Aw ye “filɛlifɛnw” ye!
1 Ciden Pol y’a sɛbɛn ko: ‘An kɛra filɛlifɛnw ye diɲɛ ni mɛlɛkɛw, ni hadamadenw ɲɛkɔrɔ.’ (1 Kɔr. 4:9) O kɔrɔ ye mun ye? O ka kan ka nɔ bila an ka cidenyabaara la bi cogo di?
2 Siga t’a la ko Kɔrɛnteka dɔ fɛ, “filɛlifɛn” kumasen tun b’a hakili jigin Romɛkaw ka ɲɔgɔn dan kɛlɛ la, o kɛlɛ min kɔfɛ mɔgɔ ɲangilenw tun bɛ jira filɛbaga ba caman na sanni u ka faga cogo jugu la. O cogo kelen na fana, filɛbaga camanba, n’olu ye hadamadenw ni mɛlɛkɛw ye, u ye tɔɔrɔw ye, tɔɔrɔ minnu dara san kɛmɛ fɔlɔ Krecɛnw kan katuguni u ye seereya kɛ Masaya ko la. (Heb. 10:32, 33) Ikomi u y’u ka kantigiya mara, o ye nɔ bila mɔgɔ caman na i n’a fɔ an ka muɲuni b’a kɛ fana cogo min na bi kɛlɛkɛ kɛnɛ kan. An ye filɛlifɛnw ye jɔnw ɲɛkɔrɔ?
3 Diɲɛ ni hadamadenw ɲɛkɔrɔ: Waati ni waati, lakalitaɲininaw bɛ kunnafoni sɛbɛnw bɔ Jehowa ka jamakulu ka baaraw kan. Ni kuma ɲuman bɛ fɔ an ka baara kan, kuma min sinsinnen bɛ tiɲɛ ani laadiriya kan, waleɲumandɔn b’an na o la. O n’a ta o ta, an sigilen bɛ n’a ye fana an kɔrɔfɔbagaw k’an tɔgɔ jugu fɔ waati ni waati. Hali n’o kɛra, an bɛ t’a fɛ k’an yɛrɛw jira iko Ala ka cidenyabaarakɛla minnu ‘tɔgɔ ɲuman ni tɔgɔ jugu bɛ fɔ.’ (2 Kɔr. 6:4, 8) An kɔlɔsibaga tilennenw bolo, a jɛlen don k’an ye Yesu Krista ka kalanden lakikaw ye.
4 Mɛlɛkɛw ɲɛkɔrɔ: Danfɛn hakilima yebaliw fana b’an kɔlɔsi. Sendonbaga ni jinɛw b’an kɔlɔsi, nka u b’o kɛ ni “diminyaba ye,” k’a ɲini ka “Yesu ka seereya baara” jɔ. ( Jir. 12:9, 12, 17) Ala ka mɛlɛkɛ kantigiw fana b’an kɔlɔsi, ka nisɔndiya sɔrɔ hali tuma min na jurumukɛla kelen de bɛ nimisa. (Luka 15:10) An barika ka kan ka bonya k’a dɔn ko mɛlɛkɛw b’an ka cidenyabaara mafilɛ iko baara bɛɛ la nafama min ye kɔrɔtɔko ye, n’a bɛ ka kɛ bi dugukolo kan! — Jir. 14:6, 7.
5 N’i bɛ kɛlɛ sɔrɔ, walima n’i bɛ miiri ko nafa bɛrɛ t’i ka cidenyabaara la, i k’i hakili to a la ko diɲɛ mumɛ bɛɛ ɲɛ jɔlen b’i la. I ka muɲuni bɛ caman jira i ka kantigiya ko la. A laban na, i ka ‘dannaya kɛlɛ ɲuman’ bɛn’a to i ka se ka ‘ɲɛnamaya banbali minɛ kosɛbɛ.’—1 Tim. 6:12.