Kuma jiracogo nɔgɔn de ye a bɛɛ la ɲuman ye

¹ Weleweledala denmisɛnninw bɛ Masaya cikan fɔ mɔgɔ minnu ye, mun na o mɔgɔw b’u lamɛn tuma caman na? A kun dɔ ye k’u ka kuma fɔcogo ka nɔgɔn. Weleweledala dɔw bɛ se ka miiri ko ka seereya nafama kɛ o bɛ kuma jiracogoba de wajibiya. Nka, kow b’a jira ko kuma jiracogo nɔgɔn, min jɛlen bɛ, o de ye a bɛɛ la ɲuman ye.

² Yesu ye Ala ka Masaya weleweleda cogo la min tun ka nɔgɔn, n’a tun jɛlen bɛ fana, ka tila k’a ka kalandenw dege u k’o ɲɔgɔn kɛ. (Mat. 4:17; 10:5-7; Luka 10:​1, 9) A ye baara kɛ ni kuma daminɛcogo nɔgɔnw ye, ni ɲininkaliw ye ani ni misaliw ye minnu tun y’a lamɛnbagaw bila u k’u tulomajɔ, ani minnu tun donna u la fana. (Yuh. 4:7-14) O ye fɛn ɲuman ye n’an b’a ka misali ladege, ka baara kɛ ni kuma jiracogow ye minnu faamuya ka nɔgɔn.

³ “Masaya Kibaru Duman” ye cikan ye an ka kan ka min weleweleda. (Mat. 24:14) Ka Masaya kɛ an ka barokun ye, o bɛna an dɛmɛ an k’an ka kuma jiracogo to cogo nɔgɔn na. Fɛn minnu bɛ i lamɛnbagaw kun kan, i ka kuma olu kan. Tuma caman na musow bɛ magojira kɛ fɛnw ko la minnu ɲɛsinnen bɛ u ka denbaya ma ka tɛmɛ politikikow kan. Dutigi hami fɔlɔ y’a ka baarako n’a ka denbaya ka lakananiko ye. Funankɛninw b’u mago don u ka siniko la, mɔgɔ kɔrɔbaw, u ka kɛnɛya n’u ka lasagonnenya la. Tuma caman na, mɔgɔw b’u mago don kosɛbɛ kow la minnu bɛ kɛ u ka yɔrɔ la ka tɛmɛ kow kan minnu bɛ kɛ jamana wɛrɛw la minnu ka jan u la kosɛbɛ. I kɛlen kɔ ka kuma kow kan minnu ye bɛɛ kunkankow ye, Ala kanminɛbagaw bɛna duba minnu sɔrɔ tuma min na Ala ka Masaya bɛna mara kɛ, i k’o kow da o tigi hakili kan. Ka kuma nɔgɔn damadɔw sugandi ka ɲɛ, ka fara Bibulu tɛmɛsira kan, o bɛ se ka kɛ cogo bɛɛ la ɲuman ye walasa k’i lamɛnbaga bila a ka magojira kɛ.

⁴ I bɛ se ka baro daminɛ ten:

◼ “Siga t’a la k’i bɛ sɔn a ma ko hadamadenw ye bana caman dɔn minnu tɛ se ka kɛnɛya. Nka, yali i b’a dɔn ko Ala ye layidu ta ko sɔɔni a bɛna bana sugu bɛɛ bɔ yen, hali saya wa?” A to a k’i jaabi, o kɔ, i ka Jirali 21:3, 4 kalan.

⁵ Ka ɲɛsin i ka wajulikɛyɔrɔ mɔgɔw ma, kuma jiracogo nɔgɔn minnu jɛlen don, olu bɛ se ka kɛ sababu ye k’u caman kun minɛ, ka don u la, k’u dɛmɛ u ka kalan Jehowa ko la, ka ɲɛnamaya banbali jigiya sɔrɔ.—Yuh. 17:3.