An Krecɛn ɲɔgɔnw ka jɛɲɔgɔnya nafa ka bon cogo jumɛn na?
1 “Hadamaden si tɛ gun dɔ ye.” O kuma fɔra san kɛmɛ 17 nan poyisɛbɛnbaga dɔ fɛ. A seginna dɔrɔn Bibulu ka fɔlen dɔ de kan ka ɲɛsin hadamaden mago fɔlɔ ma, n’o ye jɛɲɔgɔnya ye. (Nta. 18:1) An Krecɛn ɲɔgɔnw ka jɛɲɔgɔnya b’o mago ɲɛ. Sira nafama jumɛnw fɛ?
2 Cidenyabaara la: An balimaw b’an barika bonya, k’an kɔkɔrɔdon kɛnɛ kan cidenyabaara la cogo min na, o ye a nafa fɔlɔ-fɔlɔ ye. Yesu y’a ka kalandenw ci “fila-fila” walasa u ka taa wajuli kɛ. (Mar. 6:7; Luka 10:1) O cogo kelen na fana, an ni tɔw bɛ baara kɛ ɲɔgɔn fɛ foro la tuma min na, an b’a ye ko Waajulikɛla (Ekilesiaste) 4:9, 10 ye tiɲɛ ye. An bɛ jɛ ka cidenyabaara kɛ ɲɔgɔn fɛ tuma min na fana, an jɛɲɔgɔnw ka limaniya, u ka kanminɛni n’u ka kanuya b’an dusu lamin, k’an kisɛya ko kura.
3 A b’an kelen-kelen bɛɛ dɛmɛ: An ka balimaya fana ye sababu ye ka dusulamin ni bilasirali sɔrɔ walasa ka degunkow kunnasagon, k’an kologɛlɛya kɔrɔbɔliw la. An Krecɛnw jɛɲɔgɔnw bɛ se ka Bibulu tɛmɛsiraw da an hakili kan minnu bɛ an kunkow kan. U bɛ se ka delili kɛ an ye, iko an yɛrɛw bɛ se ka delili kɛ u ye cogo min na. (2 Kɔr. 1:11) Siga t’a la, u ka misali ɲuman b’an bila ka baara ɲumanw kɛ, k’an barika bonya.
4 Lajɛw la: N’an bɛ taa tuma bɛɛ jɛkulu lajɛw la, koduman min bɛ an Krecɛn ɲɔgɔnw ka jɛɲɔgɔnya la, an b’o diyabɔ. (Heb. 10:24, 25) Kalan min bolodalen bɛ, o ye alako ta fan fɛ dɔnniya camanba de ye, wa, n’an bɛ ye lajɛw kɛnɛ kan, an gɛrɛlen bɛ to an dannayakɛɲɔgɔnw na. O jamalajɛw bɛ cogo di an ma fana k’an balimakɛw n’an balimamusow lamɛn u ka kuma u ka dannaya kan k’u to banbali kan, walima k’u to u sigiyɔrɔ la, lamɛnbagaw cɛma. (Rom. 1:12) N’an bɛ baro kɛ ɲɔgɔn fɛ lajɛw ɲɛ, ani u kɔfɛ, o bɛna an ni ɲɔgɔn cɛjuru kologɛlɛya kosɛbɛ. O kow bɛ cogow di an ma fana ka kuma ko kɛlenw kan minnu ye an yɛrɛw ka dannaya sabati. Mɔgɔ minnu bɛ Jehowa, a ka Kuma, a ka baara, n’a ka jama kanu, n’an b’o mɔgɔw kɛ an jɛɲɔgɔnw ye, o bɛna nɔ bila an jogow la cogo nafama na.— Fil. 2:1, 2.
5 An mago bɛ an Krecɛn jɛɲɔgɔnw na. N’olu tɛ, a tun bɛ na gɛlɛya an bolo kosɛbɛ ka taama sira koronnen kan min bɛ mɔgɔ lase ɲɛnamaya ma. Nka, u ka kanuya n’u ka dusulamin barika la, an bɛ se ka t’a fɛ an ka taama na ka taa Jehowa ka diɲɛ kura tilennen na.—Mat. 7:14.