Ɲininkaliw Jaabi

◼ Mɔgɔw kunbɛnbagaw bɛ se ka bangebagaw dɛmɛ cogo di walasa u den taamacogo ka ɲɛ lajɛw la?

Denmisɛnninw galabu ka kɛnɛ, wa ka sigi yɔrɔ kelen waati jan kɔnɔ, u degelen tɛ o la. Ikomi denmisɛnninw b’u yɛrɛw minɛ lajɛ kɛtuma na, ni lajɛ banna dɔrɔn, u ka teli k’u yɛrɛ lafoni, ka boli ɲɔgɔn kɔ Masaya So kɔnɔ, walima lajɛ kɛyɔrɔ wɛrɛw la, mobiliw jɔyɔrɔ la, ani sennatigiw tɛmɛyɔrɔ la. Nka nin ntalen in ye tiɲɛ ye: ‘denmisɛnin min bilalen bɛ a yɛrɛma, o bɛ a bangebagaw maloya.’​—⁠Nta. 29:⁠15.

Dusukasiko don k’a fɔ ko an balimakɛw n’an balimamuso minnu ka kɔrɔ, olu dɔw banana kosɛbɛ bawo denmisɛnninw bolila u cɛma, k’u ɲɔnti ka bin. O kɛra sababu ye k’u bana fu, ka musaka wɛrɛw fana lase bangebagaw ni jɛkulu ma. Walasa k’u lakana, ani ka mɔgɔ tɔw fana lakana, an man kan ka to denmisɛnninw ka boli, ka tulon kɛ Masaya So kɔnɔna n’a kɛnɛmana na.

Sɛbɛnniw sira la, a sangatigiya bɛ bangebagaw bolo, u k’u denw lamɔ an ka batokɛyɔrɔw bonyali la cogo bɛnnen na. (Waj. 5:1a) An ka Krecɛn lajɛw ni jamalajɛw la, baara dira kunbɛnbagaw ma ka lajɛ ko ‘fɛnw bɛɛ bɛ ka kɛ cogo bɛnnen na, ko ɲɛnabɔlen koɲuman na.’ (1 Kɔr. 14:40; Kol. 2:⁠5) U ka kan ka to kɔlɔsili la lajɛ ɲɛ, a kɛtuma na, ani a bannen kɔfɛ, a kɛra Masaya So kɔnɔna ye, walima a kɛnɛmana ye. Ni den dɔ bɛ ka boli, walima n’a bɛ ka ko bɛnbali dɔ kɛ, kunbɛnbaga bɛ se ka den lajɔ ni ɲumanya ye, k’a ɲɛfɔ a ye k’o ko suguw man kan ka kɛ. O ko ka kan ka fɔ a bangebagaw ye ni ɲumanya ye, k’a jira u la k’u ka kan k’u den kɔlɔsi. Bangebagaw ka kan ka wale bɛnnen kɛ ka ɲɛsin o ko ma.

A bɛ faamu ko tuma dɔw la, denyɛrɛninw ni denmisɛnninw bɛ se ka kasi, walima ka mɔgɔw ɲagami lajɛw kɛtumaw na. O la sa, ni kunbɛnbagaw bɛ na sanga 20 ɲɔgɔn sanni lajɛ ka daminɛ, u bɛ se ka kɔfɛ sigilanw mara bangebagaw ye minnu b’a fɛ ka sigi yen n’u ka denmisɛnninw ye. Mɔgɔ tɔw ka kan ka sɔn o ma, ka kɔfɛ sigiyɔrɔw to u ye.

Ni den dɔ ye sababu ye ka mɔgɔw ɲagami, bangebagaw man kan ka sigi ten. N’u ma fɛn fosi kɛ, ni mankan bɛ mɔgɔw bali u k’u tulomajɔ, kunbɛnbaga dɔ ka kan k’a ɲini bangebagaw fɛ ni ɲumanya ye, n’u t’a fɛ ka bɔ ni den ye kɛnɛma. O kosɔn, n’an bɛ mɔgɔ kuraw wele ka na lajɛw la, an ka kan ka sigi u kɛrɛ fɛ, k’u dɛmɛ n’u denw bɛ kasi, walima n’u bɛ tɔw ɲagami cogo dɔ la.

Ka denmisɛnninw caman ye minnu si tɛ kelen ye Masaya So la, k’a ye fana k’u taamacogo ka ɲi Ala ka jama cɛma, o b’an nisɔndiya. (1 Tim. 3:15) Jehowa bɛ ko minnu sigi bato kama, ikomi denmisɛnninw bɛ taama o kow kɔnɔ, o bɛ bonya lase Jehowa ma, wa o nafa ka bon fana jɛkulu mɔgɔ bɛɛ bolo.