɛ 71 na, k’a dakun 2 nan kalan. Dusu don a kɔnɔ a ka gafe kalan. N’i barokɛɲɔgɔn ma sɔn Jenese 1:1 ma, a dusu lamin a ka Création (Dali) gafe sɛgɛsɛgɛ.
5 Mɔgɔ minnu ye magojira kɛ i kana olu si to yen: I ye mɔgɔ minnu sɔrɔ, n’u mago donna kumakun na, i tɛ se k’i ka cidenyabaara kɛ ka dafa, n’i tɛ taa bɔ u ye k’u mago ɲɛ ka t’a fɛ. N’i ye baro duman kɛ mɔgɔ dɔ fɛ, i mana sɛbɛn o sɛbɛn bila o tigi bolo, i k’o tigi tɔgɔ n’a ka ladɛrɛsi sɛbɛn. I ka segin joona o tigi bara walasa i k’i jija k’a dɛmɛ a k’i mago don tiɲɛ na ka t’a fɛ. A jɛlen don fana k’i bɛna Bibulu kalan kofɔ a ye.
6 San kɛmɛ fɔlɔ kalandenw tun b’a dɔn ko Yesu tun y’u ci ka ‘seereya kɛ ka dafa.’ (Kɛw. 10:42, NW) O ci kelen de b’an kan bi fana, bawo o sira dɔrɔn de fɛ, an bɛna se ka mɔgɔw kɛ kalandenw ye. (Mat. 28:19, 20) An k’an seko damajira kɛ walasa k’an ka cidenyabaara kɛ ka dafa.—2 Tim. 4:5.