Don kelen jamalajɛ kɛrɛnkɛrɛnnen kalan bolodalen

Don kelen jamalajɛ kɛrɛnkɛrɛnnen kalan bolodalen min bɛna daminɛ san 2000 Sɛtanburukalo la, a kumakun ye ko: “Faamuyali ta fan fɛ, aw ka kɛ mɔgɔ mɔlenw ye.” (1 Kɔr. 14:​20, ABU) Mun na nafa bɛna kɛ an nali la o la? An bɛ diɲɛ kɔnɔ min falen bɛ juguya la. Walasa ka se k’o kɛlɛ, an ka kan k’an ka faamuyali cogo labonya alako ta fan fɛ. O tuma de la an bɛna se ka se sɔrɔ kojugu kan ni koɲuman ye. Don kelen jamalajɛ kɛrɛnkɛrɛnnen kalan bolodalen bɛna an dɛmɛ k’o kɛ.

Kalan daminɛ na, kafo lakɔlɔsibaga bɛna baro kɛ nin kan: “Fɛn minnu b’an dɛmɛ ka kɛ mɔgɔ mɔlenw ye Bibulu faamuyali ko la.” An bɛ se ka kɛ Krecɛn sabatilenw ye cogo min na Krecɛn ka dannaya la, a bɛn’o jira an na. Kumana nabaga bɛn’a jira k’a jɛya fana ko ka baara kɛ ni Bibulu sariyakolow ye, walima k’u sirataama, o nafa ka bon an ka hakili munu-munu na. A bɛn’o ɲɛfɔ barokun na, n’o ye ko: “I k’i ka faamuyali cogo labonya walasa k’i ka alamɔgɔya lakana.”

Funankɛw fana ka kan k’u ka faamuyali cogo labonya. Kuma bɛna kɛ o kan barokunw na minnu ye ko: “Mun na an ka kan ka kɛ denmisɛnninw ye kojugu ta fan fɛ?” ani “Funankɛ minnu bɛ faamuyali sɔrɔ sisan.” An bɛna funankɛw lamɛn u k’a ɲɛfɔ u bɛ min kɛ walasa k’u ka alamɔgɔya barika bonya ka se k’u yɛrɛminɛ diɲɛ ka baara juguw la, ani k’u yɛrɛw tanga dusu ɲagami ma.

An bɛ hɛrɛba sɔrɔ an ka diɲɛnatigɛ kɔnɔ cogo di? Kumana nabaga bɛn’o ɲɛfɔ jɛmu laban na n’o ye ko: “Nafa sɔrɔ Bibulu sariyakolo waleyacogo la ni faamuyali ye.” A bɛna misaliw di minnu bɛn’a jira an na Ala ka Kuma b’an dɛmɛ cogo min na ka kunkow ɲɛnabɔ, ani ka kow latigɛ. Jehowa b’an kalan fɛn minnu na, an bɛ se ka nafa ɲɛnama sɔrɔ olu la cogo min na, a bɛna misaliw di olu fana kan.

Mɔgɔ minnu b’a fɛ k’u ka yɛrɛbakundili jira batiseli fɛ jamalajɛ la, u ka kan k’o fɔ lakɔlɔsibagaw ɲɛmɔgɔ ye joona. Don kelen jamalajɛ kɛrɛnkɛrɛnnen don bɛ fɔ tuma min na dɔrɔn, i k’i teliya k’o sɛbɛn i ka donjatelan kan, ka fɛɛrɛ jɔnjɔnw tigɛ walasa ka nafa sɔrɔ o kalan nafama in na. Don kelen jamalajɛ kɛrɛnkɛrɛnnen yɔrɔ si kana fɔ i kɔ. A bɛna fanga di i ma walasa ka se ka kow muɲu nin diɲɛ jugu in na, ani ka to kantigiya la Jehowa fɛ.