Yali i ye mɔgɔ ye min bɛ maloya wa?
1 A tɛ bala an na n’an ye denmisɛnnin dɔ ye k’i dogo a ba walima a fa kɔfɛ ka mɔgɔ filɛ. Maloya bɛ faamu denmisɛnya kɔnɔna na. Nka, hali n’u balikuyara, mɔgɔ caman bɛ maloya cogo dɔ la. N’a y’a sɔrɔ maloya bɛ nɔ bila i ka cidenyabaara la, i bɛ se ka mun kɛ?
2 Maloya bɛ kɛlɛ cogo min na: I ye “mɔgɔ dogolen min ye i dusukun kɔnɔna na,” a nafa ka bon i k’i hakili to o la. (1 Piɛ. 3:4, NW) Kanuya min b’i la ka ɲɛsin Jehowa an’i mɔgɔɲɔgɔn ma, i k’o fanga bonya. I ka daŋaniya a kan ko n’i bɛ wajuli baara kɛ, o ye cogo ɲuman de ye k’i ka kanuya n’i ka yɛrɛdili jira. I ka taa ɲɛ i ka yɛrɛkalan na. I ka lajɛw matarafa. Jehowa deli tuma bɛɛ ani cogo pereperelatigɛlen na walasa a k’i dɛmɛ. N’i y’i ka dannaya kologɛlɛya, k’i jigi da Ala kan, o bɛna kɛ sababu ye k’i ka dannaya sinsin, k’a to ‘bɛɛ ka dusu sɔrɔ ka Ala ka kuma fɔ ni siran tɛ.’—Fil. 1:14.
3 K’a fɔ k’i tɛ se, i k’o miiriya kɛlɛ. A bɛ iko Timote tun ka kan k’o de kɛ. Pol ye dusu don Timote kɔnɔ ko: “ Mɔgɔ si kana i dɔgɔya i ka denmisɛnya kosɔn.” A y’a hakili jigin ko ‘Ala ma siran dusu di an ma, fɔ sebagaya dusu.’ (1 Tim. 4:12; 2 Tim. 1:7) Jehowa ye Timote bila a ka baara kɛ a ye cogo dafalen na. Ale de fana bɛna i bila i ka baara kɛ a ye n’i bɛ taa ɲɛ, ani n’i b’i jigi da a kan.—Zab. 56:12.
4 Ka miiri Bibulu tɛmɛsiraw la i n’a fɔ Matiyu 10:37, o y’an balimamuso dɔ dɛmɛ. A ka maloya kɛra sababu ye a ka siran a cɛ ɲɛ min tun banna tiɲɛ ma. A y’i timinandiya ka t’a fɛ minkɛ, cidenyabaara nɔgɔyara a ma kosɛbɛ, wa, a cɛ n’a ba, n’a balimakɛw bɛɛ labanna ka sɔn tiɲɛ ma.
5 Labɛn nafa ka bon: N’i b’i yɛrɛ labɛn koɲuman cidenyabaara kama, i bɛna da i yɛrɛ la ka t’a fɛ. Ɲɛfɔlicogo min ka nɔgɔn Comment raisonner (Hakilijakabɔ kɛcogo) gafe kɔnɔ, walima An ka Masaya Cidenyabaara tɛmɛnnenw kɔnɔ, i k’o sugandi. I k’o ta fo i ka se a la. Sanni i ka jɔrɔ fu, i ka hakili ɲuman sɔrɔ. Ikomi i ni tɔw bɛ to ka baara kɛ ɲɔgɔn fɛ, i ka dusu sɔrɔ o la. A to i hakili la k’i bɛ maloya cogo min na, i bɛ mɔgɔ minnu sɔrɔ duw kɔnɔ, olu caman fana bɛ maloya o cogo kelen na. Nka, mɔgɔ bɛɛ mago bɛ Masaya cikan na.
6 N’i bɛ maloya, i jigi kana tiɲɛ. N’i y’i timinandiya, Jehowa bɛna i dɛmɛ walasa i ka kɛ kibaru duman weleweledala ye min bɛ se kosɛbɛ. I bɛna nisɔndiya sɔrɔ i ka cidenyabaara la.—Nta. 10:22.