Kafo ka jamalajɛ kalan bolodalen kura

An b’a dɔn ko Jehowa ka kan n’an ka kanuya ye. An b’a dɔn fana k’an ka kan ka ale kelenpe de bato. Nka, diɲɛ b’a ɲini k’an yɔrɔ janya Ala la. A kun ye an surunyalen kana to Ala la. (Yuh. 17:14) Walasa ka dɔ fara an ka kanuya fanga kan ka ɲɛsin Jehowa ma, ani ka fanga sɔrɔ k’an kologɛlɛya diɲɛ kɔnɔfɛnw kama, diɲɛ kɔnɔfɛn minnu bɛ farati don an ka alamɔgɔya la, an ka ala-ka-marako san 2001 kafo ka jamalajɛ kura kumakun bɛna kɛ nin ye: “Aw ka Ala kanu​—⁠Aw kana diɲɛ kɔnɔfɛnw kanu.”​—⁠1 Yuh. 2:​15-17.

Jehowa kanuyaba min b’an na, o de b’an bila ka seereya kɛ a ko la. Hali n’a b’o cogo la, foro baara man nɔgɔn Jehowa ka jamakulu mɔgɔ caman bolo. Nka, u ye maloya ni gɛlɛya wɛrɛw kunnasagon cogo min na walasa k’o baara kɛ k’a dafa, o bɛna jira an na kalan yɔrɔ la, n’o ye ko “Ala kanuya b’an bila k’an ka cidenyabaara kɛ.”

Ikomi diɲɛ namuw bɛ ka tiɲɛ, o bɛ nɔ bila an na cogo di? Wale minnu tun jatelen bɛ kojuguw ye fɔlɔ la, a bɛ fɔ olu ma bi ko wale minnu ka kan. Jɛmu min ye ko “Ala kanubagaw bɛ kojugu koniya,” ani bɔɲɔgɔnkɔrɔ jɛmu min ye ko “An bɛ diɲɛ kɔnɔfɛnw mafilɛ cogo di?”, olu bɛna dɔ fara an ŋaniya kan walasa an ka ban nege juguw ma.

Ala-ka-marako Kalan ani Baara ka Lajɛ cogo ɲuman ɲɛjirali sen b’o kalan bolodalen na. La Tour de Garde kalan min bɛ kɛ o dɔgɔkun na, o fana bakurubafɔli sen bɛ kalan na. Foroba jɛmu kumakun ye nin ye: “Kanuya ni Limaniya bɛ se ka se sɔrɔ diɲɛ kan cogo min na.” O bɛna dusu don an kɔnɔ ka Yesu ladege, k’an kologɛlɛya diɲɛ degunw kɔnɔ. (Yuh. 16:33) An ka ko bɛɛ kɛ walasa k’an ka Bibulu kalandenw wele u ka na o la. Mɔgɔ o mɔgɔ b’a fɛ ka batise, o tigi ka kan k’a fɔ ɲɛmɔgɔya lakɔlɔsibaga ye joona walasa ko minnu ka kan ka kɛ, a ka se k’olu labɛn.

An ka kanuya ka kan ka sinsin tigitigi fɛn min kan walasa an ka dubaw sɔrɔ ka bɔ Jehowa yɔrɔ, kafo ka jamalajɛ bɛna o da an hakili kan. An kan’a to a kalan yɔrɔ si ka fɔ an kɔ.