Seereya min bɛ kɛ k’a sɔrɔ kuma ma fɔ
1 K’a sɔrɔ u ma kuma den kelen fɔ, Jehowa ka fɛn dalen yetaw bɛ kunnafoni camanba di Jehowa ka mankutu yebaliw kan. (Zab. 19:2-4; Rom. 1:20) O cogoya kelen na, an jogo ɲuman, an ka Kerecɛn mankutuw, ani an yɛcogo bɛnnen bɛɛ bɛ seereya kɛ k’a sɔrɔ kumaw ma fɔ. (1 Piɛ. 2:12; 3:1-4) An bɛɛ kelen-kelen ka kan ka a ɲini ka ‘An Kisibaga, Ala ka kalansiraw masiri ko bɛɛ la’ an yɛrɛw kɛcogoyaw fɛ.—Tite 2:10.
2 Hadamaden dafabaliw bɛ se ka dawula don Bibulu kalansiraw la cogo di? O bɛ se ka kɛ dɔrɔn Ala ka bilasirali-kuma sababu la ani a ka hakili senu barika la. (Zab. 119:105; 143:10) Ala ka kumakan ‘ɲɛnama don ani barika b’a la, a da ka di ka tɛmɛ npan da fila kan.’ (Heb. 4:12) A bɛ don fo an kɔnɔna na ani a bɛ an dɛmɛ ka mɔgɔya kura don an yɛrɛ la. (Kol. 3:9, 10) Hakili senu b’an dɛmɛ ka jogow sɛnɛ an na minnu ka di mɔgɔw ye i n’a fɔ mɔgɔlandiya, ɲumanya, sabali, yɛrɛminɛ. (Gal. 5:22, 23) Yala an bɛɛ kelen-kelen bɛ k’a to Ala ka kuma ani hakili senu ka baara kɛ an ka ɲɛnamaya kɔnɔ wa?—Efɛ. 4:30; 1 Tes. 2:13.
3 Mɔgɔ wɛrɛw bɛ an kɔlɔsi: Ni an ka ɲɛnamaya bɛ kɛ ka kɛnyɛ ni Jehowa ka sariya sigilenw ye, ani n’an b’an jija ka Jehowa ka jogow jira an kɛcogow fɛ, mɔgɔ wɛrɛw bɛ o jateminɛ. Misali la, cɛ dɔ ka surunya kosɔn, a baarakɛɲɔgɔnw ye a kɛ yɛlɛko fɛn ye. An balimamuso dɔ tun bɛ o baarada kelen in na. Balimamuso tun bɛ bonya da cɛ in kan tuma bɛɛ. O ye cɛ bila k’a ɲininka mun na a ni tɔw tɛ kelen ye. A y’a ɲɛfɔ ko ale bɛ Bibulu sariyakolow sirataama a ka ɲɛnamaya kɔnɔ minkɛ, o de y’a kɛ ale bɛ mɔgɔ bonya. A ye Masaya ka dakabana jigiya kuma fɔ a ye fana. Cɛ ye Bibulu kalanni daminɛ, ka ɲɛtaa sɔrɔ, ka batɛmu ta. A seginnen a faso la, a jogo ɲuman ye nɔ ɲuman bila a ka somɔgɔw la. U caman sɔnna tiɲɛ na.
4 K’an to an ka baarakɛyɔrɔw la, k’an to lakɔli la, walima ni an n’an ka denbaya bɛ ɲɔgɔn fɛ, wala an ni an sigiɲɔgɔn cɛ, an k’a to an ka jogo ɲuman ni an ka seereya kɛli ka mɔgɔ wɛrɛw bila ka nɔɔrɔ da Ala kan.—Mat. 5:16