An ka Jehowa bonya ni kɛwale ɲumanw ye

¹ N’i minɛna sanfiɲɛ jugumanba dɔ la, n’i sera ka kundogoyɔrɔ dɔ sɔrɔ, o ka di dɛ! Ni funteni b’o kɔnɔna na, n’a bɛ i lakana, n’a kɔnɔmɔgɔw fana b’i ladon, a ka di i ye ka to o yɔrɔ la. Masaya baara bɛ mɔgɔw ɲɛsin o kundogoyɔrɔ sugu ma Sitanɛ ka kow sigicogo la. Yali an ka don o don ɲɛnamaya kɛcogo bɛ se ka mɔgɔ wɛrɛw dɛmɛ u ka ye mɔgɔ bɛ ladon ka ɲɛ cogo min na o yɔrɔ lakananen na wa? Ɔwɔ, bawo Yesu y’a fɔ ko mɔgɔ ka kan k’an ka ‘kɛwale ɲumanw ye k’an sankolo la Fa bonya.’ —Mat. 5:16.

² An bɛ se k’an ka ɲɛnamaya kɛ cogo jumɛn na walasa an ka kɛwalew sababu fɛ tɔw ka sama Jehowa n’a ka jɛkuluba nɔfɛ? N’an b’a to Yesu ka kumaw ka nɔ ɲuman bila an ka ɲɛnamaya kɛcogo la don o don, Yesu ka kuma minnu bɛ Luka 6:31 ani 10:27 la. O bɛna an bila an ka mago don an mɔgɔɲɔgɔn na ni kanuya ye, ka danfara don an ni diɲɛ hinɛntan cɛ, mago don ɲɔgɔn na tɛ min na.

³ An balimamuso dɔ tun bɛ jikankurun dɔ kɔnɔ. A ye muso dɔ ye min tun tɛ se k’a mago don a den fitinin na tun bawo jikankurun taama tun y’a bana. An balimamuso y’a ɲini muso fɛ n’a tun b’a fɛ a k’a mago don a den na. Tuma min na muso y’a ɲininka a bɛ se k’a ka waleɲumandɔn jir’a la cogo min na, an balimamuso ko: ‘Ni Jehowa Seerew nana i ka so siɲɛ wɛrɛ, i k’u lamɛn.’ Muso y’o de kɛ, sisan ale n’a cɛ ye Seerew ye. Kɛwale ɲumanw ye nɔ bila u ka wale la ka ɲɛsin Masaya cikan ma.

⁴ An ka ɲɛnamaya kɛcogo ɲɛ bɛɛ b’o la: An ka ɲɛnamaya kɛcogo ye min ye sigiɲɔgɔnya sira la, baarakɛyɔrɔ la, lakɔli la, ani an ka ɲɛnajɛw la, o b’a to tɔw bɛ hakilina dɔ sɔrɔ anw, ani an ka diinɛ kan. O la sa, an ka kan k’an yɛrɛ ɲininka nin na: ‘N kɔlɔsibagaw bɛ mun miiri ne ni n ka denbaya ko la? N sigiɲɔgɔnw fɛ, yali n ka so ni n ka dukɛnɛ saniyalen don wa? Yali u minɛnen don koɲuman wa? Yali n baarakɛɲɔgɔnw ni kalandenɲɔgɔnw bɛ n mafilɛ i n’a fɔ mɔgɔ min bɛ na ka bɛn lɛrɛ ma tuma bɛɛ, ani min ka kisɛ wa? Yali n labɛncogo bɛrɛ bɛnnen don tɔw ɲɛ na wa? Yali bonya b’a la wa?’ An ka kɛwale ɲumanw bɛ se ka kɛ sababu ye tɔw ka sama Jehowa ka bato nɔfɛ kosɛbɛ.

⁵ Piɛrɛ ye Krecɛnw lasɔmi k’u bɛna kɛ yɛlɛfɛnw ye. (1 Piɛ. 4:⁠4) An jɛyalen ka kɛ a la ko kuma jugu tɛ fɔ an ka ɲɛnamaya kɛcogo kan. (1 Piɛ. 2:12) An bɛ Ala min bato, n’an ka don o don kɛwalew bɛ o bonya, o tuma na sa, an bɛna kɛ iko lanpa min minɛnen bɛ sanfɛ, n’a bɛ tɔw sama ka na kundogoyɔrɔ lakananen na, Jehowa bɛ min di.—Mat. 5:14-16.