Lajɛw bɛ nafa lase funankɛw ma
1 Npogotiginin dɔ ko: “Ne b’a fɔ n yɛrɛ kɔnɔ tuma dɔw la ko funankɛw ka gɛlɛyaw ka ca ka tɛmɛ tɔw taw kan diɲɛnatigɛ kɔnɔna na. Mɔgɔ minnu b’an lamini, u bɛ jɛnɛya kɛ, u bɛ dɔrɔgu ta, u bɛ min.” Yali e fana b’o de miiri wa? N’a bɛ o cogo la, o kɛwalew bɛ se ka nɔ juguw bila an na. O la sa, e yɛrɛ ɲɛ na, mun bɛna i dɛmɛ k’olu kɛlɛ? I mago b’a la ka da kosɛbɛ Jehowa ka sira tilennenw na katuguni ni dannaya tɛ, “mɔgɔ si ko tɛ se ka diya Ala ye.” (Heb. 11:6) Ka kɛ jɛkulu ka lajɛw la, o bɛna i dɛmɛ ka Krecɛnw ka dannayakow sinsin i bolo, ani ka dɔ fara i ŋaniya kan, n’o ye k’i tanga kojugu ma.
2 I bɛ fɛn caman sɔrɔ lajɛw la: Ka dumuni duman kɛ i da-ka-wuli teriw fɛ, mun b’o diya? Yali dumuni yɛrɛ diya tɛ wa, ka fara jɛɲɔgɔnya duman kan lafiya kɔnɔ? An b’o nisɔndiya kelen de sɔrɔ an ka lajɛw la, nka alako ta fan fɛ.
3 Fɛn minnu bɛ fɔ lajɛw la, k’a ta diɲɛnatigɛ ka don o don kunkow ɲɛnabɔcogo ma, ka na bila kiraya kumaw ma minnu kalanni ka di, olu bɛɛ ye fɛnw ye minnu b’an lasabati. Kalan nafama bɛ kɛ min b’i dɛmɛ ka nin fɛnw dɔn: I bɛ se k’i ka diɲɛnatigɛ kɛ ka ɲɛ cogo min na, an’i bɛ gɛlɛya minnu fana sɔrɔ, i bɛ se k’olu kunbɛn cogo min na. Mɔgɔ minnu y’an jɛɲɔgɔnw ye lajɛw la, olu ka ɲi kosɛbɛ, wa, an tɛ u ɲɔgɔn sɔrɔ yɔrɔ wɛrɛ si la. An bɛ hukumu min kɔnɔ alako ta fan fɛ, o ka di, ani o b’an lafiya fana. (Zab. 133:1) Balannako tɛ funankɛnin dɔ k’a fɔ ko: “N bɛ taa lakɔli la ka tile kuuru bɛɛ kɛ yen. O bɛ ne dusu tiɲɛ kosɛbɛ. Nka, lajɛw bɛ iko nɛɛmayɔrɔ dɔ kungokolon kɔnɔ, n bɛ fanga sɔrɔ yɔrɔ min na walasa ka kalankɛdon nata koɲɛw kunbɛn.” Dɔ wɛrɛ ko: “Ne y’a ye ko ka gɛrɛ mɔgɔ wɛrɛw la minnu bɛ Jehowa fɛ, o bɛ n dɛmɛ n madonnen ka to Jehowa la.”
4 K’i tɔgɔ sɛbɛn Ala-ka-marako Cidenyabaara Kalan na, o b’i dɛmɛ ka kunnafoniw dalajɛ ka bɔ Bibulu kɔnɔ, ka jɛmu dɔ labɛn n’olu ye, ka tila k’o ɲɛfɔ lamɛnbagaw ye Masaya So kɔnɔ, i n’a fɔ n’i bɛ ka baro kɛ mɔgɔ fɛ. Nafa min b’a la ka kalan walasa ka se ka tiɲɛ kumaw fɔ ka ɲɛ, tiɲɛ kuma minnu bɛ Bibulu kɔnɔ, n’u bɛ na ni kisili ye, i ka miiri o la sa. Yali funankɛw bɛ se k’o kalan cogo nafama ɲɔgɔn sɔrɔ yɔrɔ wɛrɛ la wa?
5 Nafaba bɛ sɔrɔ lajɛw la cogo min na: Fɛn saba de bɛ yen walasa ka nafaba sɔrɔ lajɛw la. O ye k’u labɛn, ka kuma, k’u sirataama, walima k’u waleya.
6 I k’u labɛn: Waati basigilen dɔ boloda walasa k’i ka lajɛw labɛn. I kan’a to lakɔlibaara, sɔn-ni-sɔn baara, walima ɲɛnajɛkow k’o waati ta. I mago b’o waati la walasa ka kɔn ka kalan yɔrɔw lajɛ minnu bɛna ɲɛfɔ lajɛ kelen-kelen bɛɛ la. O la sa, nafa b’a la k’i ka waati boloda koɲuman. A bɛɛ la fɔlɔ ye min ye, o ye k’i ka kan k’i timinandiya dɔgɔkun Bibulu kalan fɛ min bolodalen bɛ Ala-ka-marako Cidenyabaara Kalan kɔnɔ. K’o tilayɔrɔ kofɔlenw kalan, ka taasi u la, o bɛ sanga damadɔw dɔrɔn de ta don o don. Sanni jɛkulu ka gafe kalan ani La Tour de Garde kalan ka kɛ, waati dɔ boloda walasa k’o kalanw labɛn. Mɔgɔ dɔw b’o kɛ tile kelen, walima tile fila ɲɔgɔn sanni o lajɛw ka kɛ. N’i bɛ se, o ɲɔgɔn kɛ Baara ka lajɛw yɔrɔ bolodalen bɛɛ la minnu ka kan ka kɛ o dɔgɔkun kɔnɔ.
7 I ka kuma u la: Bibulu b’a fɔ ko tuma min na Yesu tun bɛ ni san 12 ye, a tun bɛ alabatoso kɔnɔ ka lamɛnni kɛ, ka ɲininkaliw kɛ, ka jaabiw di. (Luka 2:46, 47) Fɔcogo wɛrɛ la, a tun b’a da don baro la yɛrɛ de. N’i fana b’i cɛsiri ka kuma lajɛw la, i bɛna nafa caman sɔrɔ u la.
8 Fɛn minnu bɛ fɔ lajɛw la, i ka kan k’i tulomajɔ u fɛ kosɛbɛ. Tuma dɔ la, jɛmu dɔ lamɛnni ka gɛlɛn ka tɛmɛ a fɔli kan. Mun na? A bɛ se ka kɛ k’an ɲɛmajɔlen tɛ to ni mɔgɔ wɛrɛ bɛ ka kuma. An bɛ se ka mun kɛ walasa k’o kɛlɛ? Kuma minnu bɛ fɔ, an k’olu dɔw sɛbɛn. I mago bɛna kɛ yɔrɔ nafama minnu na kɔfɛ, i k’olu sɛbɛn. I hakili jɔlen ka to kalan kan. Bibulu tɛmɛsiraw fana ɲini. Ni kumana bɛ k’u kalan tuma min na, i k’u lajɛ.
9 Ka fara o kan, ɲininkaliw ni jaabiw bɛ kɛ lajɛ minnu na, i k’a kɛ i kuntilenna ye ka kuma o baro kelen-kelen bɛɛ la. I bɛna nafa sɔrɔ u la kosɛbɛ tun n’i b’o kɛ ka kɛɲɛ n’i yɛrɛ ka kumafɔcogo ye. Ntalenw 15:23 b’a fɔ ko: “Mɔgɔ bɛ ɲagali sɔrɔ a da la jaabi la.”
10 I bɛ min kalan, i k’o sirataama: Fɛn laban min ka kan ka kɛ, o ye ka d’a la tigitigi k’i bɛ ka min kalan, o bɛ ka ‘baara kɛ i la.’ (1 Tes. 2:13) I bɛ fɛn ɲuman minnu kalan lajɛ kelen o kelen na, n’i bɛ o sirataama, o bɛna i surunya kosɛbɛ Jehowa Ala la. A bɛna kɛ mɔgɔ lakika ye i bolo, wa, i bɛna nisɔndiyaba ni wasaba sɔrɔ ka “taama tiɲɛ sira kan,” k’o kɛ i ta ye.—3 Yuhana 4.
11 Balimakɛw ni balimamuso funankɛw, n’aw bɛ lajɛw labɛn, ka kuma u la, aw bɛ fɛn minnu kalan, n’aw b’olu fana sirataama, aw bɛna nisɔndiya camanba sɔrɔ lajɛw la. O tuma kelen na fana, nafa o nafa bɛ sɔrɔ u la, aw bɛna se k’o bɛɛ sɔrɔ. Aw ŋaniya min ye ka to kantigiya la aw sankolola Fa Jehowa fɛ, ani dannaya min b’aw la, olu bɛna kologɛlɛya.—Zab. 145:18.