An bɛ mɔgɔw lasɔn cogo min na

¹ Ciden Pol ye tɔgɔ ɲuman sɔrɔ k’a ye cidenyabaarakɛla ye min tun bɛ se ka mɔgɔ lasɔn. (Kɛw. 19:26) Hali masakɛ Agripa ko a ma: “Sɔɔni i bɛna ne lasɔn n ka kɛ Krecɛn ye.” (Kɛw. 26:28, NW) Mun y’a to Pol ka wajuli tun bɛ se ka mɔgɔ lasɔn? A ye baara kɛ ni Sɛbɛnniw ye cogo bɛnnen na walasa ka mɔgɔw bila hakilijakabɔ la, k’a ka fɔtaw yɛlɛma ka kɛɲɛ n’a lamɛnbagaw ka ko ye.​​—⁠Kɛw. 28:⁠23.

² Ciden Pol cogo la, an ka cidenyabaara la, an fana ka se ka mɔgɔw lasɔn. Cogo di? N’an bɛ kow faranfasi tuma min na an bɛ kuma tɔw fɛ, ani n’an bɛ k’u lamɛn. (Nta. 16:23) Fɛn nafama saba bɛna an dɛmɛ k’o kɛ.

³ An ka lamɛnni kɛ koɲuman: Ni mɔgɔ wɛrɛ bɛ kuma, an k’a lamɛn walasa an ka bɛnyɔrɔ sɔrɔ min bɛna kɛ an ka baro jujɔ ye. N’a bɛ kumakɔkariko dɔ lawuli, i ka ɲini k’o kɔrɔ faranfasi. O bɛna i dɛmɛ k’a dɔn tigitigi a dalen bɛ min na, mun na a dalen b’o la, ani mun y’a daŋaniya o la. (Nta. 18:13) I k’a ɲininka o la ni gasi sigi ye.

⁴ An ka ɲininkaliw kɛ: Ni mɔgɔ dɔ y’a jira k’a dalen bɛ Sabaya la, i bɛ se k’a ɲininka ko: “Yali o de kɛra i ka dannayako ye tuma bɛɛ wa?” I ka taa ɲɛ k’a fɔ ko: “Bibulu bɛ min fɔ o ko la, yali i delila ka sɛgɛsɛgɛli dafalen kɛ o kan wa?” I bɛ se fana k’a ɲininka ko: “Ni Ala ye Sabaya kɔnɔmɔgɔ dɔ ye, yali an man kan ka sigi n’a ye Bibulu k’o ɲɛfɔ k’a jɛya wa?” I bɛ jaabi minnu sɔrɔ, olu bɛna i dɛmɛ k’o tigi bila hakilijakabɔ la o ko kan Sɛbɛnniw ka fɔta sababu fɛ.

⁵ An ka baara kɛ ni hakilijakabɔsira ye fiɲɛ tɛ min na: Seere dɔ ye muso dɔ ɲininka min tun dalen b’a la ko Yesu ye Ala ye. A ko: ‘N’i b’a fɛ k’a jira ko mɔgɔ fila ye kelen ye, i bɛ se k’a fɔ o ma ko cogo di balimayasira la?’ A y’a jaabi ko: “N bɛ se k’a fɔ o ma ko balimakɛ fila.” Seere y’a fɔ ka far’a kan ko: “U bɛ se yɛrɛ ka kɛ kelen ye i n’a fɔ filaninw. Nka, Yesu kɛtɔ k’an kalan ko an ka Ala ye i n’a fɔ Fa, ani k’ale yɛrɛ ye i n’a fɔ Denkɛ, Yesu tun b’a fɛ ka kunnafoni jumɛn lase an ma?” Muso y’a faamu ko kelen ka kɔrɔ ni tɔ kelen ye, ko a ka kuntigiya fana ka bon ni tɔ kelen ta ye. (Mat. 20:23; Yuh. 14:28; 20:17) Hakilijakabɔ kɛcogo ɲuman sababu fɛ, muso dusukun n’a hakili sɔnna o ma.

⁶ Hali ni kuma fɔcogo bɛnnen don, k’a jiracogo ye tiɲɛ ye cogo o cogo, a jɛlen don ko bɛɛ tɛna sɔn tiɲɛ ma. Nka, i n’a fɔ Pol, an cɛsirilen ka dusukun jɛlen tigiw ɲini an ka wajulikɛyɔrɔ la, k’u daŋaniya a la u ka sɔn Masaya cikan ma.—Kɛw. 19:8.